Matayo 14
14
Oluholo lwa Yoane Mũbatĩsya
(Mk 6.14-29; Lk 9.7-9)
1Oko mugulu oyo Herode, omũtabali wʼeGalĩlaya, mwowa engulu ya Yesu. 2Neryo Herode mwabwira abakulu buwe ati, Oyũ ni Yoane Mũbatĩsya. Abĩrĩlũbũka oko baholĩ; ekyo kyalekĩre amaka wʼebitiko-tiko aya iniakoleka omwisi wuwe.
3Kusangwa Herode iniabirihamba Yoane, nʼerimuboha, nʼerĩmũhĩra omo mũlĩkĩ. Akola atya busana na Herodĩa, muka mugala wabo ye Fĩlĩpo. 4Kusangwa Yoane abya akabwira Herode ati, Emigambo ĩkakũganaya erĩĩmya Herodĩa. 5Kandi Herode abya anzĩre erĩĩta Yoane, nĩkwa mubaha abandu, kusangwa abandu babya bakaganza Yoane nga mũmĩnyererĩ.
6Nĩkwa omugulu ekiro kyʼeriibuka eributwa lya Herode kyahĩka, namwali wa Herodĩa mwasatira omo katĩkatĩ kabo, neryo mwatsemesya Herode. 7Neryo Herode mwalaga omwana-muto oyo nʼerĩlahĩrya ati akandimuha ekindu ekyo akandimutswa. 8Neryo koyo wʼomwanamuto oyo mwamuhana abũge ati, Umba hano hʼoko kibindi, omutwe wa Yoane Mũbatĩsya! 9Neryo omwami Herode mwakwa engitsi, nĩkwa busana nʼerĩlahĩrya liwe, kandi busana nʼabagenĩ buwe ababya okwʼirya eryo, mwahamula ati omwana-muto oyo ahabawe omutwe wa Yoane. 10Neryo mwatuma omundu erĩyatwa omutwe wa Yoane omo nyũmba yʼomũlĩkĩ. 11Neryo omutwe wa Yoane mwaletwa oko kibindi, mwahabwa oko mwana-muto oyo, naye mwaleterago nyĩnya wuwe. 12Neryo abiga ba Yoane mobasa, mobatwala ekĩnda kya Yoane, mobatakyo; neryo mobayabwira Yesu.
Yesu akalĩsaya abandu elfu ĩtanu (5,000)
(Mk 6.30-44; Lk 9.10-17; Yn 6.1-14)
13Nĩkwa omugulu Yesu owa omwatsi oyo, mwalũaho omo bwato, mwaya ĩyowene ehandi ahate bandu. Neryo omugulu esyondeko syowa ekyo, mosyalũa omo mĩyĩ, mobamukwama omo bisando. 14Neryo omugulu Yesu alũa omo bwato, mwalangira endeko nene, mwakwĩrabo bũlĩge, neryo mwalamya abakonĩ babo.
15Neryo bwabere bwasonda eribya ĩgolo-golo, abiga buwe mobamũhĩkako, bati, Eno ni mbwarara, kandi bwamahumbera; Ulagane nʼabandu bagende omo mĩyĩ nʼeriyigulira kalyo. 16Nĩkwa Yesu mwabwirabo ati, Sibatolere erigenda; muhebo ebyʼerirya! 17Neryo abiga mobabwira Yesu bati, Tuwite hano hʼuku mandu atanu masa, nʼamahere abiri. 18Yesu mwabũga ati, Munyireterebyo hano. 19Nĩkwa Yesu mwahamula esyondeko ati bĩkale ahisi oko biti; neryo mwĩmya amandu atanu ayo nʼamahere abiri, mwalalamira elubula, mwaha ewasĩngya uku Nyamuhanga. Neryo mwatsũtsanga amandu, mwahago abiga, nʼabiga mobahago oko bandu ababya omo ndeko. 20Abosĩ mobalya, mobũgũta. Neryo mobasongya ebitahangukira ebyasaka, mobũsũlya ebitiri ĩkũmĩ na bibiri. 21Neryo abalume abalyabyo babya nga elfu ĩtanu (5,000), abakalĩ nʼabana bataganzĩre kubo.
Yesu akatandayira oko ngetsi
(Mk 6.45-52; Yn 6.15-21)
22Neryo-neryo mwahatikana abiga ati bingire omo bwato, batsũke embere siwe eyisirya wʼengetsi, omugulu abya akalagana nʼesyondeko. 23Neryo abere abilagana nʼesyondeko, mwaya oko kitwa ĩyowene eriyasaba. Neryo bwabere bwabya ĩgolo-golo, Yesu mwabyayo ĩyowene. 24Nĩkwa obwato bwabya omo ngetsi mo hali, nʼebisunda ĩbĩkayĩswĩraya oko bwato; kusangwa erihunga lyabya likabuhirira embere syabo. 25Neryo omo kĩsĩsĩmũko kyʼakani kyʼekiro, Yesu mwahĩka kubo, iniakatandayira oko ngetsi. 26Nĩkwa omugulu abiga bamulangira iniakatandayira oko magetsi, mobubaha, bati, Nĩ kĩrĩmũ! Neryo mobalaka nʼobuba. 27Nĩkwa neryo-neryo Yesu mwabũga nabo ati, Mũsĩkaye emitima! Nĩna ngye; simubahe. 28Neryo Petero mwamũsũbĩrya ati, Mukama, wamabya inina we, Unyihamule nyiye aho uli oko magetsi. 29Neryo Yesu mwabũga ati, Wase! Neryo Petero mwalũa omo bwato, akatandayira oko magetsi erĩlolya ahali Yesu. 30Nĩkwa omugulu Petero alangira erihunga, mubaha, nʼerĩtsũka eritobera mwalaka ati, Mukama, ũnyĩlamaye. 31Neryoneryo Yesu mwasumba ebyala biwe mwamuhamba, mwamubwira ati, Uwe wʼerĩkĩrĩrya lĩke, busana nakĩ uliatika-tika kwehĩ? 32Neryo omugulu bahĩka omo bwato, erihunga molyũmbya. 33Neryo ababya omo bwato mobaramya Yesu, bati, Kwenene uli Mugala wa Nyamuhanga!
Yesu akalamaya abakonĩ eGenezaretĩ
(Mk 6.53-56)
34Neryo babere babisoka engetsi, mobahĩka oko kitaka kyʼeGenezaretĩ. 35Nʼomugulu abandu bʼeyo bamuminya, mobatuma omo kihugo kyosĩ ekyabya hakũhĩ nʼeyo, mobaletera Yesu yʼabakonĩ bosĩ. 36Neryo mobalemba-lemba Yesu bati, batũle oko mũsĩke musa wʼolukimba luwe; nʼabosĩ abatũla kulo, mobalamĩbwa.
Currently Selected:
Matayo 14: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.