Luka 6
6
Wach Sabato
(Mathayo 12.1-8; Mariko 2.23-28)
1 #
R.Chik 23.25. Chieng’ Sabato moro, kane Yesu wuotho e puothe mag ngano, jopuonjrene nochako jako wi ngano, kendo dunyo e lwetgi ka gichamo. 2Mano omiyo jo-Farisai moko nopenjogi niya, “Ang’o momiyo utimo gima Chikwa okwero ni kik tim chieng’ Sabato?” 3Yesu nodwokogi ka penjogi niya, “Pok usomo gima ne Daudi otimo chieng’ mane kech kaye, kaachiel gi joge? 4#T.Lawi 24.9.#1 Sam 21.1-6.Donge ne odhi e Od Nyasaye, mokawo makati miketo e nyim Nyasaye, mi ochamo, kendo omiyo joge bende? To Chikwa okwero ni ng’ato ang’ata ok nyal chamo makatino mak mana jadolo.” 5Eka nowachonigi niya, “Wuod Dhano en ruodh Sabato bende.”
Yesu ochango ng’at ma lwete otal
(Mathayo 12.9-14; Mariko 3.1-6)
6Chieng’ Sabato machielo, Yesu nodhi e od lemo, mopuonjo ji. Ng’ato ne ni kanyo ma lwete korachwich otal. 7To noyudo jopuonj Chik moko kod jo-Farisai rango Yesu mondo gine ane konyalo chango ng’ato chieng’ Sabato, mondo giyud gima digidonjnego. 8To Yesu nong’eyo paro ma gin-go, omiyo nowacho ni ng’at ma lwete otalno niya, “Chung’, mondo ibi nyime ku.” Ng’atno noa malo, modhi ochung’ nyime kanyo. 9Eka Yesu nowachonigi ni, “Koro apenjou! Ere gima Chikwa oyienwa timo chieng’ Sabato? Timo gima ber, koso timo gima rach? Reso ngima ng’ato koso ketho ngimane?” 10Eka norangogi giduto, mowacho ni ng’atno ni, “Rie lweti.” Ng’atno notimo kamano, mi lwete ochango. 11To mirima mager nomako jogo, mi gichako pimo wach ka giparo gima digitim ni Yesu.
Yesu oyiero joote apar gariyo
(Mathayo 10.1-4; Mariko 3.13-19)
12E kindeno, Yesu nowuok odhi ewi got moro mondo olem, moriyo kuno otieno duto, kolamo Nyasaye. 13Kane piny oru, noluongo jopuonjrene, moyiero apar gariyo kuomgi, mi ochako ni joote. 14Ne gin: Simon ma bende ne ochako ni Petro, kod Andrea owadgi, kaachiel gi Jakobo gi Johana gi Filipo gi Bartholomayo 15gi Mathayo gi Thoma gi Jakobo wuod Alfayo, gi Simon mane iluongo ni, ‘Jakedo ni Piny’, 16gi Judas Iskariot, mane odoko jandhok Yesu.
Yesu opuonjo ji, kendo ochangogi
(Mathayo 4.23-25)
17Yesu nolor kodgi piny, mi ochung’ kama opie. Ne nitie oganda maduong’ mar jopuonjrene mamoko kanyo, kaachiel gi ji mang’eny ahinya, mowuok e piny Judea duto kod Jerusalem kaachiel gi gweng’ mar Turo gi Sidon manie dhonam. 18Ne gibiro mondo giwinj puonjne, kendo mondo ochanggi kuom tuochegi. Joma ne nigi jochiende maricho bende nochango. 19Ji duto notemo mondo omul Yesu, nikech teko ne wuok kuome kachangogi giduto.
Joma ogwedhi kod joma okuong’
(Mathayo 5.1-12)
20Yesu norango jopuonjrene, mowachonigi niya,
“Mano kaka un johawi, un joma odhier, nikech gueth mar Loch Nyasaye en maru!
21“Un johawi, un joma kech kayo ndalogi, nikech unuyieng’!
“Un joma ywak ndalogi, un johawi, nikech ununyier!
22 #
1 Pet 4.14. “Adier, un johawi ka ji mon kodu, kendo kwedou, kendo yanyou kawacho ni un joma richo, nikech uyie kuom Wuod Dhano! 23#2 W.Nda 36.16; Joote 7.52.Beduru mamor ka gigo timorenu, kendo mieluru gi mor, nikech okannu pok maduong’ e polo. Kweregi bende notimo mana kamano ni jonabi.
24“To mano kaka unune malit, un jomwandu, nimar useyudo poku!
25“Mano kaka unune malit, un joma oyieng’ e ndalogi, nimar kech nokau!
“Mano kaka unune malit, un joma nyiero e ndalogi, nimar unubed mokuyo kendo unuywagi!
26“Mano kaka unune malit ka ji duto pakou, nimar kwereu nopako jonabi mag miriambo mana kamano.
Puonj kuom hero wasigu
(Mathayo 5.38-48; 7.12a)
27“To un joma winjo wachna, awachonu ni, nyaka uher wasiku, kendo utim maber ni joma mon kodu. 28Guedhuru joma kuong’ou, bende lamuru Nyasaye ni joma yanyou. 29Ka ng’ato othalo lembi konchiel, to lokne komachielo bende, kendo ka ng’ato okawo kotini, to miye koda sadi bende. 30Bende ka ng’ato okwayi gimoro, to kik itamri, kendo ka ng’ato okawo giri, to kik ibandhe ni mondo odwoknigo. 31#Math 7.12.Timuru ni jowadu mana kaka duher mondo gin bende gitimnu.
32“Ka uhero mana joma oherou, to koro ere ber mutimo? Kata mana joricho bende ohero joma oherogi! 33To bende kutimo maber mana ni joma timonu maber, to koro ere ber mutimo? Kata mana joricho bende timo kamano! 34Koso ka uholo mana joma uparo ni biro dwokonu gik ma uhologi, to koro ere gima ber mutimo? Kata mana joricho bende holo joricho wetegi, ka gigeno ni biro dwokonigi! 35To un nyaka uher wasiku, kendo utimnigi maber, bende nyaka uhol giu ka ok ugeno ni didwoknugi. Eka unuyud pod maduong’ kendo unubed nyithind Ngama Duong’ Moloyo. En ong’won ni joma ok gone erokamano, bende ong’won ni joricho. 36Omiyo beduru mang’won mana kaka Wuonu ng’won.
Puonj kuom ng’ado ni ji bura
(Mathayo 7.1-5)
37“Kik ung’ad ni ji bura, eka ok nong’adnu bura! Kik udonj ni ji, eka un bende ok nodonjnu. Weuru ni ji richogi, eka un bende nowenu richou. 38Chiwuru, eka un bende nomiu. Unuyud rapim mopong’ thich, moiki, kendo motiel moo oko, nimar rapim ma upimoe ema un bende nopimnue.”
39 #
Math 15.14. Eka nogoyonigi ngero niya, “Ere kaka muofu nyalo telo ni muofu wadgi? Donge kotimo kamano, to giduto digipodhi e bugo? 40#Math 10.24, 25; Joh 13.16; 15.20.Jopuonjre ok nyal loyo japuonjne, to ka ng’ato osepuonjore gik moko duto, eka onyalo bedo marom gi japuonjne.
41“Marang’o ineno mana pilni yath manie wang’ wadu, to yath maduong’ manie wang’i iwuon, to otami neno? 42Ere kaka diwach ni wadu ni, “Owadwa, we agolni pilni yath manie wang’i, ka in iwuon ok ine yath manie wang’i? In miwuondori awuondani! Kwong igol yath maduong’ manie wang’i iwuon, eka inine maler mondo igol pilni yath manie wang’ wadu!
Ngech yath gi olembe
(Mathayo 7.16-20; 12.33-35)
43“Onge yath maber manyago olemo maricho. Kamano bende onge yath marach manyago olemo mabeyo, 44#Math 12.33.nimar yath ka yath ing’eyo mana gi olemo monyago. Ok inyal pono ng’owo kuom yadh kudho; mzabibu bende ok pon kuom otagalo. 45#Math 12.34.Kamano ng’at maber golo gik mabeyo kuom mwandu mabeyo manie chunye, kendo ng’at marach golo gik maricho kuom mwandune maricho, nikech gik mopong’o chuny ng’ato ema dhoge wacho.
Ngech jogedo ariyo
(Mathayo 7.24-27)
46“Ere gima omiyo uluonga ni, ‘Ruoth, Ruoth’, to ok utim gima awachonu? 47Koro adwaro nyisou kaka ng’at mobiro ira, mi owinjo wachna kendo omako, chalo. 48Ochalo gi ng’at ma, kane gero ot, to okunyo bur matut, nyaka ewi lwanda, eka oketo mise. Bang’e ohula nobiro, momwomore kuom odno, to ne ok nyal muke, nikech nogere motegno. 49To ng’at mowinjo wachna, to ok omako, chalo gi ng’at mane ogero agera ot e lowo, to ok oketo mise motegno. Kane ohula omwomore kuom odno, to opodho mana gikanyono. Mano kaka noruombre piny matek!”
Currently Selected:
Luka 6: DHO15
Highlight
Share
Copy
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.