Enzũko 37

Erilota lya Yosefũ

1Nĩkwa Yakobo mwĩkala omo kihugo ekyo tata wuwe abungiramo, ekihugo kyʼeKanana. 2Esĩ ni ndengo sya Yakobo.

Yosefũ abere abibya wʼemyaka ĩkũmĩ nʼeyirinda, abya akalĩsya ekihangulo haguma nʼabagala babo, abya mũlwana haguma nʼabagala ba Bĩlĩha, na haguma nʼabagala ba Sĩlpa, abakalĩ ba tata wuwe; kandi Yosefũ mwabya akatũla emyatsi mibi yabo uku tata wabo. 3Nĩkwa Ĩsraelĩ mwanza Yosefũ kwilaba bagala babo bosĩ, kusangwa abya ndũngo yiwe. Neryo mwamulandira ekanzu nyiri eyʼemirera. 4Neryo abagala babo mobalangira ngoko tata wabo amwanzĩre kwilaba bagala babo bosĩ, mobamũkwa obusu, mobatatoka erĩkanĩa naye nʼobuholo.

5Na Yosefũ mwalota esyonzolĩ, mwabikulirasyo abagala babo. Neryo mobamũkwa kwʼekĩnĩga kwilaba. 6Neryo mwabũga nabo ati, Ngababũlaya, muhulikirire esyonzolĩ indialota. 7Lebaya, twabya tukasenga emiganda omwʼirima, neryo lebaya, omuganda wage mwahangana mwasingilila. Neryo emiganda yenyũ moyatĩmba nʼerĩũnama embere syʼomuganda wage. 8Nʼabagala babo mobabũga naye bati, Kwenene wasyatutabalako kwehĩ? Kutse kwenene Wasyabya mukama wetu kwehĩ? Mobamũkwa kwʼekĩnĩga kwilaba busana nʼerilota liwe nʼebĩnywa biwe. 9Neryo mwalota esindi nzolĩ, mwabikulirasyo bagala babo, mwabũga ati, Lebaya, nabirilota esindi nzolĩ. Eryuba nʼomukera, nʼesyongũnũnũ erĩkũmĩ nʼenguma mosyũnama embere syage. 10Kandi mwayabikulirasyo tata wuwe, nʼabagala babo. Tata wuwe mwamukunga, mwabũga naye ati, Nĩ nzolĩkĩ esyo wabirilota kwehĩ? Ĩngye na koyo wawe nʼabagala benyũ kwenene twasyasa ĩtũnama, embere syawe oko kitaka kwehĩ? 11Nʼabagala babo mobamutsura nĩkwa tata wuwe mwabika ebĩnywa ebĩ byʼomo mutima wuwe.

12Abagala babo mobayalĩsĩrya esyombũlĩ sya tata wabo eSekemũ. 13Na Ĩsraelĩ mwabwira Yosefũ ati, Abagala benyũ sĩbelĩsĩraya esyombũlĩ syʼeSekemũ kwehĩ? Wase, ngandikutuma eyo bali. Naye mwabũga naye ati, Nandi hano. 14Neryo mwamubwira ati, Ugende lino ũyalebaye bagala benyũ nga banabũkĩre, nʼesyombũlĩ nga sine ndeke, neryo iwandetera engulu yabo. Neryo mwamutuma oko musya wʼeHebronĩ, mwahĩka nʼeSekemũ. 15Neryo omundu muguma mwamweya eyo, akaganga-ganga omolĩ. Omundu oyo mwamũbũlya ati, Ukasondakĩ kwehĩ? 16Neryo Yosefũ mwabũga ati, Ngakũbũlaya umbwire aho bakalĩsĩraya esyombũlĩ. 17Omundu oyo mwabũga ati, Babĩrĩlũa hano, kusangwa monowa bakabũga bati, Tugende eDotana. Neryo Yosefũ mwakwamirira bagala babo, mweyabo eDotana.

18Neryo mobamulangira hali, nʼembere wʼerĩhĩka hakũhĩ nabo, mobaya embĩta yʼerĩmwĩta. 19Neryo mobabwirana bati, Lebaya, omukama wʼesyonzolĩ amasa. 20Neryo mwase, tũmwĩte, tumuguse omo buhya buguma, neryo twasyabũga tuti, Enyama nyibi yabirimulya. Neryo twasyalebya esyonzolĩ siwe nga syasyabya siti. 21Neryo Rũbenĩ mowa, mwamũlamya omo byala byabo, mwabũga ati, Sĩtũmwĩte. 22Na Rũbenĩ mwabwirabo ati, Sĩmũte omusasi, mumuguse omo buhya obũ obuli omo mbwarara, nĩkwa sĩmũmũhĩre kwʼebyala. Iniatoka erĩmũbalya omo byala byabo, nʼerĩmũsũbya uku tata wuwe. 23Enyũma wʼaho Yosefũ abere ahĩka uku bagala babo, mobamũlũsya kwʼekanzu yiwe, ekanzu yʼemirera eyo abya ambite. 24Mobamuhamba mobamugusa omo buhya, nʼobuhya obo sibwabya mo magetsi.

25Neryo mobĩkala ahisi erirya akalyo. Neryo mobasumba ameso wabo mobalangira omulondo wʼAbaĩsmaelĩ bakalũa eGĩleadĩ, haguma nʼesyongamia syabo ĩbahekĩre amanũkato, na zerĩ, nʼamanemane, eryandagalĩryabyo eMĩsĩrĩ. 26Neryo Yũda mwabũga nʼabagala babo ati, Nĩ ndũndĩ yahi ũkwʼĩtwe erĩĩta mugala wetu nʼerĩbĩsa omusasi wuwe kwehĩ? 27Mwase tũmũgũaye oko Baĩsmaelĩ, neryo ebyala byetu ibitabya ukwʼiye. Kusangwa ni mugala wetu, nʼomubiri wetu. Nʼabagala babo mobalĩga. 28Neryo mohalaba Abanya Mĩdĩanĩ, abatũndĩ. Mobasumba Yosefũ erĩmũlũsya omo buhya, mobagũlya Yosefũ oko Baĩsmaelĩ busana nʼebihasa byʼekĩtsĩpa makũmĩ abiri. Ko batwala Yosefũ batya eMĩsĩrĩ.

Obũlĩge bwa Yakobo

29Neryo Rũbenĩ mwasuba oko buhya obo, nĩkwa Yosefũ isiali omo buhya. Neryo mwatulanga esyongimba siwe. 30Mwasuba eyiri bagala babo, mwabũga ati, Omwana siakiriyo. Nage, nasyayahi kwehĩ? 31Neryo mobĩmya ekanzu ya Yosefũ, mobĩta embaya, mobĩkĩrya ekanzu yʼomo musasi. 32Neryo mobaheka ekanzu yʼemirera, mobaletayo uku tata wabo, mobabũga bati, Twamabana eyĩ. Uminye lino nga ni kanzu yʼomugala wawe kutse iyihi. 33Naye mwaminyererayo, mwabũga ati, Ye kanzu yʼomugala wage. Enyama nyibi yabirimulya. Kwenene Yosefũ abiritulangwa mo bihande-bihande. 34Neryo Yakobo mwatulanga esyongimba siwe, mwahĩra omulemba gʼomo mbindi yiwe, mwalira mugala wuwe ebiro bingi. 35Nʼabagala biwe bosĩ nʼabali buwe bosĩ mobayamũ kĩranĩa. Nĩkwa mwagana erĩsĩbĩkĩbwa, mwabũga ati, Ngandisyandagalira eKũlĩmũ, inandimulira omugala wage. Na tata wuwe mwasekemũka busana naye. 36NʼAbamĩdĩanĩ mobamũ gũlya eMĩsĩrĩ uku Potĩfarĩ, omũtabalĩ wa Farao, omukulu wʼabasĩrĩkanĩ abakamũtegaya.

Currently Selected:

Enzũko 37: KB80

Highlight

Copy