1 Yoane 2

Kristo Omũwatĩkya wetu

1Ĩnywe, abana bage balere, ngabasakira emyatsi eyĩ, isimwakola ebibi. Nĩkwa omundu amakola ekibi, tuwite Embũyĩ uku Tata, ye Kristo oyutunganene. 2Kandi Kristo ni mbanulo busana nʼebibi byetu, kandi si busana nʼebibi byetu bisa, nĩkwa busana nʼebibi byʼekihugo kyosĩ.

3Twamateya ebihano bya Nyamuhanga, tukaminya ko tũmwasĩ. 4Omundu amabũga ati, Nyĩnamwasĩ, isialikenga ebihano biwe, oyo nĩ mũbehĩ, kandi sialikwama omwatsi wʼekwenene. 5Nĩkwa omundu oyukakenga ekĩnywa kiwe, kwenene olwanzo luwe busana na Nyamuhanga lwabĩrĩhĩkana. Busana nʼekĩ tũnasĩ ndeke ko tuwatene na Nyamuhanga. 6Nʼoyũkabũga ati awatene na Nyamuhanga, litolere naye inialendera ngoko Kristo alendera.

Ekihano kihya-kihya

7Abanze betu, sindibasakira ekihano kihya-kihya, nĩkwa ni kihano kya kera, ekyo mutula nakyo okwʼĩtsũka. Ekihano kya kera nĩ kĩnywa ekyo mwowa. 8Nĩkwa kandi ekihano ekyo ngabasakira ni kihya-kihya, nʼekwenene yakyo ikalolawako omwisi wa Kristo nʼomwisi wenyũ nibya. Kusangwa omwĩrĩmya akalenga, nʼekyakakala kyʼekwenene kĩnemũkolerya.

9Oyũkabũga ati akalendera omo kyakakala, nĩkwa akakwa mũlĩkyabo yʼobusu anemulendera omo mwĩrĩmya erĩhĩka lino. 10Nĩkwa oyo wanzĩre mũlĩkyabo akasiba omo kyakakala, kandi siawite omwatsi owakaleka ogundi mundu iniakola ebibi. 11Nĩkwa Oyũkakwa mũlĩkyabo yʼobusu, ali omo mwĩrĩmya, kandi akalendera omo mwĩrĩmya, ĩsĩasĩ eyo akaya, kusangwa omwĩrĩmya abirimuyira mo ndĩma-tĩme.

12Ngabasakira ĩnywe bana balere, kusangwa ebibi byenyũ byabiribuyirwa busana nʼerĩna lya Kristo. 13Ngabasakira ĩnywe, abotata, kusangwa mũnasĩ oyutula okwʼĩtsũka. Ngabasakira ĩnywe balwana, kusangwa mwabĩrĩkĩnda Omubi Oyo.

14Ngabasakira, ĩnywe bana, kusangwa mũnasĩ Tata. Nabiribasakira ĩnywe abotata, kusangwa mũnasĩ oyutula okwʼĩtsũka. Nabiribasakira, ĩnywe balwana, kusangwa muli bʼamaka, nʼekĩnywa kya Nyamuhanga kikasiba omwisi wenyũ. Kandi mwabĩrĩkĩnda Omubi Oyo.

15Simwanze ekihugo, kutse emyatsi eyʼekihugo. Omundu amanza ekihugo siawite olwanzo lwa Tata. 16Kusangwa ebyosĩ bya muna-kihugo, esyongumbu syʼomubiri, kandi esyongumbu syʼameso, kandi emiyiheko yʼabandu, ebyosĩ ebĩ ni byʼekihugo, sĩbyelũa uku Tata. 17Nʼekihugo, nʼesyongumbu syakyo, byasyahwa. Nĩkwa oyukakola erisonda lya Nyamuhanga asyakota kera na kera.

Enzĩgũ ya Kristo

18Bana bage, ni mugulu wʼendũlĩ. Mwabĩrĩowa ngoko enzĩgũ ya Kristo yasyasa. Na lino esyonzĩgũ nyingi sya Kristo syabĩrĩhĩka; busana nʼekĩ tũnasĩ kwʼali mugulu wʼendũlĩ. 19Abandu aba sibabya bʼũkwʼĩtwe, kyaleka ĩbatũlũako. Kusangwa kumbe babya bʼũkwʼĩtwe, nga babĩrĩsĩgala netu. Nĩkwa mobagenda ikyaminyikala ndeke abosĩ abo ko bate bʼũkwʼĩtwe.

20Nĩkwa Kristo abĩrĩbũtũlĩra Omũlĩmũ Abũyĩrĩre, neryo mũnasĩ ndeke omwatsi wʼekwenene. 21Sinditabasakira kusangwa sĩmwasĩ omwatsi wʼekwenene, nĩkwa kusangwa mũnasĩgo. Nʼakandi kusangwa mũnasĩ ko hate eribiha erĩkalũa oko mwatsi wʼekwenene.

22Omũbehĩ nindi kwehĩ? Yo nʼoyukagana Yesu kwʼali Kristo. Enzĩgũ ya Kristo yeyĩ, yo yukagana Tata nʼomugala. 23Kusangwa oyukagana Omugala siawite Tata nibya, nʼoyũkalĩga Omugala awite Tata nibya.

24Neryo ĩnywe, mubike omo mitima yenyũ omwatsi ogo mwowa erĩmbere. Neryo omwatsi ogo mwowa erĩmbere amabya abĩkĩre omo mitima yenyũ, nenyũ mwasyamatikana nʼomugala na Tata. 25Kandi erilaga eryo Kristo abirituha lyerĩ, ye ngebe yʼerikota.

26Nabiribasakira emyatsi eyĩ busana nʼabo abakalenga erĩbatalya. 27Nĩkwa Kristo abĩrĩbũtũlĩra Omũlĩmũ wuwe, naye ĩkere omwisi wenyũ; isimuli nʼobwaga bwʼerĩkangĩrĩrĩbwa nʼomundu. Kusangwa Omũlĩmũ wuwe akabakangĩrĩraya emyatsi yosĩ, nʼemyatsi eyĩ ni kwenene, sĩ yʼamabehĩ. Neryo ngoko abiribakangĩrĩrya erikola, mubye mukamatikana na Kristo.

28Neryo lino, abana bage balere, mubye mukamatikana na Kristo, neryo itwabya ĩtũnasĩkĩre omugulu asyahuluka, nʼerĩtĩndakwa esĩsonĩ embere siwe oko kiro ekyo asyasa. 29Mwamabya mũnasĩ Kristo kwʼatunganene, muminye kwʼabosĩ abakakola ebitunganene, babiribya bana ba Nyamuhanga.

Currently Selected:

1 Yoane 2: KB80

Highlight

Copy

Compare