1 Tĩmoteo 3
3
Ekitolere abakulu omo kanĩsa
1Ekĩnywa ekĩ ni kyʼekwenene, kiti, Omundu amanza eribya oko mũbĩrĩ wʼobukulu bwʼekanĩsa, ĩnĩakayĩtsũtsa omũbĩrĩ mubuya. 2Neryo omukulu, atolere iniabya butsira kahinira, atolere iniabya nʼomũkalĩ muguma musa, kandi sĩakũnde, ayĩtegaye, ayitondeke, abye oyũkakokaya abagenĩ, kandi atoke erĩkangĩrĩrya. 3Kandi siabye mũtamĩrĩ, kutse owʼomururu, nĩkwa abye mugenge, abye mundu wʼobuholo, siabye oyo wanzĩre ebindu. 4Abye mundu oyukategeka ndeke abʼomuwe, nʼabana buwe ibakayolobeka nʼerimukenga. 5Kusangwa omundu amataluka eritegeka abʼomuwe bo ndeke, angateya ekanĩsa ya Nyamuhanga ati kwehĩ? 6Kandi syabye Mukristo muhya-muhya, akasyayiheka nʼeritoga, nʼerĩsĩngwa ngʼeSatanĩ ko yasĩngawa. 7Kandi abye mundu Oyũkasĩmawa nʼabandu abate omo kanĩsa, akasyahulwa mo mundu mubi, nʼeritogera omo kitego kyʼeSatanĩ.
Ekitolere abawatĩkya omo kanĩsa
8Abawatĩkya bʼomo kanĩsa batolere babye abasĩkĩbwe, abate bʼotulimi tubiri, kutse Sibabye abakakũnda, kutse abʼomururu. 9Nĩkwa babye bʼobunya-mutima bowene, abandu abakakwama ekyʼekwenene ekyʼerĩkĩrĩrya, ekyabĩrĩbĩsũlwa. 10Kandi batsũke erirengwa, neryo bamatendibanika oko mwatsi, bakole omũbĩrĩ wʼomũwatĩkya. 11Abakalĩ nabo bangabya abasĩkĩbwe, Sibabye abakatonga abandi, nĩkwa babye abatekũnda, abateregula omo myatsi yosĩ. 12Abawatĩkya bʼomo kanĩsa babye abandu bʼomũkalĩ muguma musa, kandi abakategeka ndeke abana babo, nʼabali omo manyũmba wabo. 13Neryo abawatĩkya bʼomo kanĩsa abakakola ndeke bakabana erĩsĩkĩbwa ndeke, kandi bakatoka eritondeka embere syʼabandu bosĩ omwatsi wʼerĩkĩrĩrya eryo tuwite busana nʼerimatikana na Kristo Yesu.
Erĩkũmbo lĩnene
14Ngakusakira emyatsi eyĩ, inyine nʼamaha wʼeriyakulolako lũba. 15Nĩkwa namamala ndambĩ, ngakusakira iwatoka eriminya ngoko abandu bangayĩtondekanĩa omo kĩtũnga kya Nyamuhanga, ekiri ekanĩsa ya Nyamuhanga oyuliho. Ekanĩsa eyo nĩ ndũyĩ nʼeyĩkasĩkaya omwatsi wʼekwenene. 16Sihali oyo wangagana obukulu bwʼerĩkũmbo lyʼekisomo kyetu tuti,
Mwabutuka omo mubiri wʼabandu,
Mwasĩngana ngʼomutunganene omo Mũlĩmũ,
Kandi mwalolwako nʼabamalaĩka,
Mwatũlaganĩbwa omo katĩkatĩ kʼebihanda,
Mwĩkĩrĩrĩbwa omo kihugo,
Mwatwalwa omo lukengerwa lwʼelubula.
Currently Selected:
1 Tĩmoteo 3: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
