ACT 14
14
1Ikonion khua ah Judah mi hna sinagog ah an lut i bia an chim i Judah mi le Grik mi tampi nih an zumh. 2Asinain a zum duh lomi Judah mi hna nih Gentel mi an forh hna i an ruahnâk ah huatnâk thlaici tuh in unau kha an huatter hna. 3Cucaah cuka ah sau nawn an câm, a zângfahnâk bia hngaltu an si bangin Bawipa ah ralṭha in bia cu an chim, hmelchunhnâk le khuaruahharnâk kha an kut in a tuahter hna. 4Khua mi hna cu an i ṭhen i a cheu nih Judah mi an ṭanh i a cheu nih lamkaltu an ṭanh. 5Gentel mi le Judah mi hna le an hotu hna he an ṭangṭi hna i lamkaltu kha thazâng chuah in lung in cheh an timh hna, 6annih nih an i timhmi an theih tikah Likaonia ram khualipi Lustra le Derbe le a pawngkam ram hna ah lodiam an zâm. 7Cuka ah thawngṭha kha an chim. 8Lustra khua ah kezengmi a ṭhu tawn i a nu paw chungin zengcia in a chuakmi a si i ke in a kal bal lo. 9Cu pa nih Paul phungchim a ngai i Paul nih a zoh peng i dam khawhnâk tiang zumhnâk a ngeih kha a hngalh tikah, 10aw thang ngaiin, “Ding tein nake in dir tuah!” tiah a ti. Cun â hlawk i kein a kal. 11Mizapi nih Paul tuahmi an hmuh tikah Likaonia holh in, thang ngai ngaiin, “Minung bantukin pathian kan sinah an rung ṭum a si hih,” tiah an ti. 12Barnabas kha Zeus an ti i Pual kha biachimtu deuh a si caah ‘Hermes’ tiah an ti. 13Cuticun Zeus tlângbawi, hauleng i ṭempal a ngeimi nih cawtum le pangpar ṭhirual kha kutkâ ah a rak put i mizapi he raithawinâk ah thah an timh. 14Lamkaltu Barnabas le Paul nih cucu an theih tikah an puan an thleh i zapi sinah an tli i an au, 15Pu le hna zeiruangahdah hi thil hi tuah nan timh. Minung sawh sawh, nanmah bantuk sining ngeimi kan si. Hibantuk santlailo thil hna hi mertâk u. Kannih nih lei le van, rili le a chung i a ummi thil vialte Sertu Pathian lei ah nan i mer khawh nâkhnga kan in chimh hna. 16Cu Pathian nih cun kan hnulei cân vialte ah khan, miphun kip nih anmah lam cio an zulh kha a sian. 17Asinain Amah cu a um hrimhrim tiah i hngalhter loin a um bal lo. Cu â hngalhternâk hna cu, ṭhatnâk a tuah tawn i van in ruah hna a surter, nan thlai hna nih theipar tampi in an chuah, ei awk le lawmhnâk in nan lungthin a khahter tawn,” tiah an ti. 18Cuticun mizapi nih an sin i raithawinâk saṭil thah an timhmi cu cu bia nih a lêtter khawh hna. 19Cuticun Antiok khua le Ikonion khua Judah mi mizeimaw an ra i mizapi kha anmah leiah an ṭanter khawh hna, Paul cu lung in an cheh, khuachung in an chuah i a thi cang tiah an ruah. 20Asinain zultu hna a pawng i an dir lioah a hung tho i khuachung ah a lut. A thaizing ah a chuak i Barnabas he Derbe khua ah an kal. 21Cuka ah Thawngṭha bia an chim, zultu tampi an ser i Lustra, Ikonion, le Antiok ah an kir. 22Harnâk tampi tuarin Pathian pennâk ah kan luh awk a si ko, tiin zultu hna lungthin kha an ṭhawnter i zumhnâk ah fekte i dir dingin thazâng an pêk hna. 23Kawhhran kipah upa an chiah i rawlulhnâk he thla an cam dihin an zumhmi Bawipa sinah an chanh hna. 24Pisida ram an tan hnu ah Pamfilia ah an phân. 25Perga khua i bia an chim dih in, Attalia khua ah an vung kal. 26Cukacun Antiok ah tilawngin an kal. Cucu an lîmmi rian ṭuan awkah unau hna nih Pathian zângfahnâk i an chanh hnu ah an thlah hna nâk kha a si. 27An phâk hnu ah kawhhran kha an kawh hna i Pathian nih anmah hmangin a tuahmi vialte le Gentel mi hna caah zumhnâk lam Bawipa nih a onpiaknâk kong kha an chim hna. 28Cuticun zultu hna sinah saupi an um.
Currently Selected:
ACT 14: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
