Fweny 2

Wach moter ni kanyakla mar jo-Kristo man Efeso

1“Ndik ni malaika mar kanyakla mar jo-Kristo man Efeso kama: “ ‘Weche mag Jal man gi sulue abiriyo e lwete ma korachwich, kendo ma wuotho e kind teyni abiriyo mag dhahabu e magi: 2Ang’eye timbeni gi tichni matek kod kinda misetimo, kendo ang’eyo bende ni in ok inyal yie gi joma richo, bende isetemo joma luongore ni joote, to ok gin joote, mi inwang’o ni gin jomriambo. 3In jakinda, kendo isechandori malit nikech an, to ok iseol. 4To kata kamano pod an gi wach kodi ni, koro ok ihera kaka ne ihera mokwongo. 5Parie kama iseaye ka ipodho! Lok chunyi mondo itim gik mane itimo mokwongo. To ka ok iloko chunyi, to anabi mi agol tachi kare. 6To kata kamano nitie gimoro maber ma itimo, en ni imon gi timbe mag jo-Nikolao, mana kaka an bende amon-go.

7 # Chak 2.9; Fweny 22.2; Ezek 28.13; 31.8. “ ‘Ng’at man gi it mondo owinj gima Roho wacho ni kanyakla mag jo-Kristo. Ng’at molocho to anami ratiro mar chamo olemb yadh ngima manie puoth Nyasaye.’

Wach moter ni kanyakla mar jo-Kristo man Smurna

8 # Isa 44.6; 48.12; Fweny 1.17; 22.13. “Ndik ni malaika mar kanyakla mar jo-Kristo man Smurna kama: ‘Weche mag Jal Mokwongo kendo Mogik e magi. En e Jal mane otho, kendo ochako obedo mangima.

9“ ‘Ang’eyo chandruok ma ineno, kod chan mari, to chutho in jamoko! Bende ing’eyo ayany ma joma wacho ni gin jo-Yahudi, to ok gin jo-Yahudi, yanyigo. Chutho, gin mana oganda jolemo mar Satan. 10Kik iluor sand ma ibiro yudo, nikech jachien biro bolo jomoko kuomu e jela mondo otemu, kendo ubiro yudo sandruok kuom ndalo apar. To bed jaadiera nyaka kar tho, mi anamiyi osimbo mar ngima, kaka ranyisi ni iselocho.

11 # Fweny 20.14; 21.8. “ ‘Ng’at man gi it to mondo owinj gima Roho wacho ni kanyakla mag jo-Kristo. Ng’at molocho to tho mar ariyo ok nomul ngang’.’

Wach moter ni kanyakla mar jo-Kristo man Pergamo

12“Ndik ni malaika mar kanyakla mar jo-Kristo man Pergamo kama: ‘Jal man gi ligangla mabith ma dhoge ariyo wacho niya,

13“ ‘Ang’eyo kama idake. En kama kom mar duong’ mar Satan nitie. To irito nyinga ahinya, kendo ne ok ikwedo yie ma iyiego kuoma, kata mana e ndalo mane Antipa, janeno mara mar adier, onegi e dalau, kama Satan odakie. 14#Kwan 22.5, 7; 31.16; R.Chik 23.4; Kwan 25.1-3.To kata kamano, an kodi gi weche moko, nikech in gi ji moko kanyo maluwo puonj mar Baalam, mane opuonjo Balak kaka onyalo miyo jo-Israel tim richo kuom chamo chiemo mosetimgo ni nyiseche manono misango, kendo kuom terruok. 15Kamano bende in gi jomoko maluwo puonj jo-Nikolao, machalo gi puonj Balaamno. 16Emomiyo lok chunyi! To ka ok ilokori, to abiro biro iri piyo, mi aked kodgi gi ligangla mawuok e dhoga!

17 # Wuok 16.14, 15; 16.33, 34; Joh 6.48-50; Isa 62.2; 65.15. “ ‘Ng’at man gi it to mondo owinj gima Roho wacho ni kanyakla mag jo-Kristo. Ng’at molocho to anami chiemo moko mopandi miluongo ni Manna, kendo anamiye kidi marachar mondikie nying manyien, maonge ng’at mong’eyo, mak mana jal monwang’e.

Wach moter ni kanyakla mar jo-Kristo man Thuatira

18“ ‘Ndik ni malaika mar kanyakla mar jo-Kristo man Thuatira kama: ‘Wuod Nyasaye, ma en Jal ma wengene rieny ka ligek mach, kendo ma tiendene pakni ka mula, wacho niya,

19“ ‘Ang’eyo timbeni duto, gi herani, gi tichni mar konyo ji, kod kindani, kendo kaka isebedo jaadiera. Bende ang’eyo ni tijeni machien beyo moloyo mokwongo. 20#1 Ruo 16.31; 2 Ruo 9.22, 30.To kata kamano an kodi gi wach moro nikech iyie gi dhako ma Jezebel maluongore ni janabi. En ema omiyo jotichna lal kuom puonjogi mondo giterre, kendo mondo gicham chiemo motimgo misango ni nyiseche manono. 21Ne amiye kinde mondo olok chunye, to otamore weyo terruokne. 22Omiyo anabole e kitanda mar rem, kendo anami joma terore kode yud chandruok malit, ka ok giloko chunygi, mi giweyo gik ma opuonjogi mondo gitim. 23#Zab 7.9; Jer 17.10; Zab 62.12.Nyithinde bende abiro nego, eka kanyakla duto mag jo-Kristo nong’e ni an ema ang’eyo chuny ji gi parogi, kendo ni amiyo ng’ato ka ng’ato kuomu pok mowinjore gi timne.

24“ ‘To un ji mamoko duto man Thuatira, ma ok oseluwo puonjno, bende mapok ong’eyo gima jomoko luongo ni, ‘Weche matut mag Satan’, ok amiu ting’ moro mapek. 25To awachonu mana ni mondo umak gima un go matek nyaka abi. 26#Zab 2.8, 9.To ng’at molocho, kendo motiyo tichna nyaka giko, anami teko mar bedo gi loch kuom ogendini, mana kaka an bende Wuora ne omiya teko. 27Ng’at molochono norit ogendini gi ludh nyinyo, 28kendo notogi matindotindo ka mbalatago. To bende anamiye sulue mar okinyi. 29Ng’at man gi it to mondo owinj gima Roho wacho ni kanyakla mag jo-Kristo.’

Currently Selected:

Fweny 2: DHO15

Highlight

Copy

Compare