Mathayo 4
4
Satan otemo Yesu
(Mariko 1.12-13; Luka 4.1-13)
1 #
Hib 2.18; 4.15. Bang’ mano, Roho notero Yesu nyaka e thim, mondo Satan oteme. 2Notueyo chiemo kuom ndalo piero ang’wen, odiechieng’ kotieno mi nodenyo. 3Eka Satan nobiro ire, mowachone niya, “Ka in Wuod Nyasaye adier, to nyis kitegi mondo olokre kuon.” 4#R.Chik 8.3.To Yesu nodwoke niya, “Muma wacho ni, ‘Dhano ok nyal bedo mangima nikech chiemo kende, to obedo mangima gi weche duto mawuok e dho Nyasaye.’ ”
5Bang’e Satan notero Yesu Jerusalem, Dala Maler, mi okete e osuch Hekalu. 6#Zab 91.11, 12.Nowachone niya, “Ka in Wuod Nyasaye adier, to chikri piny, nikech Muma wacho ni,
‘Nyasaye noket malaikane mondo oriti.
Ginitayi gi lwetgi,
mondo kik ichwany tiendi e kidi.’ ”
7 #
R.Chik 6.16. Yesu nodwoke niya, “To Muma wacho bende ni, ‘Kik item Ruoth Nyasachi.’ ”
8Eka Satan ne ochako okawe, motere ewi got marabora, monyise pinje duto manie piny, kowuorore kaka gidongo. 9Nowachone niya, “Magi duto abiro miyi, ka igoyo chongi piny, milama.” 10#R.Chik 6.13.To Yesu nodwoke ni, “Dhi kucha, Satan! Muma wacho ni, ‘Ng’ato nyaka lam mana Nyasache, kendo en kende ema nyaka otine.’ ” 11Bang’ mano, Satan noweyo Yesu mi malaika nobiro motiyone.
Yesu ochako tije e piny Galili
(Mariko 1.14-15; Luka 4.14-15)
12 #
Math 14.3; Mar 6.17; Luka 3.19, 20. Kane Yesu owinjo ni Johana osetue, nowuok modok Galili. 13#Joh 2.12.To ne oa Nazareth, mi odhi odak Kapernaum, dala manie dho nam Galili, e piny Zebulun gi Naftali. 14Mano notimore mondo gima janabi Isaya okoro otimre. 15#Isa 9.1, 2.Isaya nosewuoyo kuom piny Zebulun gi piny Naftali man yo podho chieng’ mar aora Jordan, e yo madhi nam Mediterania, tiende ni Galili piny Ogendini. Nowacho niya,
16“Oganda mane odak e mudho oseneno ler maduong’.
Adier, ler oserieny kuom joma ne obet e piny motimo tipo mar tho.”
17 #
Math 3.2. Chakre kindeno, Yesu nochako lando wach, ka nyiso ji niya, “Lokuru chunyu, nikech Loch Polo chiegni.”
Yesu oluongo olupo ang’wen
(Mariko 1.16-20; Luka 5.1-11)
18Kane oyudo Yesu wuotho e dho nam Galili, noneno owete ariyo ma jolupo, ka chiko rech e nam gi tol. Ne gin Simon miluongo ni Petro, gi Andrea owadgi. 19Yesu nowachonigi niya, “Luwauru, mondo kar yuayo rech to atimu joywa ji.” 20Gikanyono ne giweyo tondegi, mi giluwe. 21Kane oa kanyo modhi nyime, ne oneno owete mamoko ariyo, ma Jakobo gi Johana, yawuot Zebedi. Ne ginie yie gi wuon-gi, ka giloso tondegi. Yesu noluongogi, 22kendo gi kanyono ne giweyo yie gi wuon-gi, mi giluwo Yesu.
Yesu opuonjo ji, kendo ochango joma tuo
(Luka 6.17-19)
23 #
Math 9.35; Mar 1.39. Yesu nowuotho e piny Galili duto, ka puonjo ji e utgi mag lemo. Nolando Wach Maber mar Loch Nyasaye, kendo nochango ji duto man gi tuoche mopogore opogore. 24Humbe nolak e piny Siria duto, omiyo ji nokelone joma nigi tuoche mopogore opogore, gi joma rem ohingo, kaka joma nigi jochiende gi jondulme kod joathany, mi nochangogi duto. 25Ji mang’eny noluwe. Ne gia Galili gi Dekapoli gi Jerusalem gi Judea kod piny man loka Jordan.
Currently Selected:
Mathayo 4: DHO15
Highlight
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.