Rapar mar Chik 10

Kite ariyo mamoko

(Wuok 34.1-10)

1“Ruoth Nyasaye nowachona niya, ‘Pa kite ariyo machal gi mane igoyo piny mobarore kande, mondo ibigo ira ewi got. Bende los sanduk mar bao. 2Weche mane andiko kuom kite mokwongo mane ibaro kande ema abiro ndiko kuom kitego, kendo iniketgi e sandugno.’ 3Kuom mano, naloso sanduk gi yiend shita, kendo napayo kite ariyo machal gi mokwongo ka, mi adhi ewi got kating’o kite ariyogo e lweta. 4Ruoth Nyasaye nondiko kuom kitego chike apar mane osewachonu gie mach ewi got chieng’ chokruok, mana kaka nosendiko e kite mokwongo ka, mi nomiyagi. 5Eka nadwogo iru kaa ewi got, mi aketo kitego ei sanduk mane aloso, kaka Ruoth Nyasaye nochika, kendo gisebedo kanyo nyaka chil kawuono.

6 # Kwan 20.28; 33.38. “Jo-Israel noa e gweng’ sokni mag jo-Jaakan, mi giwuotho matintin ka gidhi Mosera. Eka Harun notho, moyike kuno, mi Eleazar wuode, nodoko jadolo kare. 7Ne gia kuno, mi gidhi Gudgoda. Eka ne gia Gudgoda, mi gidhi Jotbatha, piny motimo aore.

8 # Kwan 3.5-8. “E kindego Ruoth Nyasaye nowalo jo dhood Lawi mondo obed joting’ Sandug Muma mare, kendo obed jodolo mage, ka giguedho ji e nyinge, mana kaka pod gitimo nyaka chil kawuono. 9Mano emomiyo jo-Lawi onge gi piny mopognigi ka mwandugi, kaka opog ni dhout Israel mamoko. Ruoth Nyasaye ma Nyasachu owuon e mwandugi, mana kaka nosesingorenigi.

10 # Wuok 34.28. “Nabet ewi got kuom ndalo piero ang’wen odiechieng’ gotieno, mana kaka nasetimo mokwongo, mi Ruoth Nyasaye nochako owinjo kwayona moyie ni ok obi tiekou. 11Nowachona niya, ‘Chak wuoth kitelo ni ji, mondo gidhi gikaw piny mane asingora ni nami kweregi.’

Gik ma Nyasaye dwaro kuom joge

12“Koro un jo-Israel, ang’o ma Ruoth Nyasaye ma Nyasachu dwaro kuomu? Donge odwaro mana ni mondo uluore kendo uwuoth e yorene duto, kuhere kendo kutiyone gi chunyu duto? 13Ubiro timo kamano kurito chikene gi buchene duto, ma amiyou kawuono mondo okonyu. 14Ruoth Nyasaye ma Nyasachu e wuon polo duto, kata polo man malo manadi, kaachiel gi piny bende kod gik moko duto manie iye. 15To kata kamano, Ruoth Nyasaye ne pod rito kwereu nikech noherogi, mi bang’gi noyiero mana un nyikwagi kuom ogendini moko duto mondo ubed joge, kaka pod ubet nyaka chil kawuono. 16Kuom mano, koro nyaka uyie mako singruok gi chunyu duto, kendo kik umed bedo joma tokgi tek, 17#1 Timo 6.15; Fweny 17.14; 19.16; Joote 10.34; Rumi 2.11; Gal 2.6; Efes 6.9.nimar Ruoth Nyasaye ma Nyasachu en Nyasaye moloyo nyiseche duto, kendo Ruoth moloyo ruodhi duto. En Nyasaye maduong’ kendo malich miwuoro. En kende e Nyasaye miluoro, ma ok dew wang’ ng’ato, kendo ma ok cham asoya. 18To ong’ado bura kare ni mond liete, kendo ni nyithi kiye. Ohero jodak, kendo omiyogi chiemo gi lewni. 19Omiyo un bende onego uher jodak man kuomu, nimar un bende ne un jodak e piny Misri. 20Nyaka uluor Ruoth Nyasaye ma Nyasachu, kendo ulame gi chunyu duto, bende kukuong’oru mana gi nyinge. 21En ema nyaka upake, nimar en Nyasachu mosetimonu timbe madongo kendo malich, ma useneno gi wang’u. 22#Chak 46.27; Chak 15.5; 22.17.Kane kwereu odhi Misri, ne gin mana ji piero abiriyo kende, to koro Ruoth Nyasaye osemiyo unya ka sulue mae polo.

Currently Selected:

Rapar mar Chik 10: DHO15

Highlight

Copy

Compare