Matayo 12
12
Omwatsi wʼeSabato
(Mk 2.23-28; Lk 6.1-5)
1Oko mugulu oyo Yesu abya akalaba omo malima wʼengano oko kiro kyʼeSabato. Neryo abiga buwe babya bakwĩre enzala, neryo mobatsũka erĩtwa amakũndĩ wʼengano nʼeriryago. 2Nĩkwa omugulu Abafarĩsayo balangira ekyo, mobabwira Yesu bati, Lebaya, abiga bawe bakakola ebyo Migambo ĩkaganaya erikola omo Sabato! 3Nĩkwa Yesu mwabwirabo ati, Simwetasoma ekyo Dawĩdĩ akola, omugulu akwa enzala, iye nʼabandu buwe kwehĩ? 4Ngoko ingira omo nyũmba ya Nyamuhanga, kandi iye nʼabandu buwe mobalya amandu awahigulawa busana na Nyamuhanga. Nĩkwa Emigambo ĩkaganaya abandu erirya kugo, nĩkwa ba nʼabahererĩ basa. 5Kutse simulitasoma omo Migambo ya Musa kwehĩ, ngoko abahererĩ omo Hekalũ oko kiro kyʼeSabato, bakaketa omugambo wʼeSabato, isibali na musango. 6Nĩkwa ngababwira nyiti, Hano hali oyũlabĩre eHekalũ. 7Kumbe mwabya mwasĩ amasako aya awakabũga ati, Nyanzĩre eriganyira, sĩnyanzĩre amahere wʼesyonyama, kumbe simwangatswera abandu abate na musango. 8Kusangwa Omugala wʼomundu ni Mukama wʼeSabato.
Omundu wʼebyala bĩlehemĩre
(Mk 3.1-6; Lk 6.6-11)
9Neryo Yesu mwalũaho, mwaya omo nyũmba yabo yʼerĩhĩndanamo. 10Neryo lebaya, habya omundu wʼebyala bĩlehemĩre. Kandi habya abandu ababũlaya Yesu bati, Linatolere omo Migambo erĩlamya omundu omo kiro kyʼeSabato kwehĩ? Kusangwa basonda erĩhandĩkĩrĩrya Yesu. 11Neryo Yesu mwabwirabo ati, Ko ni mundu wahi omo katĩkatĩ kenyũ oyuwite embũlĩ nguma yamatogera omo buhya omo kiro kyʼeSabato, isyendisyahambayo nʼerisumbirayo eyĩhya kwehĩ? 12Omundu alabĩre enzwere yʼembũlĩ yo kutsibu kwʼaho! Neryo kitolere omo Migambo erikola ebibuya omo kiro kyʼeSabato. 13Neryo Yesu mwabwira omundu oyo ati, Lambula ebyala byawe! Naye mwalambulabyo, nabyo mobyasuba, nʼerilama ndeke ngʼebindi byala. 14Nĩkwa Abafarĩsayo mobahuluka, mobaya mbĩta nga bangĩta Yesu yo bati.
Omugombe wa Nyamuhanga oyo wayisogawa
15Neryo omugulu Yesu aminyakyo, mwalũa eyo. Nĩkwa abandu bangi mobamukwama, naye mwalamya abosĩ. 16Kandi mwahanabo ati sĩbamũkũmayĩraye, 17busana nʼerĩberererya ebyo mũmĩnyererĩ Ĩsaya abũga ati,
18Lebaya, Omugombe wage oyo nabiriyisoga;
Omwanze wage, omutima wage amatsemesĩbwa busana naye.
Nasyamũhĩra kʼOmũlĩmũ wage,
Naye asyakanganĩa erĩbanza oko bandu bosĩ.
19Siendisyanegena, kutse erĩbũya lukanda;
Kutse siendisyasumba omulenge wuwe omo syombalu.
20Siendĩsyatwa oluseke lũbũnĩkĩre,
Kandi siendisyahũmberya embũmba eyĩkatũmba.
Erĩhĩka aho asyalekera erĩbanza ĩryakĩnda.
21Nʼomo lĩna liwe Ebihanda byasyabana amaha.
Yesu na Belzebũlĩ
(Mk 3.20-30; Lk 11.14-23)
22Neryo abandu mobaletera Yesu yʼomundu oyuli kwʼembĩnga kandi abya ndĩmatĩme nʼemũmũ. Neryo Yesu mwalamya omundu oyo nʼemũmũ eyo moyatoka erĩbũga nʼerilangira. 23Nʼesyondeko syosĩ mosyasweka. Kandi mobabũlya bati, Omundu oyo anganabya mugala wa Dawĩdĩ kwehĩ? 24Nĩkwa omugulu Abafarĩsayo bowa, mobabũga bati, Omundu oyo akahigira esyombĩnga syʼeyĩhya kusangwa Belzebũlĩ omũtabalĩ wʼesyombĩnga yukamuha maka wʼerihigasyo. 25Yesu mwaminya amalengekanĩa wabo, neryo mwabwirabo ati, Obuli bwami obũkayĩrwanaya bukabya kĩhũma. Nʼobuli mũyĩ kutse nyũmba ebĩkayĩrwanaya sibyendisyahangana. 26Kandi Satanĩ yamahiga Satanĩ, iyamayĩrwanĩa, neryo obwami bwayo ibwasyahangana buti kwehĩ!? 27Nage namabya ngahigira esyombĩnga syʼeyĩhya omo maka wa Belzebũlĩ, abana benyũ bakahigirasyo eyĩhya omo maka wandi kwehĩ? Neryo abana benyũ basyabya batswerĩ benyũ. 28Nĩkwa ĩngye namahiga esyombĩnga omo maka wʼOmũlĩmũ wa Nyamuhanga, kundi Obwami bwa Nyamuhanga bwabĩrĩbahĩkako.
29Kutse omundu angatoka eritula enyũmba yʼomundu wʼamaka yo ati, nʼerĩhũnga ebindu biwe, amatindatsũka eriboha omundu wʼamaka oyo kwehĩ? Neryo iniatoka erĩhũnga enyũmba yiwe.
30Oyute haguma nage, ĩnĩ nzĩgũ yage; nʼoyutekuma-kuma haguma nage, akapanza-panza. 31Neryo ngababwira nyiti abandu bangabuyira obuli bibi nʼobuli bĩtsũmĩ, nĩkwa oyukatsuma Omũlĩmũ Abũyĩrĩre siendisyabuyirwa. 32Omundundi oyo wasyabũga ekĩnywa kyʼobũyĩgũ oko Mugala wʼomundu asyabuyirwa, nĩkwa Omundundi oyo wasyabũga ekĩnywa kyʼobũyĩgũ oko Mũlĩmũ Abũyĩrĩre, siendisyabuyirwa oko mugulu ono, kutse oko mugulu owakandisyasa.
Omuti nʼebĩgũma byago
(Lk 6.43-45)
33Muyire omuti mo muti mubuya, nʼebĩgũma byago mo bibuya; kutse muyire omuti mo mubi nʼebĩgũma byago mo bibi; kusangwa omuti akaminyikala busana nʼebĩgũma byago. 34Ĩnywe bana bʼesyonzoka! Mwangatoka muti kwehĩ erĩbũga ebĩnywa bibuya imune babi kwehĩ? Kusangwa obuno bũkabũga ebyoswĩre omo mutima. 35Omundu mubuya akahũlũkaya emyatsi mibuya eyĩkalũa omo kigona kiwe kyʼemyatsi mibuya, nʼomundu mubi akahũlũkaya emyatsi mibi eyĩkalũa omo kigona kiwe kyʼemyatsi mibi.
36Kandi ngabũga nenyũ nyiti, Oko kiro kyʼeritswera abandu basyakanganĩa obuli kĩnywa kitya-kitya ekyo bakabũga. 37Kusangwa busana nʼebĩnywa byawe wasyasĩngana, kandi busana nʼebĩnywa byawe wasyatswerwa.
Erĩbũlya ekitiko-tiko
(Mk 8.11-12; Lk 11.29-32)
38Neryo abandi bʼoko bakangĩrĩrya bʼemigambo nʼAbafarĩsayo, mobasũbĩrya Yesu bati, Mũkangĩrĩrya, twanzĩre erilangira kʼukakola ekitiko-tiko. 39Nĩkwa Yesu mwasũbĩryabo ati, Abandu ba sesene ni babi, kandi sibawite Nyamuhanga, bakasonda-sonda ekitiko-tiko; nĩkwa sibendihabwa ekitiko-tiko, kye nʼekitikotiko kyʼomũmĩnyererĩ Yona. 40Kusangwa ngoko Yona abya omo nda yʼenyama nene yʼomo ngetsi emisibo ĩsatu nʼebiro bisatu, na litya Omugala wʼomundu asyabya omo kitaka emisibo isatu nʼebiro bisatu. 41Oko kiro kyʼeritswera, abandu bʼeNĩnawe basyahangana haguma nʼabandu bʼolulengo luno nʼerĩsĩngabo, kusangwa mobabindula emitima erireka ebibi okwʼĩtũlago lya Yona; neryo lebaya, oyũlengĩre Yona ane hano. 42Oko Kiro Kyʼeritswera, Omwami wʼobũkalĩ wʼeLutambi lwʼeYĩkwa asyahangana haguma nʼabandu bʼolulengo luno, nʼerĩsĩngabo kusangwa alũa oko ndũlĩ syʼekihugo erĩowa amenge wa Solomono; neryo lebaya, oyũlengĩre Solomono ane hano!
Erisubula lyʼekĩrĩmũ kibi
(Lk 11.24-26)
43Omugulu ekĩrĩmũ kibi kĩkalũa omo mundu, kikalendera ikyalaba ahate magetsi, kikasonda-sonda ahʼeriluhukira, kikabulaho. 44Neryo kikayibwira kiti, Ngandisuba omo nyũmba yage eyo nasĩga; neryo omugulu kĩkahĩkamo, kĩkeya enyũmba eyo iri busa ĩnĩnabĩrĩrye, ĩnĩnakomĩre. 45Neryo kikahuluka, ikyaleta ebindi bĩrĩmũ birinda bibi kwilabakyo, neryo ibyingiramo; nʼendũlĩ yʼomundu oyo ikabya nyibi kwilaba erĩmbere. Ko bikandisyabya bitya oko bandu babi bʼomugulu ono.
Nyĩnya wa Yesu nʼabagala babo
(Mk 3.31-35; Lk 8.19-21)
46Yesu abere akĩnabũga nʼesyondeko, nyĩnya, nʼabagala babo mobahĩka. Mobahangana eyĩhya ibakasonda-sonda erĩbũga naye. 47Neryo omundu muguma mwabwira Yesu ati, Lebaya, koyo wawe nʼabagala benyũ banimene eyĩhya, bakasonda-sonda erĩkanĩa nawe. 48Yesu mwasũbĩrya ati, Koyo nindi, nʼabagala betu ni bahi kwehĩ? 49Neryo mwakanganĩa abiga buwe ati, Lebaya, koyo wage nʼabagala betu! 50Kusangwa omundu oyo wasyakola erisonda lya Tata wage oyuli elubula, yo mugala wetu, na mwali wetu, na koyo.
Currently Selected:
Matayo 12: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.