Rom Teeb 15

Leeb sommir labaar

1Timm nba ki ti yada chee na, li ŋan ki tii mɔk sukuru ki somm ti leeb nba yada daa ki chee na, ki daa tuun ti mɔŋ loomm kuukɔɔ kaa. 2Ŋaant man ki ti kura baka-ii be ti naa waas paak ki sommib ki bin wei Yisa Masia sɔnu fanu. 3Ŋɔɔ Masia din ki loon wun tun u mɔŋ loommi. Li sɔb Yennu gbouŋ ni a “Binba sukii Yennu na, bi sukii mine.” 4Linba kur sɔb Yennu gbouŋ ni na, li sɔb ki turit a tii tumiie. U gbouŋ maŋ teent sukuru, ki bia kɔɔntit para, a tii mɔk dindann. 5Yennu nba teent sukuru ki sommit na, wun turi dudukyennkɔɔ kaman nan Yisa Masia nba loon biaŋinba; 6ki i kura sii mɔk dudukyennkɔɔ ki dont Yennu wunba tee ti Yomdaanɔ Yisa Masia Baa na.

Binba ki tee Juu teeb na Yenjiantu labaar

7Yii gaan leeb man kaman nan Masia nba gaari na, ki Yennu sann-n la paku. 8Ma yeen linba na paak tee a Masia din kpint u mɔŋ ki tee Juu teeb na toontunnɔe, ki wann nan Yennu set tee mɔmɔmm daanɔe, ki gbeen Yennu mɔsona nba ki u din senn ki tur bi yejamm nba din tee nijaana na, 9ki te ki binba ki tee Juu teeb na-ii dont Yennu sann u ninbatinu paak. Li sɔb nnee Yennu gbouŋ ni a David yet a

“N sa tura niipoouk binba ki tee Juu

teeb na boor,

ki yin yanii ki paka.”

10Li bia sɔb ki yet a

“Yimm nba ki tee Juu teeb na,

yii mɔk man parpeenn, yimm nan Yennu niib.”

11Li bia sɔb a

“Yimm nba ki tee Juu teeb na,

pakin man ti Yomdaanɔ Yennu;

nibooru kura-n pakɔ bonŋann.”

12Aisaya mun din sɔb Yennu gbouŋ ni a

“Jese yaaboonn tan sa baar

ki Yennu sa chabɔ yaak,

ki u tan sii tee binba ki tee Juu teeb na yudaanɔ,

ki bi tan sii teeu yada.”

13Yennu nba turit dindann na, ya teenɔ yada na paak, ki u sa turi parmaasir nan parpeenn bonchiann, ki ŋɔɔ Yennu Seyeeŋ paŋ sa te ki i dindann na-n ŋamm yabit.

Linba paak te ki Pɔɔl sɔbir nan parcheenn

14N naa waas, n mi n par ni nan i binbeŋ ŋan, ki i mi Yennu maan bonŋann ki fit ki kpaan i leeb; 15ŋaan ma sɔbin gbouŋ na ki teeni na, n mɔk parcheenn ki yaa n tiari baryena, kimaan Yennu mɔk ninbatinu n paak 16ki te ki n tee Yisa Masia toontunnɔ, a n mɔɔnt u barŋanii ki tur binba ki tee Juu teebi, a ki bi sii tee piinii ki teenɔ, ki u Seyeeŋ na sa te ki bin teen nifoŋamm ki penn u par. 17Yisa Masia paake ki n mɔk yuugontir Yennu toonn ni; 18n loon ki n wanni toona nba ki Masia te ki n tun na, ŋaan n kan fit pak nisiab toona po; u te ki n mɔɔnt u labaar na ki tur binba ki tee Juu teeb, ki bia tun bakitnauŋ toona nba din te ki bi sak u mɔb. 19Yennu Seyeeŋ paŋ nee te ki n tuun bakitnauŋ toona na, ki ŋanne te ki bi bann paŋ nba ki u mɔk. Ki n nyii Jerusalem ki bia lin doi ni ki tan baar Ilirikum tiŋ ni ki mɔɔntir Masia barŋanii kura. 20Ŋanne ki n lin nan ninmɔnn ki mɔɔntir Masia barŋanii na ki teen niib nba ki mi gbati; n ki loon mii lin kii lei siaminba ki niib poŋ dɔŋ mɔɔnt leŋi, 21kimaan li sɔb Yennu gbouŋ ni a

“Niib nba ki bi daa ki mɔɔnt u maan ki turib na,

bi sa gbat ki bia bann li paak, kii mi u po.”

Pɔɔl nba din lor a wun saan gɔn Rom teeb biaŋinba

22Li paak, bona bonchiann tuu gɔɔr n sɔnu ki n ki fit baat ki gɔntiini. 23Ŋaan mɔtanae ki n ji daa gbenn n toona nba be yaka na ni, ki ma poŋ sat ki tuu loon bina bonchiann ki n gɔni na, 24mɔtana n sa gɔniiwa; ki n gɔnu maŋ poorpo waaminna, n sii loon ki yin sommin ki n saan Speenn tiŋ ni. 25Ŋaan sinsinn n sa saan Jerusalema, Yennu niib sommir paak, 26kimaan Yisaweira nba be Masedonia nan Akaya tinii ni na, ki bi dukin dudukit ki yent bi para a bin lakin likirii tur Yennu niib nba tee tatimm ki be Jerusalem na. 27Li tee mɔniie nan bi mɔŋ loomme ki bi turib piinii na. Li ŋan bin turib, kimaan Yennu barŋanii nba nyii Jerusalem niib boor ki baarib na paak. Ŋanne te ki li ŋan nan bin turib piinii maŋ. 28Mi-i baar Jerusalem ki turib piinii maŋ, n sa nyi leŋ ki tɔɔt gar i boor ki saan Speenn tiŋ niwa. 29N mi nan mi-i baar i boor, Masia sommir sii be ti ni bonchiann.

30Tɔn, n naa waas, ti Yomdaanɔ Yisa Masia sann paak nan Yennu Seyeeŋ loomm paak, n mei-i, yii mei Yennu nan ninmɔnn n paak ki sommin, 31ki wuu guun ki Judea tiŋ ni niib nba ki teen Yisa Masia yada na, ki bi daa kpimi; kii biakii meiɔ nan piinii nba ki n sa tur Yennu niib na, bin gaar nan parpeenn. 32Li-i tee ki i miar Yennu nna ki turin, ki u-i sak, n sa baar nan parpeenn, ki tan foi waan i boor. 33Yennu nba teent parmaasir na sii be nani. Mɔmɔmm.

Currently Selected:

Rom Teeb 15: BIM

Highlight

Compare

Copy