2 Tĩmoteo 3

Ebiro byʼenyũma-nyũma

1Nĩkwa Uminye ekĩ! Oko biro byʼenyũma-nyũma hasyabya emigulu ĩkalĩre. 2Kusangwa abandu basyabya abakayanza, nʼerianza ebindu, abakayipipa, abakayiheka, abatsũmĩ, abatĩowa ababũtĩ babo, abate nʼewasĩngya, abatesoma. 3Basyabya bʼomutima akalĩre, isibeganyira, abakalega abandi, abʼomwaga, abatsibu, abatanzĩre ekibuya, 4basyabya batebya, abatetsomana, abʼomutwe abĩmbĩre, abanzĩre erĩyĩtsemesya, ĩsĩbanzĩre Nyamuhanga; 5bakwamĩre omuhanda wʼekisomo, nĩkwa bakagana obũtokĩ bwakyo. Usage abandu ngʼaba. 6Kusangwa abandi ba kubo bakingira omo manyũmba nʼeriteba abakalĩ bakĩrũ, abali kwʼebibi binene, abakahekawa nʼesyongumbu mĩsĩndo-mĩsĩndo. 7Abakalĩ aba bakiga ebiro byosĩ, nĩkwa sibalitoka erĩhĩka okwʼiminya omwatsi wʼekwenene. 8Neryo ngoko Yane na Yambũre balwa na Musa, litya abandu aba bakalwa nʼomwatsi wʼekwenene. Abandu aba sĩbeganĩraya, kandi babiritsanda omo myatsi yʼekisomo. 9Nĩkwa sĩbendĩsyahĩka hali, kusangwa obũkĩrũ bwabo bwasyaminyikala oko bandu bosĩ, ngoko bwahĩka uku Yane na Yambũre.

Awandi mategeko busana na Tĩmoteo

10Nĩkwa uwe wabirikwama ndeke erĩkangĩrĩrya lyage, nʼemikolere yage, nʼerĩyĩsũnza lyage; kandi wabirikwama erĩkĩrĩrya lyage, nʼeriyibombeka lyage, nʼolwanzo lwage, nʼerĩyĩyĩnĩa lyage. 11Ũnasĩ erĩendererĩbwa lyage nʼamalĩge wage. Kandi ũnasĩ emyatsi yosĩ eyanyĩhĩkako eAntĩokĩa, nʼeĨkonĩo, nʼeLĩstra, nʼerĩendererya lĩnene eryo nagalawamo! Nĩkwa Omukama mwanyĩlamya omo byosĩ. 12Kandi abosĩ abanzĩre erikwama engebe yʼerikenga Nyamuhanga nʼerimatikana na Kristo Yesu, basyendererĩbwa. 13Nĩkwa bandu babi, nʼabatebya, basyakanyirira eribya babi, ibakateba abandi nʼerĩtebĩbwa ĩbobene. 14Nĩkwa uwe ukwamirire omo myatsi eyo wakangĩrĩrĩbawa, nʼeyo Wĩkĩrĩrye ndeke. Kusangwa ũnasĩ abakangĩrĩrya bawe nga babya bahi. 15Kandi ũnasĩ erĩtsũka omo bwana bwawe wabiriminya Amasako Abũyĩrĩre, awakatoka erikuha amenge wʼerikutwala okwʼilamĩbwa busana nʼerĩkĩrĩrya Kristo Yesu. 16Kusangwa Amasako gosĩ Nyamuhanga yo wategekanayago. Kandi ali nʼendũndĩ busana nʼerĩkangĩrĩrya omwatsi wʼekwenene, kandi busana nʼerikunga erihaba, kandi busana nʼerihabula, nʼerĩkangĩrĩrya abandu erikwama ekitunganene. 17Neryo omundu wa Nyamuhanga ahĩkane, nʼerĩtokesĩbwa erikola obuli mũbĩrĩ owene.

Currently Selected:

2 Tĩmoteo 3: KB80

Highlight

Copy

Compare