Jo-Kolosai 3

1 # Zab 110.1. Osechieru kaachiel gi Kristo ua kuom joma otho, omiyo nyaka uket chunyu kuom gik man malo, kuma Kristo obetie e bat korachwich mar Nyasaye. 2Chomuru parou kuom gik man malo, to ok kuom gik mag piny, 3nikech usetho, kendo ngimau koro osepand gi Kristo kuom Nyasaye. 4Kristo e ngimau maradier, kendo ka ochako oduogo, to un bende unubi kode e duong’ne maler.

Ngima machon kod ngima manyien

5Emomiyo neguru dhano machon gi timbene duto mag piny ka, kaka terruok, gi dwanyruok, gi hera marach, gi gombo marach, kod ich lach ma en mana lamo nyiseche manono, 6nikech weche ma kamago ema miyo Nyasaye olo mirimbe kuom joma otamore yie kuome. 7Un bende ne uluwo timbe ma kamago e ngimau machon. 8To koro kaka jo-Kristo, nyaka uwe timbego duto, kaka: ichwang’, gi mirima, gi himruok, gi ayany, kod weche mochido. 9#Efes 4.22.Kik ng’ato wuond wadgi, nimar uselonyo dhano machon gi timbene, 10#Efes 4.24; Chak 1.26.mi urwako dhano manyien mamedo doko manyien pile, mondo obed machal gi kit jachwechne, mi omi ung’e Nyasaye chuth. 11E ngimau manyienni, onge ja-Yahudi kata ng’ama ok ja-Yahudi; onge ng’ama oter nyangu kata ng’ama ok oter nyangu. Kendo onge misumba kata ng’ama ni thuolo. Bende onge ng’ama ok osomo gi jamaranda. To Kristo en duto kendo kuom duto.

12 # Efes 4.2. Emomiyo, kaka Nyasaye oseyierou mondo ubed joge owuon mohero, nyaka ubed gi miwafu, gi ng’wono, gi bolruok, gi muolo kod horuok. 13#Efes 4.32.Beduru jogo ma ng’wono ni joma timonigi marach, to kik ubed joma mako sadha gi jowadgi. Ruoth oseweyonu richou, omiyo un bende nyaka uwe ni joma timonu marach. 14To ewi mago duto, to beduru gi hera, nikech hera ema riwo gik moko duto bedo achiel chuth. 15Kue ma Kristo chiwo ema mondo obed jang’ad bura e chunyu, nikech kue nogo ema ne Nyasaye oseluongoue kaachiel e ringruok achiel. Omiyo gouru erokamano mogundho. 16#Efes 5.19, 20.Wach Kristo, gi gueth duto mokelo, mondo odag e chunyu. Puonjreuru kendo jiwreuru gi rieko duto. Weruru mamit e chunyu ni Nyasaye, kugoyone erokamano gi wende Zaburi gi wende pak kod wende mag chuny. 17Gimoro amora ma uwacho kata utimo onego obedi e nying Ruoth Yesu, kugoyoni Nyasaye Wuoro erokamano e nyinge.

Kaka jo-Kristo onego odag gi jomoko

18 # Efes 5.22; 1 Pet 3.1. Un mon, winjuru chwou, nimar mano e gima joma obedo kuom Ruoth onego tim.

19 # Efes 5.25; 1 Pet 3.7. Un chwo, heruru mondu, kendo kik ubed mager kodgi.

20 # Efes 6.1. Un nyithindo, winjuru jonywolu e weche duto, nikech mano ema long’o ni Nyasaye, kendo en gima joma obedo kuom Kristo onego tim.

21 # Efes 6.4. Un jonywol, kik ulwer nyithindu, nikech dipo ka chunygi ojok.

22 # Efes 6.5-8. Un wasumbini bende, winjuru chutho ruodhiu mae pinyni, kendo ka utiyo, to kik uti mana ni mondo ji oneu, ka gima udwaro bedo malong’o ni ji, to keturu chunyu e tichu, nikech uluoro Ruoth 23Gimoro amora mutimo, to timuru gi chunyu duto, mana ka gima utiyo ni Ruoth, to ok ni dhano, 24kung’eyo ni Ruoth ema nomiu pok mosesingore ni joge, nimar Kristo e Ruoth mutiyone. 25#R.Chik 10.17; Efes 6.9.Ng’at matimo marach kata da bed ni en ng’ama nadi, noyud pok kuom rach mosetimo, nikech Nyasaye yalo ji duto mana machalre, ka ok odewo wang’ ng’ato.

Currently Selected:

Jo-Kolosai 3: DHO15

Highlight

Copy

Compare