1CO 4
4
1Kan nih hi Krih sinum le Pathian biathli kengtu ah mi nih kan ruat hna seh. 2Cuhleiah zohkhentu cu zumhawktlâk si a herh. 3Nannih nih nan kan sawi i biaceihnâk ah nan kan hniksak a si zongah, kan caah thil hme te a si. A ngaingai ti ah, keimah le keimah hmanh kâ hniksak ballo. 4Zeitintiah keimah lila nih i sawi awk zeihmanh kâ hngal lo, asinain cu nih cun thiam a ka co ter hlei lo, a ka hneksak tu taktak cu Bawipa a si. 5Cucaah Bawipa a rat hlan i a cân a phâk hlanah hin zeihmanh hniksak hlah u. Amah nih khuamui i thuhmi hna kha khuaceu ah a langhter te lai. Lungchung i timhmi zong kha a langhter dih lai. Cucân ah kan co tawk cio thangṭhatnâk zong Pathian sinin kan hmuh cio lai. 6Cuticun unau hna, ṭialmi pinlei tiang i nan kalnâk hnga lo le kanmah sinin nan cawnkhawh nâkhnga, cu thil hna cu nan ṭhatnâk dingah kei le Apollo cungah kan tlunter ko. Cuticun nan lakah mi pakhat hlawrh in pakhat nan lamhchih nâkhnga lo. 7Zeitintiah midang nâkin phundang deuh in an sertu hna cu ahodah an si? Cun nan cohlan mi hlei in hmuhmi dang nan ngei maw? Na cohlan ko nain zeiruangahdah a cohlang lomi bangin na hmaihngal pi? 8Nan khim ngai cang! Nan rum ngai fawn! Kan tello in siangpahrang bangin bia nan ceih! Asi, bia nan ceih hi ka duhmi a si ko, nanmah he ceihṭi kho chinchin u sihlaw! 9Zeitintiah Pathian nih kan nih lamkaltu hna hi thi ding i ruahcia mi bangin a hmadung bik caah langhter mi ah kâ ruah. Minung le vanmi hna hmuh ah zohnuam siding in vawlei ah hin a kan ser a si bik ko. 10Krih ruangah mihrut kan si i nannih cu Krih ah mifim nan si. Kannih kan derthawm i nannih tu nan ṭhawng! Nannih cu nan ropi ngai i kan nih cu zeihmanh lo kan si. 11Atu tiangin kan rawl a ṭam i kan ti a hâl, hnipuan kan ngei lo i tukvelh kan si, in le lo zong kan ngei lo. 12Kut in kan ṭuan i kan ba, an kan sik i thluachuah kan pêk hna; a kan serhsat i kan i in ko. 13sual an kan puh tikah, tangdornâk he kan dothlat. Atu tiangin vawlei hmunthûr, ekpon bantukin mi nih an kan ruah. 14Hi bia hi nan ning zahter dingah ka ṭialmi an si lo, ka fa dawtmi bangin kan chimhhrinnâk hna tu a si. 15Zeitintiah Krih ah cawnpiaktu thonghra hmanh ngei ulaw, pa tu cu tampi nan ngei lo. Krih Jesuh ah thawngṭha bia in fa ah kan hrin hna. 16Cucaah rakka zohchunh u tiah kan nawl hna. 17Hi ruangah Timote, ka dawtmi le Bawipa i zumhawktlâk ka fa cu nan sinah ka run thlah, anih nih Krih i ka umtuning, ramkip i kawhhran kipah ka cawnpiak ning hi an chimh hna lai. 18Nan sinah ra tilo dingin nanka ruah caah mi cheukhat tluang nan khawng cawlh. 19Asinain Bawipa nih rem a ti ahcun ka ra zau lai. Cuticun mi porhlaw hna nih zeibantuk ṭhawnnâk dah an ngeih ti cu ka hngalh ko lai. 20Zeitintiah Pathian pennâk cu bia lawngah um loin ṭhawnnâk ah a ummi a si. 21Zeidah nan duh deuh? Tuknâk fung he maw ka rat lai, dawtnâk le lungnemnâk thlarau he?
Currently Selected:
1CO 4: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
