Erĩbĩsũlĩrwa 14

Olwimbo lwʼabandu ababĩrĩtongolĩbwa

1Kandi monalangira, neryo talebaya, Ekyana kyʼEmbũlĩ kyabya kyimene oko kitwa kyʼeSĩonĩ, kandi haguma naye habya bandu elfu erĩgana nʼamakũmĩ ani nʼĩnĩ (144,000), abawite erĩna lyʼEkyana kyʼEmbũlĩ, nʼerĩna lya Tata wuwe, awasakĩre oko mbũmo syabo. 2Kandi monowa omulenge akalũa elubula owasosĩre ngʼomulenge wʼamagetsi mangi wʼekisalala, kandi asosĩre ngʼomulenge wʼomũlũmo munene. Omulenge ogo nowa abya ngʼomulenge wʼabawatĩ bʼesyonanga abakawata esyonanga syabo. 3Nabo mobahangana embere wʼekĩtũmbĩ kyʼobwami, nʼembere wʼebĩhangĩkĩrwe ebiriho bini, nʼembere wʼabakulu, neryo mobimba Olwimbo luhyaluhya, isihali mundu wangiga Olwimbo, iba nʼabandu abo amaelfu erĩgana nʼamakũmĩ ani nʼĩnĩ (144,000) abatongolĩbawa omo kihugo. 4Aba ni bandu abatayĩtsandaya haguma nʼabakalĩ, kusangwa sĩbetahĩkya. Bakakwama Ekyana kyʼEmbũlĩ ehosĩ kikaya. Aba babirigulwa omo katĩkatĩ kʼabandu ngʼabandu bʼerĩmbere busana na Nyamuhanga nʼEkyana kyʼEmbũlĩ. 5Aba sibebiha, sibali mo kahinira.

Abamalaĩka basatu

6Kandi monalangira ogundi mũlaĩka akaguluka endata omo kyanya, iniawite Engulu Yowene yʼerikota erĩkangĩrĩryayo oko bandu abĩkere omo kihugo, oko buli kĩtũnga kyʼabandu, nʼobuli kihanda, nʼobuli mũbũge, nʼoko bandu. 7Neryo mwabũga nʼomulenge munene ati, Mubahe Nyamuhanga, kandi mumupipe! Kusangwa endambĩ yʼeritswera liwe yamahĩka. Kandi mũramaye Nyamuhanga oyo wahangika olubula, nʼekihugo, nʼengetsi nʼesĩsoko syʼamagetsi!

8Neryo omũlaĩka wʼakabiri mwakwama omũlaĩka wʼerĩmbere ati, Abiriwa! Babelĩ munene abiriwa! Mwaha abandu bosĩ ebĩnyũ biwe erĩpũlĩsyabyo omo ngumbu yʼerĩsĩngĩra liwe.

9Neryo omũlaĩka wʼakasatu mwakwama abandi bamalaĩka babiri, mwabũga nʼomulenge munene ati, Omundu amaramya enyama eyo nʼesanamu eyo, nʼerĩhĩrwa kʼolusako oko mbũmo yiwe, kutse oko byala biwe, 10asyapũlya oko bĩnyũ bya Nyamuhanga, ebĩnyũ byʼerihitana liwe ebyo abĩrĩũta butsira erĩhĩrwa kwʼamagetsi omo lũtehĩ lwʼobukali buwe! Kandi asyagalĩbwa omo muliro nʼomo kirimi embere wʼabamalaĩka babũyĩrĩre, nʼembere wʼEkyana kyʼEmbũlĩ. 11Nʼomũkĩ wʼomuliro owakagalayabo akahetuka kera na kera. Kandi abakaramaya enyama eyo nʼesanamu yayo, nʼomundu oyũkahĩrawa kwʼolusako lwʼerĩna lyayo, sibeluhuka omo musibo kutse omo kiro.

12Hano ho hali erĩyĩyĩnĩa lyʼabandu ba Nyamuhanga, abakategaya ebihano bya Nyamuhanga, kandi siberegula busana na Yesu.

13Neryo monowa omulenge akalũa elubula ati, Usake uti, Erĩtsũka lino, obutseme buli nʼabaholĩre, abakahola omo mũbĩrĩ wʼOmukama! Omũlĩmũ ati,

Ega, basyahumula oko mĩbĩrĩ yabo, kandi emiganzo yʼemĩbĩrĩ yabo ikagenda haguma nabo.

Erigesa lyʼekihugo

14Kandi monalangira, neryo lebaya, habya ekĩtũ kyeru-kyeru, neryo oyo wĩkere oko kĩtũ ekyo, abya asosĩre omugala wʼomundu, iniawite embĩta yʼesyamagetsi oko mutwe wuwe, nʼomũtemĩ owatwĩre omo byala biwe. 15Kandi ogundi mũlaĩka mwalũa omo Hekalũ, iniakabirikira oyo wĩkere oko kĩtũ, nʼomulenge munene ati, Ũhĩre omũtemĩ wawe omo kihugo, ugese, kusangwa endambĩ yʼerigesa yabĩrĩhĩka, kusangwa erigesa lyʼekihugo lyamahĩka! 16Neryo oyo wabya ĩkere oko kĩtũ mwalabya omũtemĩ wuwe oko kihugo, neryo ekihugo mokyageswa.

17Neryo ogundi mũlaĩka mwalũa omo Hekalũ eyiri omo lubula, naye nibya iniawite omũtemĩ owatwĩre.

18Neryo ogundi mũlaĩka, oyuwite ehamũlĩ oko muliro, mwalũa omo kiherero. Naye mwabirikira omũlaĩka oyuwite omũtemĩ owatwĩre, nʼomulenge munene ati, Uteme omo mũtemĩ wawe owatwĩre, ugese ebĩgũma byʼebĩnyũ byʼekihugo, kusangwa ebĩgũma byʼebĩnyũ byerĩre. 19Neryo omũlaĩka mwalabya omũtemĩ wuwe omo kihugo, mwakuma-kuma ebĩgũma byʼebĩnyũ byʼekihugo, neryo mwagusabyo omo muhe munene wʼerihitana lya Nyamuhanga. 20Neryo ebĩgũma mobyakamirwa omo muhe eyĩhya oko mũyĩ, neryo musasi mwalũa omo muhe wʼebĩnyũ, erĩhĩka oko mikoba yʼesyosabayĩrĩ oko bilometere magana asatu nʼebindi.

Currently Selected:

Erĩbĩsũlĩrwa 14: KB80

Highlight

Copy

Compare