1CO 6
6
1Nanlak ah mi pakhat khat nih midang sinah bia nan ngeih ahcun, mithiang hna sinah phâkpi lo in miding lo hna sinah nan phâkpi hnga maw? 2Mithiang hna nih vawlei bia an ceih te lai ti hi nan hngal lo maw? Vawlei bia hmanh nan ceih ahcun thil hmete hna cu nan ceih awk a si hnga lo maw? 3Vanmi hna hmanh an kong kan ceihte lai ti nan hngal lo maw? Cucaah a tu nunchung konglam hna cu kan ceih chinchin awk a si ko. 4Asiah a tu nunchung ca i ceih awk nan ngeih tikah, kawhhran hna lakah santlai lo bik hna maw nan ceihter tawn hna? 5Nan ning a zah nâkhnga ka chimmi a si. Mah unau karlak ah bia ceih kho tu mifim pakhat te hmanh nan ngei lo tinâk a si maw? 6Unau nih a unau cu biaceihtu sinah a chuahpi, cuzong cu zumlotu hmai ah hei si kaw! 7Cucaah hibantukin biaceihtu hna hmai i nan i chuahpi lengmang mi hi nan palh hrimhrim ko. Zeiruangahdah palhnâk cu nan in ko hna lo? Zeiruangahdah hlengtu nâkin hlenmi si cu nan i thim ko lo? 8Cucu chim rih loin, nanmah tu kha palhnâk tuahtu le hlengtu siin hibantuk thil hna hi nan unau hna sinah nan tuah! 9Miding lomi hna nih Pathian pennâk an co lai lo ti nan hngal lo maw? Hlen in um hlah u. Nupa sualnâk a tuahmi, milem a biami, ṭangdang kaimi, mi hor, tawka hormi, 10mifir, hakkaumi, zurit hmang, mi hauhhmang, ningcang lo lak hmangmi hna nih Pathian pennâk an co lai lo. 11Nan lakah cheu khat cu cubantuk tuah a hmangmi nan rak si. Asinain Bawipa Jesuh min le kan Pathian Thlarau ah `awlthian nan si cang, thianter nan si cang, thiamcoter nan si cang. 12Thil vialte ka caah a thiang ko, asinain thil vialte hi san an tlai dih theng lo. Zeizong vialte ka caah a thiang ko, asinain zei sal hmanh ah kâ siang lo. 13Eiding cu paw caah a si, paw zong eiding caah a si, asinain Pathian nih a hrawh ve ve lai. Taksa hi nupa sual tuahnâk caah a si lo i Bawipa caah a si. Bawipa zong cu taksa caah a si. 14Pathian nih Bawipa cu a thawhter i kan nih zong a ṭhawnnâk in a kan thawhter te lai. 15Nan taksa kha Krih nge a si ti kha nan hngal lo maw? Krih nge kha lakpiak zau in hlawhhlang sinah kan pe lai maw? Pe naisai hlah! 16Asiloah hlawhhlang he i peh hi amah he pumkhat sinâk a si tiah nan hngal lo maw? “An pahnih in taksa pumkhat an si cang lai,” ti a si kha. 17Asinain Bawipa a pehtu cu amah he thlarau ah pumkhat an si. 18Nupa sualnâk tuah hi zâmtâk u. Minung tuahmi sualnâk tampi cu pum lenglei ah a si. Nupa sualnâk a tuahtu cu amah pum cungah sualnâk a tuahtu a si. 19Asilo ah nan pum hi nan chung i a ummi, Pathian sin in nan hmuhmi, Thiang Thlarau ṭempal a si le, nanmah ta nan si ti lo, ti kha nan hngal lo maw? 20A man in cawkmi nan si cang; cucaah Pathian ta a simi nan pum le nan thlarau in Pathian thangṭhat u.
Currently Selected:
1CO 6: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
