Yohana 14
14
Yesu alaga wahina.
1Azawati wahina wakwe: Myoyo yenyu ishetendwe ni futofuto! Mtozeshei Mulungu! Kangi imi nami nitozeshai! 2Mwe nyumba ya Tate muna uikazi ungi; ati sivyo, nangamiti. Nahita, nimiliγanyize henyu! 3Kangi aho, ndiho nihitile kwa miliγanyiza henyu, neniuye vituhu, nimiγuwe na kwangu, kangwe niliho imi, hata inywi muhaikale. 4-5Nikohita nako, sila mwaitaila. Toma amuti: Zumbe, nkatitaila, ukohita nako, lushe sila tiitaile zeze? 6Angwe ni Yesu: Imi ni sila na ukweli na nkalamo; nkakuna ndiye abule kwa Tate, akishenitongela. 7Ati muzanitaila, mwangamtaila Tate yohe; lushe mwamtaila, mzamwona. 8Filipo amuti: Zumbe, tionyeshe Tate! Ne ndivyo vitibesheeze.
9Yesu amuti: Filipo, mishi yekuinga haja nizaanga na inywi, kangi nkunitaila? Anieneye imi azamwona Tate; ulonga ywai kuti: Tionyeshe Tate! 10Nkutozesha kuti: Imi niyaangilana na Tate, kangi Tate aangilana na imi? Mbuli, nizomilonga, sizilonga kwa imi ṅwenye. Tate mweikala kwangu yuja aγoshola ndima zakwe. 11Nitozeshai kuti: Imi nina Tate, kangi Tate ana imi; ati mwashenitozesha, tozeshai kwa mbuli ya ziya ndima!
Kulombeza mwe zina ja Yesu.
12Kweli namiti: Mwenitozesha, ziya ndima, nizoγoshola, yohena ataziγoshola, hata zekula kuzinka ziya ataziγoshola, kwa kuti imi nahita kwa Tate. 13Ndivyo mulombeze mwe zina jangu, neniviγoshole, kangwe Tate agimbikwe mwe ṅwanae. 14Ndivyo mulombeze mwe zina jangu, neniviγoshole.
Mulongezi mtuhu.
15-24.
15Ati mwanikundisha, tozeshai milaγilizo yangu! 16Imi nami nenimhembeleze Tate, aminke mulongezi mtuhu, aikale na inywi kale na kale; ni mpeho ye kweli; 17inu shi nkaidaha kuihokela, kwa kuti nkaiiolela, nkaiitaila. Inywi mwaitaila, hambu iikala kwenyu, kangi neiikale kwenyu vivyoho. 18Sezenimiashe wenye du, neniize kwenyu! 19Kukeshiγale hadodo, ne ndiho inu shi ishenione, miya inywi mwaniona, hambu imi ni moyo, kangi hata inywi mu moyo. 20Uja mushi inywi mtataila, kuti imi nina Tate, kangi inywi muna imi, imi nami nina inywi. 21Mwena milaγilizo yangu na kuiγolokela ne mwenikundisha; kangi mwenikundisha nezeakundishiγwe ni Tate, nami nitamkundisha, nimwonyeshe nilivyo. 22Angwe ni Yuda, miya siye yuja Isikaliyota: Zumbe, ni zeze, ukikunda kutionyesha ishwi, ulivyo, ukishevionyesha inu shi? 23Yesu azalandula, azamuti: Ndiye anikundishe, atatoza mbuli yangu, ne Tate atamkundisha, titaiza, tiikale kwakwe. 24Ashiyenikundisha nkatoza mbuli yangu; kangi mbuli, muyoiva, so yangu, ni ya Tate anitumileye.
Utondolo.
25-27.
25-26Ivi nizavimiγambila nike kwenyu. Miya yuja mulongezi, yuja Mpeho mṅazi, ndiye Tate amtume mwe zina jangu, uyu atamifuza mbuli zoshe na kumikumbusha vyoshe, nimiγambilevyo.
27Namiashiliza mpolele, mpolele yangu naiminka; kangi imi siminka, sa inu shi ivyominka; myoyo yenyu ishetende futofuto, Ishevivilwe! 28Mzaiva, kuti nizamiγamba: Nahita, kangi nauya kwenyu. Ati mwanikundisha, mwangatamilwa, kuti nahita kwa Tate, hambu Tate ni mkulu kunizinka imi. 29Kangi lushe nizavimiγambila, vishizati vibontoke, kangwe mtozeshe, ndiho vibontokele. 30Senilonge na inywi mbuli nyingi, hambu zumbe ywa inu shi aiza, kangi nkana nguvu na imi, 31miya kangwe inu shi itaile, kuti namkundisha Tate, kangi viya, Tate anilaγilizevyo, naviγoshola: Inukai, tihauke!
Currently Selected:
Yohana 14: KISHNT05
Highlight
Share
Copy
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.