1 Tĩmoteo 2

Erĩramya lyʼekanĩsa

1Neryo ngatsũka eribahatikana nyiti, Eriremba-lemba, nʼerisaba, nʼerĩbũlya, nʼeriha ewasĩngya, bikolawe embere sya Nyamuhanga, busana nʼabandu bosĩ. 2Kandi busana nʼabami, nʼabandi bosĩ abakatabala, tutoke erisiba buholo butsira mwaga, itukakenga Nyamuhanga, nʼeriyitondeka ndeke. 3Ekĩ ni kibuya, kandi kĩkatsemesaya Nyamuhanga Omũlamya wetu, 4oyo wanzĩre abandu bosĩ balamĩbawe, nʼeriminya ndeke omwatsi wʼekwenene. 5Kusangwa hali Nyamuhanga muguma, nʼOmũsanganĩa muguma, oyũkasanganaya Nyamuhanga nʼabandu, omundu oyo ni Kristo Yesu, 6oyo wayiha busana nʼerĩtongolya abandu bosĩ. Neryo ekyo akola nĩ kĩmĩnyĩsyo oko mugulu atolere ngoko Nyamuhanga anzĩre abandu bosĩ ĩbalamĩbwa. 7Busana nʼomwatsi oyũ, natumawa eribya Omũgambũlĩ, nʼomukwenda, nʼOmũkangĩrĩrya wʼebihanda babane erĩkĩrĩrya nʼeriminya omwatsi wʼekwenene. Sindibiha, ngabũga kwenene.

8Neryo ngasonda abalume ehosĩ basabe, abalume ababiriyiha uku Nyamuhanga ibakasumba ebyala byabo erisaba, butsira erihitana kutse obuhaka. 9Kandi nyanzĩre abakalĩ nabo bambale esyongimba esitolerebo, nʼerĩyĩteya omo mwatsi wʼerĩyĩsũga. Kandi erĩyĩsũga lyabo siribye eriluka esyonzwiri syo muhanda, kutse erĩyĩsũga eryʼesyamagetsi, kutse eryʼesyolulu, kutse esyongimba syʼobũgũlĩ bunene. 10Nĩkwa babye nʼemikolere mibuya, eyitolere abakalĩ abakayahula mo bandu abakakenga Nyamuhanga. 11Abakalĩ bangiga omo bũkũtũ-kũtũ ibakayolobeka. 12Kandi sĩndĩrĩga omũkalĩ akakangĩrĩrya kutse eribya nʼehamũlĩ oko balume, nĩkwa babye bũkũtũ. 13Kusangwa Adamu yo watsũka erihangikwa, nʼenyũma wʼaho Hawa. 14Kandi Adamu mwatatebĩbwa, nĩkwa omũkalĩ yo watebĩbawa, yo wahalaya. 15Nĩkwa omũkalĩ asyalamĩbwa omwʼibuta bana, amakwamirira omwʼĩkĩrĩrya nʼolwanzo, nʼeriyihigula, kandi omwʼĩteya.

Currently Selected:

1 Tĩmoteo 2: KB80

Highlight

Copy

Compare