Zabbu̱li̱ 69
69
Hali mu̱handu̱ wa bahi̱i̱mi̱. Bikukwata ha byakyo birungi. Zabbu̱li̱ gya Dau̱di̱.
1Ai̱ Ruhanga, njuna!
Hab̯wakubba meezi̱ gandoori̱ mwi̱coti̱.
2Ndi̱ki̱i̱ri̱ mu cokodo mulei,
tihaloho na ha kwi̱cya kigulu,
ndi mu meezi̱ galei bijanga bili heehi̱ ku̱mbu̱tya.
3Njwahi̱ri̱ hab̯wa kukunga kwange kwa kucungurwa,
mimiro myange myomi̱ri̱ mei̱so ganzi̱mbi̱ri̱,
hab̯wa kulindiira Ruhanga wange.
4Bannobira b̯usa, bali banene kukira ntumbu za mu̱twe gwange,
bamaani boobo bakwendya ku̱nzi̱kya,
bakumpangiira,
bakumpambiriza kusasula bintu bi̱ntatweri̱.
5Ruhanga, weewe weegi̱ri̱ b̯udoma b̯wange
nsobi̱ zi̱nkoori̱ ti̱zebi̱si̱ri̱ hali we.
6Ai̱ Mukama, Ruhanga wa mahe,
leka baku̱ni̱hi̱ra muli we, bataswara hab̯wange,
ai̱ Ruhanga wʼI̱saleeri̱, otaleka bakwesiga nibakasekwa.
7Hab̯wamu, ntu̱ngi̱ri̱ muswaru,
nsoni̱ zi̱mbu̱mbi̱ri̱ mei̱so.
8Ndi nka mu̱genyi̱ hali banyaruganda bange,
munyamahanga hali baana ba mmaama.
9Bihika binene bya nnyu̱mba gyamu bi̱mmaari̱ mwozo,
bi̱lu̱mo bya bantu bi̱baku̱ku̱lu̱ma nagya babba ni̱baku̱ndu̱ma.
10B̯unkunga kandi nkasiiba,
nakyo ki̱i̱ra ki̱lu̱mo.
11B̯undwala nsensede,
bantu batandika nkunseka b̯u̱seki̱.
12Bab̯wo beicaara ha mulyangu gwa rub̯uga banseka b̯u̱seki̱,
ndi kyembu kya batami̱i̱ru̱.
13Ai̱ Mukama, bei̱tu̱ gya nsaba weewe,
mu b̯wi̱re b̯wa kisa kyamu,
hab̯wa ngonzi zaamu zamaani,
ai̱ Ruhanga onzi̱remwo mu ngonzi zaamu zinene,
onzi̱remwo na kujuna kwamu kwa biribiri.
14Ncungura kuruga mu cogodo, otandeka nkabbuta,
njuna bab̯wo bannobi̱ri̱, onjune na kuruga mu meezi̱ ga ndi̱ha.
15Otaleka bijanga kunkuuta,
nkabbu̱ti̱ra mu meezi̱ rundi nkamerwa cogodo.
16Ai̱ Mukama, nzi̱ramwo, hab̯wa b̯urungi b̯wa ngonzi zaamu zinene,
hab̯wa kisa kyamu kinene nzegwa.
17Otabi̱sa mei̱so gaamu hali muheereza waamu,
nzi̱ramwo b̯wangu kubba ndi mu b̯ujune.
18Weesu̱ma heehi̱ nagya onjune,
ncungura hab̯wa banyanzigwa bange.
19Weegi̱ri̱ ku̱lu̱mwa kwange,
na muswaru gwange kandi kugaywa kundimwo,
banyanzigwa bange bensei̱ obeegi̱ri̱.
20Bi̱lu̱mo bi̱nzi̱ti̱ri̱ mutima, bi̱nti̱gi̱ri̱ ntali na maani,
ntoleerye akungiira kisa, bei̱tu̱ atakabbeho,
na naaku̱mpu̱mu̱u̱lya ntakamuwone.
21B̯unyaali nzala bampeeri̱ bidyo bikwisana nka b̯utwa,
nyoota b̯u̱gyankweti̱, bampeeri̱ vi̱i̱no gilulu gyogyo nnywe.
22Leka magenyi̱ gaab̯u gafooke nka mutegu,
na b̯u̱si̱nge b̯ubali nab̯wo b̯u̱bafookere mukorogo.
23Leka mei̱so gaab̯u geijale aleke batawona,
kandi magulu gaab̯u geicale nigakankana.
24Obakwatirwe ki̱ni̱ga kyamu,
leka b̯usungu b̯wamu b̯ukwaka b̯ubadweho.
25B̯wicalu b̯wab̯u gabbe makandi,
hatabbaho noomwei̱ akwicala mu heema zaab̯u.
26Kubba bahi̱gani̱za yogwo gi̱waafu̱bi̱i̱ri̱,
ni̱bateerya kukuuta bab̯wo booru̱mi̱i̱rye.
27Bateerye kifubiro ha kifubiro,
kandi otabaganyira.
28Leka basusurwe mu kitabbu kya boomi,
leka batabalirwa hamwei̱ na ba mananu.
29Ndimu kuwonawona kandi mu b̯u̱ru̱mi̱,
ai̱ Ruhanga, leka kujuna kwamu kundindenge!
30Nkwi̱za kuhaariiza Ruhanga na kyembu,
nkwi̱za kumuha ki̱ti̱i̱ni̱sa na ku̱mu̱si̱i̱ma.
31Kiki ki̱kwi̱za kusemeera Mukama kukira kumuhongera nte,
rundi kumuhongera nnumi giwa mahembe na bi̱nompo.
32Bab̯u̱ndaaru̱ b̯ubaliwona ki̱kyo balisemereerwa,
nywe batoolya Ruhanga, leke mitima myenyu̱ mi̱rwemwo.
33Hab̯wakubba Mukama yeegwa bali mu b̯wetaagu,
kandi ti̱yeebeera bantu baamwe bali banyankomo.
34Leka iguru na nsi bi̱mu̱haari̱i̱ze,
mataka na binyakulimwo byensei̱.
35Kubba Ruhanga alijuna Sayu̱u̱ni̱ kandi abi̱mbe mbuga za mu Yu̱da,
bantu balicalamwo kandi balugweterwe,
36beizukulu ba baheereza baamwe balilugweterwa,
na bab̯wo bendya ibara lyamwe, boobo bali̱lwicalamwo.
Currently Selected:
Zabbu̱li̱ 69: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
