Matayo 13
13
Omũsyo wʼomũbĩbĩ wʼembuto
(Mk 4.1-9; Lk 8.4-8)
1Oko kiro ekyo Yesu mwalũa omo nyũmba mwaya oko mũsĩke wʼengetsi, mwĩkalayo. 2Esyondeko esyahĩndana ahali Yesu syabya nene kutsibu, kyaleka iniingira omo bwato nʼerĩĩkala mubo. Nʼesyondeko syabya simene oko mũsĩke wʼengetsi. 3Neryo Yesu mwakangĩrĩryasyo omo mĩsyo, ati,
Lebaya, omũbĩbĩ mwayabiba embuto. 4Nʼomugulu abiba, esindi mbuto mosyatogera oko mũsĩke wʼenzira, nʼesyonyonyũ mosyasa mosyatomengerasyo.
5Nʼesindi mbuto mosyatogera oko kitaka kyʼamabwe, ahate mukungu mungi. Esyombuto esyo mosyalasa lũba, kusangwa sihabya mutaka mungi. 6Neryo eryuba molyakola, molyahĩsyasyo, neryo kusangwa emĩrĩhĩ yabya mike-mike, mosyuma. 7Esindi mbuto mosyatogera omo mahwa, nʼamahwa ayo mwalasa, mwakũsyasyo. 8Nʼesindi mbuto mosyatogera omo kitaka kyowene, mosyasohola, esindi erĩgana, nʼesindi amakũmĩ ndatu, nʼesindi amakũmĩ asatu. 9Neryo Yesu mwabũga ati, Oyuwite amatwĩ, owe!
Enzumwa yʼemĩsyo
(Mk 4.10-12; Lk 8.9-10)
10Neryo abiga mobasyabũlya Yesu bati, Busana nakĩ ũkabũga nabo omo mĩsyo kwehĩ? 11Neryo Yesu mwasũbĩryabo ati, Ĩnywe mwabirihabwa eriminya erĩkũmbo lyʼobwami bwʼelubula, nĩkwa abandi sibetahabwa eriminyalyo. 12Kusangwa oyuwite asyahabwa ebindi, asyabya nʼebingi; nĩkwa oyutawite, asyasagulwa ebyo awite. 13Kikaleka inabwirabo omo mĩsyo, kusangwa nomo bakalangira sibelangira, nomo bakowa Sĩbalĩowa, kutse sibeminya. 14Kandi busana nabo eriminyerera lya Ĩsaya likabererera, liti,
Mwasyasiba mũkowa, nĩkwa simwendisyaminya;
Kandi mwasyasiba mũkalebya, nĩkwa simwendisyalangira;
15Kusangwa emitima yʼabandu aba yabiribya mʼobũtowa,
Kandi Sĩbalĩowa ndeke omo matwĩ wabo,
Kandi babĩrĩrĩba ameso wabo;
Bakasyalangira omo meso wabo,
Nʼerĩowa omo matwĩ wabo,
Nʼeriminya omo mitima yabo nʼeriswanyibindukira,
Nyamuhanga atya, Nage ĩnalamyabo.
16Nĩkwa obutseme buli oko meso wenyũ, kusangwa mukalangira, nʼobutseme buli oko matwĩ wenyũ, kusangwa mũkowa. 17Kusangwa kwenene ngababwira nyiti,
Abamĩnyererĩ bangi nʼabandu batunganene bangi mobanza erilangira oko ebyo mukalangira, nĩkwa mobatatoka erilangirabyo; nʼerĩowa ebyo mũkowa, mobatowabyo.
Yesu akakũmbũla Omũsyo wʼomũbĩbĩ
(Mk 4.13-20; Lk 8.11-15)
18Neryo mowe omũsyo wʼomũbĩbĩ. 19Omugulu omundu akowa ekĩnywa kyʼobwami, isialiminyakyo, ali ngʼembuto eyatogera oko mũsĩke wʼenzira. Omubi akasa ĩnĩapũra ekyabibawa omo mutima wuwe. 20Embuto e yabibawa omo kitaka kyʼamabwe yo mundu oyũkowa ekĩnywa, neryo-neryo akangirirakyo nʼobutseme. 21Nĩkwa ekĩnywa ekyo sikiribya omwisi wuwe. Embuto eyabibawa omo kitaka byamo katambĩ kake. Neryo omugulu obũlĩge, kutse erĩendererya bĩkahĩka busana nʼekĩnywa ekyo, akatswa lũba. 22Nʼembuto eyabibawa omo mahwa yo mundu oyũkowa ekĩnywa, nʼamagalĩ wʼekihugo, nʼamatebo wʼebindu bĩkakũsaya ekĩnywa, ikitasohola. 23Nʼembuto eyabibawa omo kitaka kyowene, yo mundu oyũkowa ekĩnywa akaminyakyo; yo yũkeraya embuto eyo, eyindi mbuto ĩgana, eyindi amakũmĩ ndatu, nʼeyindi amakũmĩ asatu.
Omũsyo wʼebiti
24Kandi Yesu mwabwirabo ogundi mũsyo ati, Obwami bwʼelubula bwangalĩngĩrĩranĩbwa nʼomundu oyo wabiba embuto yowene omwʼirima liwe. 25Nĩkwa omugulu abandu babyato, enzĩgũ yiwe moyasa, moyabiba ebiti omo katĩkatĩ kʼengano, neryo moyagenda. 26Nĩkwa omugulu omugera ahuluka nʼerisohola, ebiti ebyo nabyo mobyahuluka. 27Neryo abagombe bʼomũlĩmĩ oyo mobasa mobamubwira bati, Mukama, mutabiba embuto yowene omwʼirima lyawe kwehĩ? Neryo ebiti ebyo byalũahi kwehĩ? 28Nĩkwa mwabwirabo ati, Enzĩgũ yabirikola ekyo! Neryo abakobe mobamũbũlya bati, Neryo wanzĩre itwakulangabyo kwehĩ? 29Nĩkwa Omwenye eririma oyo mwabũga ati, Iyihi; kusangwa omugulu mukakulanga ebiti, mũkasyakũlĩranĩabyo nʼengano. 30Muleke engano nʼebiti bilase haguma erĩhĩka oko mugulu wʼerigesa. Neryo oko mugulu wʼerigesa nasyabwira abagesĩ nyiti, Mũtsũke erikuma-kuma ebiti, musengebyo mo mũlo-mũlo erĩlũsyabyo; nĩkwa mũhĩre engano yʼomo kigona kyage.
Omũsyo wʼembuto yʼeharadalĩ
(Mk 4.30-32; Lk 13.18-19)
31Neryo Yesu mwabwirabo ogundi mũsyo ati, Obwami bwʼelubula busosene nʼembuto yʼeharadalĩ eyo mundu ĩmaya nʼeribibayo omwʼirima liwe. 32Embuto eyĩ ni nge kwilaba esyombuto syosĩ, nĩkwa omugulu kakalasa, ni kanene kwilaba esyombuto syosĩ syʼeririma, kandi ikabya muti, nʼesyonyonyũ syʼomo kyanya sikasa nʼerĩhĩmba esyonyutu syasyo omo mitahi yago.
Omũsyo wʼekĩhamya
(Lk 13.20-21)
33Yesu mwatwĩrabo ogundi mũsyo ati, Obwami bwʼelubula bũsosĩre ekĩhamya. Omũkalĩ mwĩmyakyo, mwabĩsakyo omo hĩrengĩ hisatu hyʼeyĩsyano, nʼeyosĩ moyahama.
Erĩkangĩrĩrya lya Yesu omo mĩsyo
(Mk 4.33-34)
34Nĩkwa Yesu mwabũga oko syondeko, mwaya omo nyũmba. Neryo abiga buwe mobamũhĩkako bati, Ũtũkũmbũ: 35Yesu mwakola atya erĩberererya ebyabũgawa nʼomũmĩnyererĩ ati,
Nasyakũmbũla obuno bwage omo mĩsyo;
Nasyabũga emyatsi eyabĩsawa okwʼĩtsũka lyʼerihangikwa lyʼekihugo.
Yesu akakũmbũla omũsyo wʼebiti
36Neryo Yesu mwasĩganĩa esyondeko, mwaya omo nyũmba. Neryo abiga buwe mobamũhĩkako bati, Ũtũkũmbũlĩre omũsyo wʼebiti omwʼirima. 37Neryo Yesu mwasũbĩryabo ati, Oyukabiba embuto yowene ni Mugala wʼomundu. 38Eririma kye kihugo; nʼembuto yowene ba bana bʼobwami; ebiti ba bana bʼOmubi. 39Enzigũ eyabiba ebiti ebyo nĩ Satanĩ. Nʼomugulu wʼerigesa ye ndũlĩ yʼekihugo, nʼabagesĩ ba bamalaĩka. 40Neryo ngoko ebiti bikakuma-kumawa nʼerĩhĩsĩrĩryabyo omo muliro, ko bikandisyabya bitya okwʼihwererera lyʼemigulu. 41Omugala wʼomundu asyatuma abamalaĩka buwe, basyakuma-kuma nʼerĩlũsya ebyosĩ ebikaleka abandu ibakola ebibi, nʼabakola-nabi bosĩ omo Bwami buwe, 42asyagusabyo omo seke-seke yʼomuliro, eyo abandu basyalira nʼerikeregeta ameno wabo. 43Oko mugulu oyo abatunganene omo meso wa Nyamuhanga basyakangabasanĩa ngʼeryuba omo Bwami bwa Tata wabo. Oyuwite amatwĩ owe!
Omũsyo wʼebindu bĩbĩsamĩre
44Obwami bwʼelubula bulingene nʼebindu ebĩbĩsamĩre omwʼirima. Omundu mwabana ebindu ebyo neryo mwabĩsabyo Busana nʼobutseme, omundu oyo akayagũlaya ebyosĩ ebyo awite, neryo akagula eririma eryo.
Omũsyo wʼelulu
45Kandi, Obwami bwʼelubula bulingene nʼomũtũndĩ oyukasonda-sonda esyolulu nyibuya. 46Neryo abere abibana elulu nguma yʼobũgũlĩ bunene, mwayagũlya ebyosĩ ebyo abya awite neryo mwagula elulu eyo.
Omũsyo wʼobutaha-taha
47Kandi Obwami bwʼelubula bulingene nʼekĩsohĩ ekyagusawa omo ngetsi, mokyahĩndanĩa emĩsĩndo yosĩ yʼamahere. 48Omugulu ekĩsohĩ kyũsũla, abasohĩ mobakurirakyo oko mũsĩke, neryo mobĩkala ahisi, mobasombolera amahere owene gʼomo nyungu, nĩkwa mobagusa amahere awatowene. 49Ko likandisyabya litya oko ndũlĩ yʼekihugo. Abamalaĩka basyahuluka ibasombola abandu babi bʼomo katĩkatĩ kʼabatunganene. 50Basyagusabo omo seke-seke yʼomuliro. Eyo abandu basyalira nʼerikeregeta ameno wabo.
Ebindu bihya-bihya nʼebya kera
51Neryo Yesu mwabũlyabo ati, Mwabiriminya emyatsi yosĩ eyĩ kwehĩ? Nabo mobamubwira bati, Ega. 52Neryo Yesu mwabwirabo ati, Neryo obuli mũkangĩrĩrya wʼEmigambo oyo wabiribya mwiga wʼobwami bwʼelubula ali ngʼomwenye nyũmba, oyũkahũlũkaya ebindu ebyo abika, ebindu bihya-bihya nʼebindu bikulu-kulu.
Yesu akaponawa eNazaretĩ
(Mk 6.1-6; Lk 4.16-30)
53Omugulu Yesu abuga erĩtwa emĩsyo eyĩ, mwalũayo. 54Neryo Yesu abere ahĩka eka wuwe, mwakangĩrĩryabo omo nyũmba yabo yʼerĩhĩndanamo. Neryo abandu mobasweka bati, Omundu oyũ alũsaya amenge aya go hahi kwehĩ? Kandi mwalũsya ebitiko-tiko ebĩ byo hahi kwehĩ? 55Oyũ si mugala wʼomũbatsĩ wʼesyombago kwehĩ? Nyĩnya wuwe siakahulawa mo Marĩa, nʼabagala babo si Yakobo, na Yosefũ, na Sĩmonĩ, na Yũda kwehĩ? 56Nʼabali babo, abosĩ sibali haguma netu kwehĩ? Ko mundu oyũ amalũsya emyatsi yosĩ eyĩ yo hahi kwehĩ? 57Neryo mobamupona batya. Nĩkwa Yesu mwabwirabo ati, Omũmĩnyererĩ sialibula erĩsĩkĩbwa, imo nʼomo kihugo kiwe nʼomo kĩtũnga kiwe. 58Neryo Yesu mwatakolayo ebitiko-tiko bingi busana nʼeritendĩkĩrĩrya lyabo.
Currently Selected:
Matayo 13: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.