Zabbu̱li̱ 68
68
Hali Mu̱handu̱ Wa Bahi̱i̱mi̱. Zabbu̱li̱ gya Dau̱di̱. Kyembu.
1Ruhanga wange byoka, aleke banyanzigwa baamu, basasaane,
kandi bab̯wo bamunoba bali̱mwi̱ru̱ke!
2Nka mwi̱ca ku̱gu̱tu̱u̱ka, kwokwo nawe oli̱beeru̱kya,
nka b̯ubbaani kuhunyelela mu mworo,
kwokwo nkori̱ za bibii zilihwerekeera mu mei̱so ga Ruhanga!
3Bei̱tu̱ bananu basemererwe,
kandi bajaguze mu mei̱so ga Ruhanga,
bajaguze na kusemererwa hoi̱!
4Mu̱hi̱i̱mi̱re Ruhanga nimumuhariiza, yooyo Mukama ali,
hakyendi̱ wa b̯uli kintu
mwi̱ze mu mei̱so gaamwe na kusemererwa.
5Yooyo bba nfu̱u̱zi̱ kandi awooneera na bamukaabakwere,
ei̱cali̱i̱ri̱ mu kiikaru kyamwe kitongoole.
6Aha bantu bakulungwa lungwa b̯wicalu,
banyankomo naabatesu̱la
bei̱tu̱ bajeemu̱ baliwonawona mu nsi gya ndala.
7Ai̱ Ruhanga weebembeeri̱ bantu baamu kuruga mu nsi gya b̯wiru,
waalibata nabo kuraba mwihamba.
8Nsi giitengeeta iguru niliguma ndagali̱,
mu mei̱so ga Ruhanga wa Sinaayi,
mu mei̱so ga Ruhanga wʼI̱saleeri̱.
9Ai̱ Ruhanga waagu̱mi̱ri̱ ndagali̱ ginene,
nsi gyamu ginyaakubba gyomi̱ri̱ gyeinyama.
10Ai̱ Ruhanga, bantu baamu baatu̱ngi̱ri̱ yo b̯wicalu,
mu b̯urungi b̯wamu, waagabiira bali mu b̯wetaagu.
11Ruhanga agabi̱ri̱ kigambu,
mahe ga bakali̱ galimwo kwami̱i̱rya makuru garungi.
12“Bakama na mahe gaab̯u beeru̱ki̱ri̱,
bakali̱ bʼI̱saleeri̱ baru̱gi̱ri̱ mu maka gaab̯u bali mu kubagana bintu byei̱he lyab̯u lyanyagi̱ri̱.
13B̯uli muntu yaatu̱ngi̱ri̱ mugab̯u na banyakubba mu mali̱i̱si̱i̱ryo ga ntaama,
baasengi̱ri̱yo bi̱si̱sani̱ bya makolome ga wa bimpaha b̯i̱doli̱ge na zaabbu na byoza b̯i̱doli̱ge na feeza.”
14Ruhanga Wab̯u̱sobozi̱ b̯wensei̱ yei̱ru̱ki̱i̱rye bakama banyanzigwa,
nka mahi̱ga ga ndagali̱ gagwi̱ri̱ ha lusahu lwa zaali̱mooni̱.
15Bbasaani̱, oli lusahu lwa maani.
Oli lusahu lu̱wa mi̱twe minene!
16Hab̯waki oli nei̱hali̱ na lusahu Sayu̱u̱ni̱ lwa Ruhanga yeegombi̱ri̱,
cali Mukama eicala biro byensei̱.
17Mukama yei̱zi̱ri̱ kuruga Sinaayi, yengira mu kiikaru kyamwe ki̱syanu̱
na mahe ga bavu̱gi̱ batembi̱ri̱ bigaali nku̱mi̱ na nku̱mi̱.
18Waatembi̱ri̱ hakyendi̱, weebembeeri̱ bantu banene bab̯wo baawaatoori̱ mu b̯unyagwa,
bantu nibakuha bisembu, na kuruga mu bajeemu̱,
Mukama Ruhanga aliicalayo.
19Tu̱haari̱i̱ze Mukama, yogwo atwetwekera migugu myetu̱ b̯uli kiro,
Ruhanga yooyo kujunwa kwetu̱.
20Ruhanga weetu̱ ali Ruhanga wa kujuna,
kandi hali Mukama Ruhanga hooho tuhonera lu̱ku̱u̱.
21Ruhanga ali̱tema mi̱twe mya banyanzigwa,
anyongotolere ki̱mwei̱ b̯uhanga b̯wa balibatira mu kuhenera.
22Mukama yaakoba yati,
“Nkwi̱za kubatoolayo kuruga Bbasaani̱,
mbatoole na mu ndi̱ha gyeitaka,
23aleke nywe bantu bange magulu geenyu̱ muganaabe neibbanga lyab̯u,
na mbwene zaamu zitungeho kya kudya ha mibiri myab̯u.”
24Ai̱ Ruhanga kukumba kwamu baku̱weeni̱,
kukumba kwa Ruhanga wange,
kandi mukama wange mu nnyu̱mba gyamwei.
25Bahi̱i̱mi̱ bebembeeri̱, baku̱u̱ti̱ ba bikwatu bilira nibabahondeeranga,
hakati̱ waab̯u nihaloho bahalaba baku̱u̱ti̱ ba bi̱cekere.
26“Muhaariize Ruhanga mu bantu banene,
na nywe muli baalula lwʼI̱saleeri̱.”
27Haloho Bbenyami̱i̱ni̱, muto b̯wab̯u akusembayo,
kasi bahandu̱ ba Yu̱da hamwei̱ na kitebe kyab̯u,
ahonderweho bahandu̱ ba Zabbu̱looni̱ na Nafutaali.
28Ai̱ Ruhanga twolokye maani gaamu nka ku̱waakoori̱ woodi̱,
ai̱ Ruhanga maani gokoresya muli twe.
29Bakama bali̱i̱za na bisembu ku̱ku̱si̱i̱ma,
hab̯wa yeekaru gyamu mu Yeru̱salemu̱.
30Fubira ki̱kyo kisolo kiicalira mu kikemu,
fubira ihanga li̱lyo lya bali̱mi̱ baalyo na bantu bali nka nnumi za mu kisaka,
bakwagulire nibakukuletera bisembu,
obi̱nge bantu basemererwa mu kubba na b̯ulemu.
31Bakama baliruga Mi̱si̱ri̱ na I̱syopi̱ya,
balibyokya mikono myab̯u baramye Ruhanga.
32Mu̱hi̱i̱mi̱re Ruhanga nywe bantu ba nsi gyensei̱,
mu̱hi̱i̱me muhaariize Mukama.
33Yogwo eicala mwiguru, iguru lya kadei,
wona asi̱ndi̱ka iraka, iraka lyamwei lya hakyendi̱.
34Mu̱rangi̱i̱re b̯u̱sobozi̱ waamwe, waki̱ti̱i̱ni̱sa alema I̱saleeri̱,
maani gaamwei gali mwiguru.
35Oli Ruhanga oti̱i̱ni̱sya nooli mu kiikaru kyamu ki̱syanu̱,
Ruhanga wʼI̱saleeri̱, ogaba maani na b̯u̱sobozi̱ mu bantu baamu,
Ruhanga osemereeri̱ kuhaariizwa.
Currently Selected:
Zabbu̱li̱ 68: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
