2 Abanya Tesalonĩka 2
2
Omubi Oyo
1Neryo balĩkyetu, omo mwatsi wʼerĩhĩka lyʼomukama wetu Yesu Kristo, nʼerĩhĩndana lyetu haguma naye, tukabalemba-lemba tuti, 2Sĩmũsũkasũkanĩbawe omo malengekanĩa wenyũ, kutse simuleke omutima wenyũ akalũa omo nda, busana nʼekĩrĩmũ, kutse busana nʼeriambuka ambu nĩ kĩnywa kyetu, kutse ebarua yetu biti, Ekiro kyʼomukama kyabĩrĩhĩka. 3Simuleke mundu akabatebya omo mwatsi nʼomuguma. Kusangwa Ekiro ekyo sikyendisyasa eripona nʼerisuba enyũma bite byahĩka, nʼomubi Oyo ate abutuka, oyo wasyaherĩbwa. 4Iye akalwa nʼesyosĩ esyo abandu bakahula mo nyamuhanga, nʼebyosĩ abandu bakaramaya. Asyayĩhamya endata oko syosĩ, nʼeriya omo Hekalũ ya Nyamuhanga, nʼerĩĩkala oko kĩtũmbĩ omo Hekalũ, nʼeriyahula mo Nyamuhanga.
5Simulyibuka ngoko nababwira emyatsi eyĩ omugulu nabya nyikine nenyũ kwehĩ? 6Kandi mũnasĩ ekĩkamũkakĩraya lino, erĩhĩka oko mugulu Omundu Mubi oyo asyabĩsũlwa. 7Nĩkwa Obubi obũbĩsĩre bukakola na lino, nĩkwa oyũkakakĩrĩrayabo asyakakĩrya erĩhĩka oko mugulu asyalũsĩbwaho. 8Neryo Omundu Mubi oyo asyabĩsũlwa, nʼOmukama Yesu asyamwĩta omo muka wʼobuno buwe, nʼerĩmũtogotya omo lukengerwa lwʼerihuluka liwe. 9Neryo Omundu Mubi oyo asyasa omo bũtokĩ bwʼeSatanĩ nʼerikola ebitiko-tiko byʼemĩsĩndo yosĩ nʼebĩmĩnyĩsyo byʼamabehĩ, nʼebyʼeriswekera. 10Kandi asyakola omo mĩsĩndo yosĩ yʼeriteba nabi busana nʼabakandisyahera. Nabo basyahera kusangwa mobatangirira kutse erianza ekwenene, eyangaleka ĩbalamĩbwa. 11Busana nʼomwatsi oyũ, Nyamuhanga akatumirabo eriteba erĩkalĩre, erikaleka ĩbĩkĩrĩrya ebyʼamabehĩ. 12Neryo kyasyaleka abosĩ abatĩkĩrĩrye oko mwatsi wʼekwenene, nĩkwa bakatsemera ebibi, ĩbasĩngwa.
Ĩnywe mwabiriyisogwa eribana omulamo
13Nĩkwa litutolere eriha Nyamuhanga yʼewasĩngya emigulu yosĩ, busana nʼĩnywe balĩkyetu, ĩnywe banze bʼOmukama. Kusangwa Nyamuhanga ayisoga nywe erĩmbere eribana erilama busana nʼOmũlĩmũ oyukabahigula, kandi kusangwa mwabĩrĩkĩrĩrya omwatsi wʼekwenene. 14Nyamuhanga mwababirikira busana nʼekĩ omugulu twabakangĩrĩraya Engulu Yowene, imwatoka eribana olukengerwa lwʼOmukama wetu Yesu Kristo. 15Neryo balĩkyetu, muhangane ĩmũnasĩkĩre, kandi muhambe ndeke emyatsi yʼekwenene eyo twabakangĩrĩraya, omo bĩnywa byetu nʼomo barua yetu.
16Neryo Omukama wetu ye Yesu Kristo, na Nyamuhanga Tata wetu, oyo watwanza, nʼerituha busana nʼolukogo luwe erĩsĩbĩkya lyʼerikota nʼamaha mabuya, 17asĩbĩkaye emitima yenyũ, nʼerĩbasĩkya omo buli mwatsi mubuya mukakola kutse mũkabũga.
Currently Selected:
2 Abanya Tesalonĩka 2: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
