Yohana 15
15
Yesu mzabibu.
1Imi ni mzabibu wa kweli, Tate ni mulimi. 2Kila tambi jangu jishijovyala ajiusha, kangi kila tambi jevyala ajishengela, jiisiize kuvyala. 3Inywi mwishengelwe kwa ija mbuli, nimiγambileyo. 4Ikalai kwangu, nami niikale kwenyu! Sa tambi jishivyodaha kuvyala kwa nguvu yakwe ṅwenye, ati jasheikala mwe nkolo, vivyoho hata inywi, ati mwasheikala na imi. 5Imi ni mzabibu, inywi mu matambi; mweikala kwangu, nami nikiikala kwakwe, yuja aleta kuwo jingi, kwa kuti mwishina imi, nkakuna muvyodaha kuγoshola. 6Ati muntu asheikala kwangu, aashiγwa, sa tambi jivyoashiγwa jikikalaγala, vikibinda wantu wayaumbika haṅwe, wayaasha mwe moto, yahye. 7Mkiikala kwangu, hata mbuli zangu zikiikala kwenyu, lushe ndivyo mkunde kulombeza, vitamibontokela. 8Na inu mbuli Tate agimbikwa, mkilavya kuwo jingi, mkiniγalukila wahina.
Lukundisho.
9Sa Tate anikundishevyo, ne nivyomikundisha nami; ikalai na kunikundisha! 10Ati mwaγolokela milaγilizo yangu, mtaikala na kunikundisha, sa imi niγolokelevyo milaγilizo ya Tate, nikiikala na kumkundisha. 11Izi mbuli nizazimiγambila, kangwe nyemi yangu iikale kwenyu, nyemi yenyu iisiize kuγenela. 12Unu ni mlaγilizo wangu, mkundishane, sa imi nimikundishevyo. 13Nkakuna mwekundisha kuzinka aho, akikiinkila kwa mbuli ya wambuyae. 14Inywi mu wambuyangu mkiγoshola, nivyomilaγiliza. 15Senikemiitanga wapuna, hambu mupuna nkataila, baba yakwe avyoγoshola; miya inywi nizamiitanga wambuyangu, hambu vyoshe, niivilevyo kwa Tate, nizavimiγambila. 16Si nywiyo munishaγulewo, ni miyo nimishaγulewo, nizamiika, muhite, mulavye kuwo jingi, kuwo jenyu jiikale, kangwe ndivyo mumlombeze Tate mwe zina jangu, aviminke. 17Inu mbuli naimilaγiliza, mkundishane.
Lushukizo lwa inu shi.
18Ati inu shi yamishuka, tailai kuti: Imi izaandiila kunishuka, inywi mshizati mshukwe ndiyo. 19Ati mwanduka mwe inu shi, anga inu shi izakundisha weyae; kwa kuti nkamwanduka mwe inu shi, kangi nizamishaγula na kumilavya mwe inu shi, kwa ivyoho inu shi yamishuka. 20Fukilai ija mbuli, nimiγambileyo kuti: Mupuna so mkulu kumzinka baba yakwe! Ati imi wazaniγulusha, hata inywi newamiγuiushe! Ati wazatoza mbuli yangu, hata yenyu newaitoze! 21Miya ivi vyoshe newavimiγoshwele kwa mbuli ya zina jangu, hambu nkawamtaila anitumileye. 22Ati siizile nikiwaγambila, anga nkawana uhuza, miya ivi lushe nkawana lukanile kwa mbuli ya uhuza wawe. 23Mwenishuka imi amshuka hata Tate. 24Ati siγoshole kwawe ziya ndima, mtuhu ashiγosholezo, anga nkawana uhuza; miya lushe wazaziona, kangi wanishuka imi, hata Tate; 25ni kangwe ija mbuli ibontoke igondiγweyo mwe milomo yawe kuγamba: Wanishuka bule.
26Ndiho aizile yuja irulongezi, ndiye nimtume nii kwa Tate, ni mpehoye ukweliyelawa kwa Tate, yuja neanilongele uwona. 27Hatamywi mwalonga uwona, hambu mzaanga na imi, vivyo niandiilevyo kulawila.
Currently Selected:
Yohana 15: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.