2 Amǝ Tasalonika 3
3
Bulǝs zǝmbǝa ama ɓǝa ci aɓa hiwi
1A masǝlǝate ka, wun amǝ'eamrǝarǝu, wu tsǝk sǝm aɓa hiwi, ace mǝnana ɓǝ̀ Cau mala Mǝtalabangŋo ɓǝ̀ lidǝmbǝa, ɓǝ̀ akiban aban aɓwana kat nǝ mire, sǝ ɓǝa é nǝ gusǝlǝban kǝla mǝnana pa aɓalǝ wun ngga. 2Wu kǝ pak hiwi ɗǝm ama, Ɓakuli nǝ̀ bwala sǝm nggam, nǝ̀ amsǝ sǝm a bu aɓwana amǝɓane, amǝ'ɓealɓikea. Acemǝnana aɓwana kat sǝ à paɓamuria aban Mǝtalabangŋo Yesu ɗang. 3Sǝ Mǝtalabangŋo ka, à nǝ̀ guli a rǝì. Nǝ̀ pa wun rǝcandǝa, nǝ̀ yal wun a bu yì Mǝɓealɓikea. 4Sǝm ndanǝ makɓalǝu arǝ Mǝtalabangŋo amur wun ama, wu nda aban pak agir mǝnana sǝm bangga wun ngga, sǝ wu nǝ̀ lidǝmbǝa nǝ pea. 5Ən nggǝ zǝmbǝa ɓǝ̀ Mǝtalabangŋo kyan nǝ ɓabum wun arǝ lǝmndǝ earcearǝu ulang mala Ɓakuli, andǝ do gandǝrǝu mana Kǝrǝsti kǝ pâ ka.
Nunkiru arǝ do ɓà
6Wun amǝ'eamrǝarǝu, sǝm nggǝ na wun aɓa lullǝ Mǝtala sǝm Yesu Kǝrǝsti ama, wu puri njar mala aɓwana mǝnana à na ama yia ka amǝkpata Yesu na, sǝ à kǝ dukdo nkundǝr, à kǝ kpata agir mǝnana sǝm kania wun ngga raka. 7Wun nǝ ɓamur rǝ wun ngga, wu sǝlǝna ama ɓoaro ɓǝ̀ wu twal kusǝ sǝm. Sǝm ngga, sǝm duk do nkundǝr aɓalǝ wun ɗang. 8Sǝm li girlina mala kǝɓwa sǝ sǝm ginǝ mbwe gir akuni ɗang. Sǝm pak turo nǝ rǝcandǝa ma'sǝm du andǝ pwari, ace mǝnana ɓǝ̀ sǝm ngga duk twalo amur kǝɓwa ɗang. 9Sǝm ngga, sǝm ndanǝ rǝcandǝa mǝnana sǝm nǝ̀ na wun ɓǝ̀ wu pa sǝm girlina ka, sǝ sǝm pe anggo ɗang acemǝnana sǝm earce dupa wun girkani. 10Sǝ mǝnana sǝm nda aɓalǝ wun ɗiɗyal ka, sǝm nggǝ na wun ama, “Ɓwa mǝnana kat ɓine, pà nǝ̀ pak turo raka, ɓǝ̀ kǝa li girlina gbal ɗang.”
11Sǝm bangŋa anggo, acemǝnana sǝm nggǝ o ama, aɓea aɓwana na aɓalǝ wun mǝnana à kǝ duk do ɓana, à kǝ pak kǝ turo raka. Kǝ turo malea nda kutiki aɓalǝ acau mala aɓwana. 12Aɓa lullǝ Mǝtalabangŋo Yesu Kǝrǝsti ka, sǝm nggǝ cia sǝ sǝm nggǝ zǝmbǝia wia, ɓǝa dum nǝ hamírǝu, ɓǝa pǝlǝ buia, ace mǝnana ɓǝa linǝ ɓamuria ka. 13Sǝ wun, amǝ'eambǝam ngga, wu kǝa aulǝ nǝ pe mǝɓoarne ɗang.
14Wu tsǝk kir wun arǝ ɓwa mǝnana ɓinǝ kpata cau mǝnana sǝm ne aɓa mǝnia yì cautera ka. Wu purî njargula male, ace mǝnana ɓǝ̀ kǝsǝkya kumi. 15Sǝ wu kǝa twali kǝla ɓi wun mǝbura ɗang, wu nunkiri, kǝla mǝ'eam wun.
Masǝlǝata makkun mala Bulǝs
16Ado ka, ɓǝ̀ Mǝtala dorǝpwala nǝ ɓamuri, pa wun dorǝpwala ko aya pwari, a ko ya njargula kat. Mǝtalabangŋo ɓǝ̀ do ata wun kat.
17Mim Bulǝs ka, nǝ buam sǝ ǝn gilǝ mǝnia yì makkun ngga. Mim ngga, anggo sǝ ǝn nggǝ tsǝk buam arǝ koya cautera mem; anggo sǝ ǝn nggǝ gilǝgir. 18Ɓǝ̀ ɓwamuru mala Mǝtala sǝm Yesu Kǝrǝsti, do ata wun kat.
© Wycliffe Bible Translators, Inc. and © The Nigeria Bible Translation Trust 2016