Zabbu̱li̱ 44
44
Hali mu̱handu̱ wa bahi̱i̱mi̱. Masikili#44:0 Masikili kisobora ku̱manyi̱sya kyembu rundi kigambu kikora mu kwebembera kusaba. gya baana ba Koora.
1Ai̱ Ruhanga, twegwi̱ri̱ na mapokopo geetu̱,
bya bahaaha beetu̱ bi̱batu̱weereeri̱,
bi̱waakoori̱ mu biro byab̯u bya kadei.
2Weewe wankei na mukono gwamu waabi̱ngi̱ri̱ waasi̱gu̱ra banyamahanga,
waatamwo babbaabeetu̱,
waabonawonesya banyamahanga,
bei̱tu̱ babbaabeetu̱ waabacungura.
3Babbaabeetu̱ batakasi̱ngu̱re gi̱gyo nsi hab̯wa mpirima zaab̯u,
rundi hab̯wa maani gaab̯u,
bei̱tu̱ basi̱ngwi̱ri̱ hab̯wa mukono gwamu gwab̯udyo na maani gaamu,
na kyererezi̱ kya mei̱so gaamu,
hab̯wakubba waabendeerye.
4Ai̱ Ruhanga, weewe oli mukama wange,
oha Yakobbo b̯u̱si̱ngu̱zi̱.
5Banyanzigwa beetu̱ tu̱basi̱ngu̱ra hab̯wa b̯u̱sobozi̱ b̯wamu,
batu̱ru̱mba nitubaziginiira.
6Tinsobora kwesiga b̯uta b̯wange,
kadi gibbe mpirima gyange, tigisobora kunjuna.
7Bei̱tu̱ weewe otujuna hali banyanzigwa beetu̱,
batunoba noobaswaza.
8Twesu̱gu̱syanga weewe Ruhanga,
kandi weewe twahaariizanga biro byensei̱.
9Bei̱tu̱ hataati̱ otu̱swi̱ri̱ kandi watub̯undaaza,
tokyakebembera mahe geetu̱.
10Oleki̱ri̱ banyanzigwa batwi̱ru̱kya,
kandi bintu byetu̱ bab̯wo banyagi̱ babitwala.
11Otu̱heeri̱yo batwi̱te nka ntaama gibakugyenda kusala,
otu̱sarani̱i̱rye mu mahanga.
12Waatu̱ndi̱ri̱ bantu baamu b̯usa,
nka rundi si batakabbe na mugasu.
13Otu̱heeri̱ kubba ki̱joogo mu bataahi̱,
twei̱ra kyaku̱lu̱mwa kandi kyakugaywa mu batu̱heereeri̱.
14Otu̱leeteeri̱ kubba binugwa mu mahanga,
otwi̱ri̱i̱rye kyaku̱joogwa.
15Biro byense ndibata ninswaraswara,
nindi na nsoni̱ mu mei̱so gange,
16hab̯wa bigambu bya bab̯wo banjooga,
kandi bansekereerya mu mei̱so ga banyanzigwa na bendya kuhoora nzi̱go.
17Bibi byensei̱ bi̱twi̱zi̱ri̱ho,
nab̯utwakabba tu̱takwebereeri̱,
rundi tu̱tabi̱nyi̱ri̱ ndagaanu gyamu.
18Mitima myetu̱ timikakurugangaho,
magulu geetu̱ tigakahugukanga kuruga mu muhanda gwamu.
19Bei̱tu̱ nab̯wo otu̱tweri̱ watuguma mu misege,
watubbutukira na nti̱ti̱ gya zigizigi.
20Kakubba twali twebeereeri̱ Ruhanga weetu̱,
rundi twalingi tweheeri̱yo ku̱ramya ruhanga wondi,
21Ruhanga yaaku̱lemeerwe kwahi kukyega?
Hab̯wakubba eicala yeegi̱ri̱ nsita zeetu̱ za ha mutima?
22Bei̱tu̱ hab̯wamu, biro byensei̱ twicala ni̱twi̱twa,
batutwala kubiibi nka ntaama gibakugyenda kusala.
23Ai̱ Mukama, byoka! Hab̯waki otu̱lekereeri̱?
Byokiramwo otatubingira ki̱mwei̱.
24Hab̯waki otwebi̱si̱ri̱ho?
Oteebeera kuwonawona na b̯ujune b̯wetu̱!
25Kubba myozo myetu̱ myehi̱nyi̱ri̱ hansi mwicuucu,
nda zeetu̱ zeekweti̱ kwitehe.
26Byoka oi̱ze otujune,
otucungure hab̯wa ngonzi zaamu zinene.
Currently Selected:
Zabbu̱li̱ 44: LUGUNGU
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
