1 Abanya Korĩnto 5

Erĩlũsya omũsĩngĩrĩ yʼomo kanĩsa

1Abandu balĩmũbũga bati, hali erĩsĩngĩra omo katĩkatĩ kenyũ, eryo mũsĩndo owakalĩre kwilaba oluteto losĩ lwʼabandu bʼEbihanda. Bati, omundu abĩrĩmya me-mulere wuwe! 2Neryo mukayihagala muti kwehĩ? Litolere imwabya nʼobũlĩge bunene, nʼerĩlũsya omundu oyukakola omwatsi oyũ omo ndeko yenyũ. 3Kusangwa ĩngye nomo nyite haguma nenyũ omo mubiri, nyineyo omo kĩrĩmũ, nabiritswera oyo wakola ekyo, omo lĩna lyʼomukama wetu Yesu nga nyineho haguma nenyũ. 4Neryo omugulu mũhĩndene haguma, nage indi haguma nenyũ omo kĩrĩmũ kyage, ituli nʼobũtokĩ bwʼomukama wetu Yesu, 5tuhe omundu oyo uku Satanĩ, omubiri wuwe aherĩbawe, nĩkwa ekĩrĩmũ kiwe kĩlamĩbawe omo Kiro kyʼomukama.

6Eriyihagata lyenyũ Sĩryowene! Sĩmwasĩ kwʼekĩhamya kike kĩkahamaya obundu bosĩ kwehĩ? 7Mũlũsaye ekĩhamya kya kera, kyʼebibi, imwatoka eribya bundu buhya-buhya obute mo kĩhamya nʼekike, ngoko kwenene muli rino. Kusangwa Kristo ekyana kyʼembũlĩ kyetu kyʼErikiruka, abiriherwa. 8Neryo tusangire okwʼirya eryo, butsira omo bundu obuli mwʼekĩhamya kya kera, ekyʼebibi nʼekyʼerĩhalya, nĩkwa omo bundu obute mwʼekĩhamya, obwʼobubuya nʼobwʼekwenene.

9Omo barua nabasakira monababwira nyiti, simutambe nʼabandu basĩngĩrĩ. 10Nĩkwa mondahula bandu basĩngĩrĩ bʼekihugo kino, kutse abakatsura abakahũnga, kutse abakasaba esyosanamu, Kusangwa bite bitya ĩnywe ĩmwangalũa omo kihugo. 11Nĩkwa lino ngabasakira nyiti, simutambe nʼomundu oyukayahula mo Mukristo, oyuli mũsĩngĩrĩ, kutse omũtsũrĩ, kutse oyukasaba esyosanamu, kutse omũtsũmĩ, kutse oyuli mũkũndĩrya, kutse oyũkahũnga. Kwenene simwangalya nʼomundu ngʼoyo.

12Kusangwa si mwatsi wage wʼeritswera abʼeyĩhya. Nenyũ simwangatswera akali omo kanĩsa kwehĩ? 13Nĩkwa Nyamuhanga asyatswera abali eyĩhya. Ngoko kĩsakĩre kiti, Omundu mubi oyo, mumuhige omo ndeko yenyũ.

Currently Selected:

1 Abanya Korĩnto 5: KB80

Highlight

Copy

Compare