ACT 15
15
1Cun Judia ram in mizeimaw an ra i, “Moses nawlbia ningin cuarpar nan tan lo ahcun khamh nan si kho lai lo, tiah unau kha an cawnpiak. 2Cucaah Paul le Barnabas he fakpi in an i el i an i doh tikah Paul le Barnabas kha mi cheukhat hna he cu kongah Jerusalem i lamkaltu le upa hna sin i va phanhpi awkah an thim hna. 3Cuticun kawhhran nih an thlah hna i an kal. Gentel mi hna nih Thawngṭha an cohlanning kha chim pahin Foinisia le Samaria ram an ṭol dih i unau hna kha an lawmhter ngai ngai. 4Jerusalem khua an phâk tikah kawhhran hna le lamkaltu le upa hna nih an rak cohlan hna, cun Pathian nih anmah hmangin a tuahmi thil vialte kha an chimh hna. 5Asinain farasih hna chungin zumtu cheukhat nih an i thawh i, “Gentel hna cu an cuarpar tan ding an si i Moses nawlbia zong zulh awkah bia kamter ding an si,” tiah an ti. 6Cu kong ruahṭi awkah lamkaltu le upa kha an i tong. 7Fakpi in an i al hnuah, Peter a dir i, “Unau hna, Gentel mi nih keimah hmurkâ in Thawngṭha bia an rak theih i an zumh khawh nâkhnga tuan deuh ah Pathian nih a ka thimning zong nan hngalh ko. 8Lungthin hngaltu Pathian nih anmah a cohlan ko hna tiah hngalhternâk ah, kanmah a kan pêk bantuk khan an sinah Thiang Thlarau kha a pêk hna. 9Kannih le annih thleidang loin zumhnâk in an lungthin a thianter hna. 10Cucaah pupa hna le kanmah zong nih kan phorh khawh ti lomi hngawngkual kha zultu hna hngawngah banh ṭhân i tim in zeicadah Pathian nan hneksak. 11Anmah nih an zumh bantukin kannih zong nih Bawipa Jesuh Krih zângfahnâk lawnglawng in khamh dingah kan ruahmi a si,” tiah a ti. 12Cuticun mibupi cu dai tein an um, Barnabas le Paul nih anmah hmangin Pathian nih Gentel mi hna lakah hmelchunhnâk le khuaruaharnâk a tuahmi kong an chim tiangin an ngaih hna. 13Dai tein an um hnu ah, Jeim nih, “Unau hna, ka bia hi ngai tuah u, 14Simon nih Pathian nih Gentel mi a veh hramthawknâk le Amah min putu dingah an lak i mi a lâknâk kong a chim. 15Cu bia le profet hna bia hi â rem ngai, hitihin ṭial a si. 16‘Cuhnuah ka kir ṭhân lai i David thlâm a rawkmi kha ka derh ṭhân lai, â rawhnâk zawn kha ka remh hna lai. 17Midang ka min a autu Gentel vialte zong nih BAWIPA an kawl nâkhnga, hi thil vialte tuahtu BAWIPA nih a ti, 18Zungzal in a tuahmi thil vialte hngalhtertu Pathian nih a ti, tiah ṭialmi bangin. 19Cucaah hitihin ka ruah, Gentel mi Pathian lei i â mermi hna khi harnâk pe hna hlah u sih. 20Milem biaknâk sa ei le, nupa sualnâk tuah le hngawngdih sa ei le sathi ei kha i sûm hna seh, tiah an sinah ca ṭial u sih, tiah ka ruah bik ko,” tiah a ti. 21Zeitintiah Moses nawlbia zong hlan lio piin khuakip ah phuangtu a ngei i sinagog kip ah Sabbath ni fate rel a si tawn kha,” tiah a ti. 22Cuticun lamkaltu le upa hna le kawhhran dihlak nih anbu chungin mi thim i Paul le Barnabas sinah Antiok khua ah kalter kha ṭha an ti, an thimmi hna cu, Judas, Barnabas timi le, Sailas an si i cu hna cu unau hna lakah hotu deuh an si. 23Hitihin an ṭial i an kut ah an kuat. Lamkaltu, upa hna le unau hna nih, Antiok khua le, Siria ram le Silisia ram i Gentel unau kut an tlaih hna. 24Kan bu chungin mizeimaw biachim mi nih an buaiter hna tiah kan theih. “Cuarpar nan tan hrimhrim lai i nawlbia zong nan zulh hrimhrim lai, tiah an ti. Cubantuk chim dingin an sinah nawl zeihmanh kan pe hna lo. 25Cucaah lungnge tein kan i pum i thimmi hna nan sinah ratter awkah kan hna a tla, kan dawtmi Barnabas le Paul, 26Bawipa Jesuh min in thih hmanh a ṭih lomi hna sinah, 27Judas le Sailas hi kan rak thlah hna, annih zong nih hi bia hi hmurkâ in an chim te lai. 28Zeitintiah Thiang Thlarau le kannih nih a biapi mi thil pinlei hna cu thilrit khinh lo dingin kan hna a tla, 29milem biaknâk sa ei le, sathi ei le, hngawngdih sa ei le nupa sualnâk tuah kha ngol ulaw, tiah kan ti, hi hna hi nan rak ngol ahcun nan caah a ṭha lai. Dam tein,” tiin. 30Cuticun an thlah hna i Antiok khua an phân, mizapi kha an kawh hna i ca cu an pêk hna. 31An rel hnu ah thazâng pêknâk bia an chimmi nih a lawmhter ngai ngai hna. 32Judas le Sailas cu profet zong an si i bia tampi in unau hna kha an hna an ngamter hna i an fehter hna. 33Ni zeimawzat cuka i an cam hnuah, unau hna nih lamkaltu hna sinah kir ṭhân dingah hnangam tein an chuahter hna. 34Asinain Sailas nih cuka i câm rih kha a ṭha tiah a ruah. 35Paul le Barnabas tu cu Antiok khua ah Bawipa biachim le cawnpiak in an um peng, midang tampi zong an um ve. 36Ni zeimawzat hnuah Paul nih Barnabas sinah, “Atu kal ṭhân u sih law, khuakip i Bawipa bia kan chimnâk pauh i unau hna kha veh in zeitindah an um ti kha zoh hna usih,” tiah a ti. 37Cubangin Barnabas nih Johan, Marka an timi cu an sinah hruai a timh peng. 38Asinain Paul nih Pamfilia in anmah a rak tluntâk hna i an rianṭuannâk i a rak zulh hna lo ruangah i kalpi a duh ti lo. 39Fak nawn in an i al hnuah, an i ṭhen. Barnabas nih Marka â kalpi Saipras tikulh leiah tilawng in an kal. 40Paul nih Sailas â thim i unau hna nih Bawipa zângfahnâk ah an chiah hna hnuah an chuak ve. 41Cun kawhhran hna fehter pah in Siria le Silisia ram kha an ṭol dih.
Currently Selected:
ACT 15: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
