1CO 3
3
1Cun unau hna, thlaraulei mi bangin nan sinah bia ka chim kho lo, thisa mi bangin, Krih ah ngakchia sem sin i bia chim bangin bia ka chim. 2Rawl si loin hnûk in kan cawn hna, a tu tiangin rawl nan ei kho rih lo, 3zeitintiah thisa mi nan si peng ko rih. Zeitintiah hnachuahnâk, elhnialnâk, i ṭhennâk hna nan lakah a um tikah thisa mi, minung men men bantukin nan nung ko lo maw? 4Pakhat nih, Paul bu ka si, a dang nih, Apollo bu ka si, nan ti chung pauh cu thisa mi nan si lo maw? 5Paul cu ahodah a si, Apolo zong cu ahodah a si, rianṭuantu nan zumhmi kong an chimtu hna, cu hmanh cu Bawipa nih a pêkning cioin an si lo maw? 6Kei nih ka bunh, Apollo nih ti a toih i Pathian nih a ṭhanter. 7A ṭhan tertu Pathian dah ti lo cu, a bunhtu cu zeihmanh a si lo i ti a toihtu zong zeihmanh a si hlei lo. 8A bunhtu le ti toihtu cu pumkhat an si, an ṭuanning cio in ṭuanman zong hmu ding an si. 9Zeitintiah kannih cu Pathian rian ṭuanpitu kan si i nannih cu Pathian lo nan si. Pathian sakmi in zong nan si. 10Pathian zângfahnâk pêk kan sining cio in innsak a thiam ngaimi bangin keinih a hram ka bunh, midangnih a cungah inn an sak. Cuticun a cungah inn a satu hna nih an sakning ah i ralring cio hna seh. 11Zeitintiah bunh ciami hram dah ti lo cu ahohmanh nih an bunh kho ti lo, cucu Jesuh Krih a si. 12Hrambunh mi cungah khan mi kip nih, sui, ngun, lungvar, thing, hnahchawl, capawl hna hmangin inn an sak ahcun, 13mikip rianṭuan cu a fiang cang lai; zeitintiah cu Ni nih cun a fianter lai, zeicatiah mei in a langh lai caah, mei nih cun mikip rianṭuan cu zei a si kha a hniksak lai. 14Mizei ṭuanmi zong a cung i sakmi kha a hmunh ahcun, cunih cun ṭuanman a hmuh lai. 15Mizei ṭuanmi zong an kangh ahcun, cu nih cun ṭuanman a sung lai, amah tu cu mei chungah a lanmi bangin khamh a si lai. 16Pathian ṭempal nan si le Pathian Thlarau nan chungah a um ti kha nan hngal lo maw? 17Mizei pauh nih Pathian ṭempal cu a thûrter ahcun, Pathian nih a hrawk ve lai. Zeitintiah Pathian ṭempal cu a thiang i nanmah kha cu ṭempal cu nan si. 18Ahohmanh mah i hleng hlah seh, nan lakah aho pauh kha vawlei thil i mifim ah â ruah ahcun, a fim khawh nâkhnga hrut hmasa seh. 19Zeitintiah hi vawlei fimnâk hi Pathian ruahnâk ah hruh a si. “Mifim hna cu, an fim zernâk nih a foih hna,” tiah ṭial a si; 20cun, “BAWIPA nih mifim hna khuaruahnâk cu hman awk â tlak lo ti kha a hngalh,” tiah ṭial a si ṭhân. 21Cucaah ahohmanh minung kha i hmaihngalpi hlah seh. Zeitintiah zeizong vialte hi nan ta a si. 22Paul maw, Apollo maw, Peter maw, vawlei maw, nunnâk maw, thihnâk maw, thil um lio mi maw, thil um lai ding maw, a dih lakin nan ta an si. 23Nannih zong Krih ta nan si i Krih zong Pathian ta a si.
Currently Selected:
1CO 3: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
