Rom Teeb 16
16
Foontii
1Tɔn, n loon ki n wanni ti niipoo Fiibe po; u be Kenkrea doo ni ki sommit Yisaweira leŋ; li-i tee ki u baar i boor, 2yin gaarɔ ti Yomdaanɔ Masia sann paak kaman nan Yennu niib nba bo sii gaan bi leeb biaŋinba na, ki sommɔ wa loon linba i boor, kimaan u mun tuu sommit niib bonchiann, nan n mɔŋ gbaa.
3N foont Akuila nan u ŋaapoo Prisila binba tee n toontunleeb Yisa Masia toona ni na. 4Bi din jii bi manfoa ki tinn n manfoor, li paak ki n teemm niipoouk; li ki tee n kuukɔɔ kaa teemm niipoouku, ŋaan min nan binba ki tee Juu teeb ŋaan tee Yisaweira na, bi mun bia teemm niipoouk bonchiann. 5Ŋaan bia foont Yisaweira nba lakii ki jiantir Yennu bi ŋaak ni na.
Ki foont n yɔɔŋaŋ Epanetus wunba din tee sinsinn nirɔ nba be Asia tiŋ ni ki din teen Masiaweirɔ na. 6Ki foont Mari wunba din tuu tuun bonchiann ki teeni na; 7ki foont Andronikus nan Junias binba tee n booru ni niib, ki min nan ŋamm din lakin kɔɔ dansarik; ki Masia toomiinba mib bonŋann na, ki bi din sint teen Masiaweira ki n tan wei na.
8Ki foont n yɔɔŋaŋ Ampliatus wunba ki n loonɔ ti Yomdaanɔ paak na. 9Ki foont Urbanus wunba tee ti toontunlɔɔ Masia toona ni na; ki foont n yɔɔŋaŋ Stakis mun biak. 10Ki bia foont Apeles wunba din la bikinu ŋaan lek bia daa waa Masia nan barmɔnii na; ki foont Aristobulus ŋaateeb; 11ki foont n booru ni nirɔ nba ki bi yiu Herodion na; ki foont Nasisus ŋaateeb nba teen ti Yomdaanɔ yada na.
12Ki foont Traifena nan Traifosa binba tuun ti Yomdaanɔ toona na; ki foont n yɔɔŋaŋ Pesis wunba tuun ti Yomdaanɔ toona bonchiann na. 13Ki foont Rufus wunba mantik waa ti Yomdaanɔ sɔnu bonŋann na; ki foont u naa wunba tuu loonin kaman nan wa loon u mɔŋ bik biaŋinba na. 14Ki foont Asinkritus nan Flegon nan Hemes nan Patrobas nan Hemas nan Masia niib kur nba be namm na. 15Ki foont Filologus nan Julia nan Nereus nan u niipoo, nan Olimpas nan Yennu niib kur nba be namm na.
16Yii foont leeb kii kpammii man; Masiaweira nba be siar kur po foonti.
Kpaanii
17N naa waas, n kpaaniie, i mi man binba bɔkitir Yisa niib ŋaan dɔkib u sɔnu ni na ŋaan bia ki saak wannu nba ki i gaar na; lɔkitirib man; 18li nibooru ki waa ti Yomdaanɔ Masia, ŋaan waa bi mɔŋ niauŋo. Bi jikit mɔmante ki kpann binba yaa dudukit ki chee na. 19Tɔn, sɔɔ kur gbat ya gaar Masia barŋanii biaŋinba, linba na paake ki n mɔk parpeenn nani. N loon ki yii mɔk yan ki saan jiin linba ŋan paak, ŋaan daa saak bonbiiri. 20Li kan yukir ki Yennu nba teent parmaasir na sa te ki yin fiir ŋmaa Sintaanii yur paak.
Ti Yomdaanɔ Yisa Masia-n sommi.
Foontii biak
21Tɔn, n toontunlɔɔ Timoti foonti; ki n ninjamm Lusius nan Jason nan Sosipata mun bia foonti. 22Min Tesius nba sɔbin linba ki Pɔɔl pak gbouŋ na ni na foonti ti Yomdaanɔ sann paak.
23Gaius wunba gaar min Pɔɔl nan Masiaweira kur u ŋaak ni na, u mun foonti. Erastus, wunba tee doo na likguutɔɔ na, ŋɔɔ nan ti naa bik Kɔɔtus mun foonti. 24Ti Yomdaanɔ Yisa Masia-n somm i kura.
Joontu Yenmiaru labaar
25Li ŋan ki tin baak Yennu, kimaan u fit te ki i set waau fanu kaman nan ma mɔɔnt barŋanii ki jiin Yisa Masia po na, ki fiit woonin ni maan nba din bɔr bina bina na. 26Ŋɔɔ Yennu sɔkiniinba gaar ki sɔbir gbouŋ ni ki li fiit woonin ni; ki Yennu nba kaa gbennu na tur mɔb a booru kur-n bannir, a niib kur-n la yaak ki teen Masia yada ki sak u mɔb; 27ŋɔɔ Yennu kuukɔɔe tee yandaanɔ na; niib kur-n pakɔ mɔkmɔk nan yoo nba kaa gbennu, Yisa Masia sann paak. Mɔmɔmm.
Currently Selected:
Rom Teeb 16: BIM
Highlight
Share
Compare
Copy
Want to have your highlights saved across all your devices? Sign up or sign in
