Jo-Hibrania 5

1Jodolo madongo duto iyiero kuom ji, kendo iketogi mondo giti ni ji e nyim Nyasaye, ka gichiwo mich gi misengni migologo richo. 2Ginyalo dembo joma kia kod joma orwenyo, nikech gin giwegi bende nyawo obembogi e yore mang’eny. 3#T.Lawi 9.7.Mano emomiyo nyaka gitim misengni ma gigologo richogi giwegi mana kaka gitimo ni ji. 4#Wuok 28.1.Bende onge ng’ama nyalo yierore kende owuon mondo okaw tich maduong’ mar bedo jadolo maduong’, to Nyasaye kende ema yiero ng’ato, mi ket jadolo, mana kaka noketo Harun. 5#Zab 2.7.Kamano bende Kristo ne ok oyierore kende owuon mondo okaw duong’ mar bedo jadolo maduong’, to Nyasaye ema nokete jadolo maduong’ kawachone ni,

“In e Wuoda,

tinendeni asedoko Wuoru,”

6 # Zab 110.4. Muma wacho bende kamoro machielo niya,

“In jadolo nyaka chieng’

e kit tich dolo mar Melkizedek.”

7 # Math 26.36-46; Mar 14.32-42; Luka 22.39-46. E ndalo mane Yesu odak e pinyni ka dhano, ne olemo, kendo osayo Nyasaye mane nyalo rese e tho, ka oywak malit, kendo pi wang’e chuer. Nyasaye nowinjo ywakne nikech dembruokne. 8Kata obedo ni ne en Wuod Nyasaye kamano, to nopuonjore winjo wach kuom masiche mane oneno, 9Kendo kane osebedo ng’ama kare chuth, nodoko jakel warruok mosiko ni ji duto mawinjo wachne, 10mi Nyasaye nochake ni Jadolo Maduong’ e kit tich dolo mar Melkizedek.

Siem kuom weyo Nyasaye

11Wan gi weche mathoth ma dwawachnu kuom Melkizedek, to tugo tiendgi tek, nikech itu nok. 12#1 Kor 3.2.Tinde onego ubed jopuonj, to pod udwaro mana ng’ama puonjou nonro mar wach Nyasaye. Kar chamo chiemo motegno, to chak ema pod udwaro! 13To ng’at mamadho mana chak kende pod en mana nyathi makwar, ma ok ong’eyo puonj man kuom wach makare. 14Joma dongo to chamo chiemo motegno, nikech gisepuonjore, mi ging’eyo pogo gik mabeyo gi gik maricho.

Currently Selected:

Jo-Hibrania 5: DHO15

Highlight

Copy

Compare