Zabbu̱li̱ 65
65
Hali Mu̱handu̱ wa bahi̱i̱mi̱. Zabbu̱li̱ gya Dau̱di̱. Kili kyembu.
1Ai̱ Ruhanga, weewe osemereeri̱ kuhaariizib̯wa mu Sayu̱u̱ni̱,
hali we miragu myetu̱ mi̱kwi̱za kudwereera.
2Ai̱ Ruhanga, weewe oi̱ramu kusaba,
bantu bensei̱ bali̱i̱za hali weewe.
3Bibii byetu̱ nab̯ubyabba byali byakalaseeni̱,
waatu̱ganyi̱i̱ri̱ b̯ubiibi b̯wetu̱.
4Bali na mu̱gi̱sa bab̯wo bookomi̱ri̱, okabaleeta kwicala kwamwamu!
Tuheeb̯wa binene bya mu nnyu̱mba gyamu Yeekaru gi̱syanu̱.
5Ai̱ Ruhanga Mu̱ju̱ni̱ weetu̱, otwi̱remwo na bi̱ku̱ti̱i̱ni̱sya byokora bya mananu,
ku̱ni̱hi̱ra kwa nsi gyensei̱,
na kwa mataka ga hadei.
6Munyakuhanga nsahu hab̯wa maani,
na b̯u̱sobozi̱ waamu!
7Weemereerya kuhuura kwamataka,
kukuuta kwa bijanga
na b̯u̱gu̱gu̱mu̱ko mu mahanga.
8Nsi gyensei̱ gi̱ti̱i̱na byokora,
weewe okesya b̯wi̱re noob̯uha na kusweka,
oragira bantu bahi̱i̱me hab̯wa kusemererwa.
9Weewe olinda nsi kandi noguma ndagali̱,
aleke bilimwa bikwahukana byere,
mugira gwamu tigwoma
kandi nsi ogi̱tegeka kubba na bidyo bya mpuule binene.
10Weewe oguma ndagali̱ mu ndimiro,
nosi̱ndi̱ka b̯utuntu kwi̱nyamya nsi,
bilimwa noobiha mu̱gi̱sa.
11Mwaka ogukingaho na birungi binene,
b̯uli hokagyendi̱ri̱ habbaho magesa ganene.
12Isubi linene lyeri̱ri̱ mwihamba,
nsahu zi̱zwi̱ri̱ kusemererwa.
13Mali̱i̱si̱i̱ryo gei̱zwi̱ri̱ magana,
mpuule zinene zeri̱ri̱ mu bihanga,
bantu baku̱hi̱i̱ma kandi bakukuuta mi̱zi̱ra hab̯wa kusemererwa!
Currently Selected:
Zabbu̱li̱ 65: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
