1 Abanya Korĩnto 4

Abakwenda ba Kristo

1Abandu bangatuganza ngʼabagombe ba Kristo, kandi ngʼabateya bʼamakũmbo wa Nyamuhanga. 2Nĩkwa omwatsi muguma atolere omũteya, ambu abanike ngʼoyuteregula oko mukama wuwe. 3Nĩkwa ĩngye sinditsomana nga mukanzwera kutse eritswerwa nʼabandu ba muna-kihugo. Kutse sindiyitswera. 4Kandi sinditabana omwatsi wʼeriyihandikirira. Nĩkwa ekyo sikirinyiyira mo mundu ute ko lubanza. Omukama yukanyitswera. 5Neryo Simubye mukatswera omundu embere wʼomugulu owatolere, omugulu Omukama asyasa, iye asyahũlũkya omo kyakakala emyatsi eyĩbĩsamĩre omo mwĩrĩmya, kandi asyamĩnyĩkalya erĩyĩsũnza lyʼemitima yʼabandu. Neryo obuli mundu asyabana eripipwa na Nyamuhanga.

6Balĩkyetu, nabĩrĩbũga emyatsi eyĩ mo mũsyo busana nage na busana na Apolo, imwatoka eriiga eritendisoha nabi. Sihabye mundu oyukayiheka, ati akimira omukwenda muguma, nʼeripona ogundi. 7Nindi wakũhĩra mo mukulu oko bandu kwehĩ? Ebyosĩ ebyo uwite, Nyamuhanga mwatakuhabyo kwehĩ? Neryo byamabya ĩnĩ lũsũnzo, busana nakĩ ukayihalamba nga sulitahabwalo kwehĩ?

8Mwabiribana ebyosĩ; kandi mwabiribya bateke, kandi muli bami, ĩtwe nomo tutane bami; kumbe muli bami, netu itwatoka eribya bami haguma nenyũ. 9Kusangwa ngaganĩraya nyiti, Nyamuhanga abĩrĩtũhĩra ĩtwe bakwenda, omo mwanya wʼendũlĩ, ngʼabandu ababiritswerwa okwʼihola, kusangwa twabiribya ekyʼerisamalirwa busana nʼekihugo kyosĩ, oko bamalaĩka, nʼoko bandu. 10Ĩtwe tuli bakĩrũ busana na Kristo, nĩkwa ĩnywe muli bʼamenge omwisi wa Kristo; ĩtwe tuli bolo-bolo, nĩkwa ĩnywe muli bʼamaka; ĩnywe mũkasĩkĩbawa, nĩkwa ĩtwe tukaponawa. 11Kandi erĩhĩka na lino-lino tukawira nʼerĩkwa enyota, situwite esyongimba syowene, kandi tũkahũnzawa, isituwite enyũmba. 12Kandi tukaluha, itunemukola omũbĩrĩ omo byala byetu. Omugulu tukatsumawa, tukatsumula; omugulu abandu bakatwendereraya, tũkayĩyĩnaya. 13Omugulu bakatulega, tukalenga erisangana nabo. Twabiribya ngʼabaleretĩre oko kihugo, tuli ngʼekyabũ kyʼebindu byosĩ, erĩhĩka na lino.

14Sindisaka emyatsi eyĩ busana nʼeribahemula, nĩkwa ngasaka busana nʼeribahana ngʼabana bage banze. 15Kusangwa nomo mwangabya nʼabakangĩrĩrya bʼolũhũnda-hũnda umu Kristo, nĩkwa simwangabya nʼabotata bangi. Kusangwa ĩngye omo Ngulu Yowene nabiribya tata wenyũ omwisi wa Kristo Yesu. 16Neryo ngabalemba-lemba nyiti mubye mukanyĩgerererya. 17Busana nʼomwatsi oyũ, nabiribatumira Tĩmoteo. Iye ni mwana wage mwanze omwisi wʼOmukama oyuteregula. Asyabĩbũkya emigendere yage eyo ngakwama omwisi wa Kristo, kandi eyo ngakangĩrĩraya ehosĩ omo makanĩsa gosĩ.

18Nĩkwa abandi omo katĩkatĩ kenyũ bakayihagata, bati Sindiendisyaya ewenyũ eKorĩnto. 19Nĩkwa nyinemwendĩsyabahĩkako lũba, Omukama amanza atya, neryo nasyaminya ndeke obũtokĩ bwʼabakayiheka, butsira ebĩnywa byabo bisa. 20Kusangwa obwami bwa Nyamuhanga buliho omo bũtokĩ butsira omo bĩnywa bisa. 21Mwanzĩre kyahi kwehĩ? Nyĩbahĩkeko omo lũnyambĩ, kutse omo lwanzo nʼomutima owahehere kwehĩ?

Currently Selected:

1 Abanya Korĩnto 4: KB80

Highlight

Copy

Compare