2 Amǝ Tasalonika 2
2
Ɓwa mala Cauɓikea
1Sǝm nggǝ earce lǝmndǝa wun gir amur cau mala nyare yiu mala Mǝtala sǝm Yesu Kǝrǝsti, andǝ dapi ma'sǝm abanɓwáná abani.#2:1 Ɓalli gbal aɓa: 1Tas 4:15-17. Sǝm nggǝ zǝmbǝa wun, wun amǝ'eamrǝarǝu ama, 2wu kǝa kaurǝa arǝ dǝurǝo ɗang. Sǝ ɓǝ̀ ɓabum wun ɓǝ̀ kǝa lo, nǝ cau mǝnana aɓea ɓwana na ama Pwari mala Mǝtalabangŋo angŋa dǝmbǝa yina pale ka ɗang. À nǝ̀ gandǝ bangŋa ama à sǝni aɓa bangŋo, ko à oe a kun ɓǝɓwa, ko à ɓalli aɓa ɓǝ̀ cautera mǝnana à twali ama pur nǝban sǝm ngga. 3Wu kǝa eare ɓǝ̀ kǝɓwa swarki wun ɗang ko bǝti. Acemǝnana mǝno yì pwari ka pà nǝ̀ yiu peatu ɗang she ɓǝ̀ masǝlǝata Mgbicau arǝ Ɓakuli yina, sǝ Ɓwa mala Cauɓikea pusǝna rǝì, mǝno yì ɓwa mǝnana dupi ká kìɗìkì ka. 4Yì ka, nda ɓiumǝbura mǝnana kǝ loasǝ ɓamuri amur Ɓakuli andǝ agir mǝnana kat aɓwana kǝ peri abania ka. Yale nǝ̀ kutio a Ndàmǝgule mala Ɓakuli nǝ̀ duk kam, nǝ̀ na ama yì nda Ɓakuli.#2:4 Ɓalli gbal aɓa: Dan 11:36.
5Ɓalǝ wun kasǝ arǝ agir mǝnana mǝ nda ata wun ɗiɗyal ka, ǝn nggǝ bangga wun ngga re? 6Sǝ wu surǝna rǝ gir mǝnana kǝ tamsǝi arǝ pusǝrǝi ado, she ɓǝ̀ pwari mǝnana à tsǝki wi yi pangŋǝna ka. 7Rǝcandǝa mala ɓealɓikea ka, angŋa dǝmbǝa nǝ̀ nggǝ pak turo aɓa sǝmbǝrǝa, sǝ anggo ka, nǝ̀ ueo aɓa sǝmbǝrǝa she ɓǝa gǝshina ɓwa mǝnana akiyì njar male ka. 8Sǝ à nǝ̀ yia lǝmndǝi, yì Ɓwa mala Cauɓikea, mǝnana Mǝtalabangŋo Yesu nǝ̀ wal-lui nǝ yálí kuni, sǝ nǝ̀ kiɗiki rǝcandǝa male nǝ̀ nyesǝi ɓà, nǝ́ tǎ mala ɓoarɓwa mala yiu male ka.#2:8 Ɓalli gbal aɓa: Isha 11:4. 9Yì Ɓwa mala Cauɓikea man ngga, nǝ̀ yiu nǝ rǝcandǝa mala Shetan, nǝ̀ yia pakki agir-ndǝlǝki, andǝ agir-lǝmndǝa, andǝ agir-gyambǝliban mǝ'nyirì ɗàngɗáng.#2:9 Ɓalli gbal aɓa: Mat 24:24. 10Yì ka, nǝ̀ pak turo nǝ koya nggaman swarkiban mǝnana ɓealɓikea kǝ yiu nǝi ka, amur aɓwana mǝnana à kǝ ká nǝ ká kìɗìkì ka. Amǝnia yì aɓwana ka, à nǝ̀ kìɗìkì, acemǝnana à ginǝ ak mǝsǝcau sǝ à ginǝ earce mǝsǝcau a ɓabumia, mǝnana nda nǝ̀ yinǝia ɓǝa kum amsǝban ngga. 11Ace mani ka, Ɓakuli nǝ̀ tasǝia wia swarkiban mǝcande, à nǝ̀ earnǝ nyir. 12Anggo ka aɓwana mǝnana kat à ginǝ earnǝ mǝsǝcau, à pak banɓoarnado aɓa ɓealɓikea ka, à nǝ̀ kasǝia wia ɓashi.
Wu tamsǝ kusǝ wun kàngkàng wun amǝkpata Yesu
13Sǝ sǝm ngga, ndanǝ ɓoaro ɓǝ̀ sǝm nggǝ pakki Ɓakuli yàwá ace wun, wun amǝ'eamrǝarǝu mǝnana Mǝtalabangŋo earkiyi acea raka. Ɓakuli ka tarki wun kǝla aɓǝla agir mǝdǝmbe ace amsǝ wun, ɓǝ̀ wu duk aɓwana male, nǝ rǝcandǝa mala Bangŋo male, sǝ nǝ paɓamuru ma'wun arǝ mǝsǝcau ka. 14Yì nǝ̀ tunǝ wun, nǝ Cau Amsǝban mǝnana sǝm hamnǝi aban wun ngga, ace mǝnana ɓǝ̀ wu kum kāmbe aɓa gulo mala Mǝtala sǝm Yesu Kǝrǝsti. 15Ace mani ka, wun amǝ'eamrǝarǝu, wu tamsǝ kusǝ wun kàngkàng, wu bwal mǝsǝcau mǝnana sǝm kania wun kat aɓa bang cau, andǝ cautera ka.
16-17Sǝm nggǝ zǝmbǝa ama Mǝtalabangŋo Yesu Kǝrǝsti nǝ ɓamuri, andǝ Ɓakuli Tar sǝm ɓǝ̀ ɓak ɓabum wun sǝ ɓǝ̀ pa wun rǝcandǝa mala pě andǝ nê mǝɓoarne. Ɓakuli ka lǝmndǝna sǝm earcearǝu, sǝ aɓa ɓwamuru male ka, pana sǝm girikiban mǝnana málá male pà kàm raka, andǝ tsǝkɓalǝu mǝgule.
Currently Selected:
2 Amǝ Tasalonika 2: mbu
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016