Rapar mar Chik 18

Pok ma jodolo gi jo-Lawi yudo

1“Jodolo ma jo-Lawi, tiende ni dhood Lawi duto, ok noyud pinygi giwegi kaka dhout Israel mamoko. Ginibed ka giyudo pokgi mana kuom misengni motim ni Ruoth Nyasaye, kendo kuom dir mwandu muchiwo ni Ruoth Nyasaye. 2#Kwan 18.20.Kaka ok giniyud piny mopognigi ka mwandugi, Ruoth Nyasaye owuon ema nobed mwandugi kaka nosingore. 3Ka ji timo misango gi rwath kata gi rombo kata gi diel, to nyaka gimi jadolo bat gi lem duto kod chino kaka lembgi. 4Bende nyaka umigi cham mukwongo kayo gi divai mukwongo loso, gi mor zeituni mokwongo nyak, kaachiel gi yie rombu mukwongo ng’ado, 5nimar Ruoth Nyasaye ma Nyasachu oseyierogi kuom dhoutu duto mondo gin kaachiel gi nyikwagi giti e nying Ruoth Nyasaye nyaka chieng’.

6“Ka ja-Lawi moro modak e achiel kuom miech Israel obiro kuom herone kama Ruoth Nyasaye biro yiero, 7mi otiyo tich dolo e nying Ruoth Nyasaye ma Nyasache kaka jo-Lawi wetene ma tiyo e nyim Ruoth Nyasaye kanyo, 8to nyaka oyud pok maromre kodgi, ka ok okwan mwandu monego ocham e dala wuon mare.

Nyasaye osiemo jo-Israel ni kik giluw timbe ogendini mamoko

9“Kusedonjo e piny ma Ruoth Nyasaye ma Nyasachu biro miyou, to kik upuonjru luwo timbe makuero mag ogendini mamoko modak e pinyno. 10#T.Lawi 19.26; Wuok 22.18.Kik uyie ni ng’ato kuomu wang’ wuode kata nyare ka gir misango. Bende kik bedie jakor kata jambofwa kata jadil kata jandagla 11#T.Lawi 19.31.kata ajuok nyakalondo kata japenj jochiende wach. 12Joma kamago Ruoth Nyasaye okwedo, kendo timbegi makuerogo ema omiyo Ruoth Nyasaye ma Nyasachu riembo ogendinigo mondo owenu thuolo. 13#Math 5.48.Ruoth Nyasaye ma Nyasachu dwaro mondo utine gi chunyu duto.

Nyasaye osingore ni nomi jo-Israel janabi machal gi Musa

14“Ogendini ma ubiro kawo pinygigo oyie gi weche jombofwa kod weche jokor, to un, Ruoth Nyasaye ma Nyasachu okwerou ni kik utim gik ma kamago. 15#Joote 3.22; 7.37.Ruoth Nyasaye ma Nyasachu noyier janabi moro ka an kuom jou uwegi, kendo nyaka uwinj wachne. 16Mano e gima nukwayo Ruoth Nyasaye ma Nyasachu chieng’ mane uchokore Horeb, kuwacho niya, ‘Owinjore kik wachak wawinj dwond Ruoth Nyasaye ma Nyasachwa, bende ok onego wachak wane mach maduong’ kama kendo, nono to wabiro tho.’ 17Eka Ruoth Nyasaye nowachona niya, ‘Gima giwachono ni kare. 18Abiro yieronigi janabi kaka in, kuom ogandagi giwegi. Abiro keto wechena e dhoge, kendo enowachnigi weche duto ma achike. 19#Joote 3.23.Ng’ato ang’ata modagi winjo wachna ma janabino wacho, to noyal. 20To janabi ma nohedhre wacho wach moro e nyinga ma ok achike ni mondo owachi, kata ma nowuo e nying nyiseche mamoko, nyaka negi.’ 21To ma e kaka unyalo ng’eyo wach ma ok oa kuom Ruoth Nyasaye: 22Ka janabi owacho wach moro e nying Ruoth Nyasaye to bang’e wachno ok ochopo kare, mano nyiso ni ok en wach Ruoth Nyasaye, to osewuoyo mana gi tekone owuon. Omiyo kik umiye duong’.

Currently Selected:

Rapar mar Chik 18: DHO15

Highlight

Copy

Compare