Kwan 21
21
Jo-Kanaan omonjo jo-Israel
1 #
Kwan 33.40. Kane ja-Kanaan ma ruodh Arad mane odak yo milambo mar pinyno owinjo ni jo-Israel biro koluwo yor Atharim, nomonjogi momako jomoko kuomgi. 2Eka jo-Israel nokuong’ore ni Ruoth Nyasaye kawacho niya, “Ka ichiwo jogi e lwetwa, to wabiro ketho miechgi chuth.” 3Ruoth Nyasaye nowinjo kwayogi, mi ochiwo jo-Kanaan e lwetgi. Ne gitiekogi kendo giketho miechgi chuth, mi gichako kanyo ni Horma, (tiende ni, keth.)
Thuond mula
4 #
R.Chik 2.1. Bang’e ne gia got Hor ka giluwo yor Nam Makwar malworo piny Edom. 5#1 Kor 10.9.To ne gichako ng’ur ka gin e yo, mi giywak ni Nyasaye kod Musa, ka giwacho niya, “Ere gimomiyo usegolowa e piny Misri mondo watho e thimni, kama onge chiemo kata pi? Chiemo marachni ojogowa!” 6Eka Ruoth Nyasaye nooro thuonde man gi kwiri mager, mokayo jo-Israel kendo onego ji mang’eny. 7Omiyo ji nobiro ir Musa, mowachone niya, “Ne waketho kuom ng’ur ni Ruoth Nyasaye kod in. Yie ikwanwa Ruoth Nyasaye mondo ogol thuonde oko kuomwa.” Kuom mano Musa nokwayonigi Ruoth Nyasaye, 8mi Ruoth Nyasaye nowachone niya, “Los thuond mula, igur e luth mabor. Ka ng’ato thuol okayo, mi orango thuond mulano to nochangi.” 9#2 Ruo 18.4; Joh 3.14.Kamano Musa noloso thuond mula moketo e luth, ni, ka ng’ato thuol okayo, mi orango thuond mulano, to chango.
Jo-Israel owuotho kalworo piny Moab
10Jo-Israel nodhi nyime gi wuoth, moguro kambi kamoro miluongo ni Oboth. 11Bang’e gia Oboth, mi gidhi giguro kambi Iye-abarim, e thim man yo wuokchieng’ mar piny Moab. 12Kane gia kanyo, to ne gidhi mi giguro kambi e hoho mar Zared. 13Eka ne gia Arnon e thim momakore gi piny jo-Amor. Aora Arnon ne ni e tong’ piny jo-Moab gi piny jo-Amor. 14Mano emomiyo Kitap Lwenje mag Ruoth Nyasaye wuoyo kuom Vaheb man Sufa, kod hohni man kuno niya,
15“Arnon kod hohni motimo thidhya,
gi piny maridore kochomo mier mag Ar,
kod tong’ piny Moab.”
16Jo-Israel noa aora Arnon modhi Beer, (tiende ni soko.) Mano e soko mane Ruoth Nyasaye owuoyo kuome ni Musa niya, “Chok ji kaachiel mondo ami pi.” 17“Chieng’no ema jo-Israel nowerie niya,
In soko, bubni oko!
Waweruru ni soko!
18En soko mane jodongo okunyo
gi ludhe kod odungnigi,
mi obedo chiwo manie thim.”
19Ne gia Beer, mi gidhi Nahaliel, kendo ne gia Nahaliel, mi gidhi Bamoth. 20Bang’ a Bamoth, ne gidhi e holo man piny Moab ewi got Pisga, kama inyalo nenogo thim.
Jo-Israel oloyo Sihon
(Rapar mar Chik 2.26-37)
21Jo-Israel nooro joote ir Sihon ruodh jo-Amor, ka gikwaye niya, 22“Yienwa mondo wakadh e pinyi. Ok wananyon puotheu mag cham kata mag mzabibu. To bende ok wanamodh e sokniu. Wanaluw mana Ndach Ruoth nyaka chop wakadh pinyi.” 23To Sihon ne ok oyie mondo jo-Israel okadh e pinye. Ne ochoko joge duto, mi owuok mondo oked gi jo-Israel e thim. Nodhi nyaka Jahaz, momonjogi kuno. 24To jo-Israel nonegogi oyokre, mokawo pinygi, chakre aora Arnon nyaka aora Jabok, ma en tong’ piny jo-Amon, kuma ne giyudoe ka weg pinyno rateke. 25Kuom mano jo-Israel nokawo miech jo-Amorgo duto, modakie. Miego ne gin Heshbon kod mier matindo mage. 26Hesbon ne dala maduong’ mar Sihon ruodh jo-Amor, mane oyudo osekedo gi ruodh Moab machon, mi okawo pinye nyaka aora Arnon. 27Mano emomiyo jower nochuogo wer niya,
“Biuru Heshbon, biuru!
Wageruru dala Sihon obed kaka chon,
28 #
Jer 48.45, 46. nimar mach nomuoch Heshbon!
Ee, mach noliel e dala Sihon.
Noketho Ar dala Moab,
kendo notieko gode mag Arnon.
29A yaye Moab!
Uromo, un jo-Kemosh.#21.29 Kemosh en nyasaye moro mane jo-Moab lamo.
Kemosh oseriembo yawuote, moringo,
kendo osemiyo Sihon ruodh Amor omako nyige.
30Nyikwagi orumo, chakre Heshbon nyaka Dibon,
to mach pod liel kochomo Medeba!”
31Kamano jo-Israel nokawo piny jo-Amor, modakie.
Jo-Israel oloyo Og ruodh Bashan
(Rapar mar Chik 3.1-11)
32Eka Musa nooro joote mondo odhi ocheng Jazer, mi jo-Israel nokawe, kaachiel gi mier matindo mage, kendo ne giriembo jo-Amor mane oyudo odak kuno. 33Bang’e ne giwichore mi giluwo yo mochomo Bashan. Og ruodh Bashan kod joode duto nobiro Edrei, mondo oked kodgi. 34To Ruoth Nyasaye nowacho ni Musa niya, “Kik iluore, nimar asechiwe e lweti, kaachiel gi joge duto kod pinye. Timne mana kaka nitimo ni Sihon ruodh jo-Amor, mane odak Heshbon.” 35Kamano jo-Israel nonego Og kaachiel gi yawuote kod joge duto, nyaka ne onge kata ng’at achiel modong’, mi ne gikawo pinye gidakie.
Currently Selected:
Kwan 21: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.
