2 Tĩmoteo 2

Omũsĩrĩkanĩ wa Kristo Yesu oyuteregula

1Neryo nawe mwana wage, ukale omo lukogo oluli busana netu erimatikana na Kristo Yesu. 2Wĩmaye ebĩnywa ebyo wowa ngabũga embere syʼabalangĩrĩ banene, ũkangĩrĩrayebyo oko bandi bandu abateregula, abakatoka erĩkangĩrĩrya abandi bandu.

3Usangire nage omo malĩge, ngʼomũsĩrĩkanĩ mubuya wa Kristo Yesu. 4Omũsĩrĩkanĩ oyukakola omũbĩrĩ, anzĩre erĩtsemesya omukulu wuwe, neryo sĩalĩyĩgobaya omo myatsi yʼabandi bandu. 5Oyukatsanga omo matangwa sĩalĩsĩnga atekwama ebihano byʼamatangwa. 6Omũlĩmĩ Oyukalima kutsibu atolere erĩtsũka erirya oko bikera. 7Ũganĩraye ebyo ngabũga, kusangwa Omukama asyakuha eriminya emyatsi yosĩ.

8Wibuke Yesu Kristo, oyo walũbũkĩbawa oko baholĩ, kandi ogʼomo kĩtũnga kya Dawĩdĩ, ngʼEngulu Yowene eyo ngatũla ĩkabũga. 9Neryo ngagalawa kusangwa ngatũla Engulu Yowene, kandi ngabohawa omo mahulula ngʼomundu mubi. Nĩkwa ekĩnywa kya Nyamuhanga Sĩkĩbohĩre. 10Kandi busana nʼomwatsi oyũ, ngayĩyĩnaya omo byosĩ busana nʼabandu abayisogawa na Nyamuhanga, nabo batoke eribana erilama lya Kristo Yesu, haguma nʼolukengerwa lwʼerikota. 11Ebĩnywa ebĩ ni byʼekwenene, biti,

Twamabya twabirihola haguma naye,

Twasyabyaho haguma naye nibya;

12Twamayĩyĩnĩa, twasyatabala nibya haguma naye;

Twamamugana, naye asyatugana;

13Twamalegula, iye akabya butsira eriregula,

Kusangwa sialitoka eriyigana.

Omũkolĩ wʼomũbĩrĩ Oyũkasĩmawa

14Kandi wĩbũkaye abandu bawe emyatsi eyĩ, kandi uhanebo kutsibu embere sya Nyamuhanga, sibanegene busana nʼebĩnywa. Erilwa eryo siririkola ndeke, nĩkwa lĩkatsandaya abandu abakahulikirira. 15Uyire omũhwa erĩsĩmwa embere sya Nyamuhanga ngʼomũkolĩ wʼomũbĩrĩ oyutehemuka busana nʼomũbĩrĩ wuwe. Kandi oyũkakangĩrĩraya ndeke-ndeke omwatsi wʼekwenene wa Nyamuhanga. 16Usage ebĩnywa bitya-bitya ebitekenga Nyamuhanga, kusangwa bikatwala abandu eritendiswakenga Nyamuhanga. 17Kusangwa erĩkanĩa lyabo likandisyatanda ngʼekironda kibi. Ababiri oko bakangĩrĩrya aba nĩ Hĩmeneo na Fĩleto. 18Ababiri aba babiritala oko mwatsi wʼekwenene, ĩbakabũga bati erĩlũbũka lyabirilaba, ĩbabĩrĩtsandya erĩkĩrĩrya lyʼabandi bandu. 19Nĩkwa ekibanza ekyo Nyamuhanga ahĩmba kĩsĩkĩre ndeke, kandi kĩsakĩreko ebĩnywa ebĩ biti, Omukama anasĩ abandu buwe nga ni bahi. Kandi, Obuli mundu oyũkabũga ati ni wʼOmukama aleke ebibi.

20Omo nyũmba nene muli ebibindi nʼebĩbo byʼemihanda yosĩ. Ebindi nĩ byʼekĩtsĩpa nʼebyʼesyamagetsi, kandi ebindi ni byʼomuti kutse eribumba. Ebindi ni byʼomũbĩrĩ owene, nʼebindi ni byʼomũbĩrĩ mutya-mutya. 21Omundu amera oko myatsi mibi eyĩ, asyabya ngʼekibindi kyʼemĩbĩrĩ yowene, iniabirihigulwa erigasira Omukama wuwe, neryo abĩrĩsĩka busana nʼobuli mũbĩrĩ owene. 22Usage esyongumbu syʼobũlwana, ukwamirire ekitunganene, erĩkĩrĩrya, olwanzo, Obuholo, haguma nʼabandu abakalakira Omukama omo mutima owate mo bibi. 23Nĩkwa Usage ebĩnywa bĩkĩrũ ebite nʼamenge, ebyʼobuhaka, kusangwa ũnasĩ kwʼebĩnywa ebĩ bikaleta erinegena. 24Kandi omugombe wʼOmukama siatolere erinegena, nĩkwa abye mubuya oko bosĩ, abye oyo wasĩ erĩkangĩrĩrya, iniakayibombeka omugulu akakolawa nabi. 25Kandi ahehere omugulu akakunga abakalwa naye. Mbino Nyamuhanga asyahabo eribindula emitima yabo erireka ebibi, nʼeriminya omwatsi wʼekwenene. 26Neryo basyaswabana obũlengekanĩa bowene nʼeribala ekitego kya Dĩabolo, oyukahambabo busana nʼerikola erisonda lyayo.

Currently Selected:

2 Tĩmoteo 2: KB80

Highlight

Copy

Compare