1 Timotheo 2

Lemo e chokruok mar jo-Kristo

1Koro wach mokwongo ma akwayo en ni mondo ji oter ywakgi ir Nyasaye ka gilemo kendo ka gisayo ni ji duto, kendo gigoyo erokamano. 2Nyaka gilem ni ruodhi gi jotelo duto, mondo wadag e ngima mokue kendo moboch, kwaluoro Nyasaye, kendo ka wan joma odimbore chuth. 3Lemo ma kamago en gima ber kendo malong’o ni Nyasaye Jawarwa, 4ma dwaro mondo ji duto okwo, kendo ong’e adiera. 5Nyasaye en achiel, to e kinde kod ji bende nitie jagach achiel, ma en Yesu Kristo, ma bende en dhano kaka ji. 6En ne ochiwore mondo owar ji duto. Kamano kane kinde mowinjore ochopo, to nonyiso ratiro ni Nyasaye dwaro waro ji duto. 7#2 Timo 1.11.Mano emomiyo noketa jaote, mondo aland wachno, kapuonjo joma ok jo-Yahudi wach mar yie maradier. Ok ariambi, to awacho adiera!

8Emomiyo adwaro ni mondo kamoro amora ma ji ochokoree e lemo, to chwo ema mondo olem. To nyaka gibed joma ler, manyalo ting’o luetgi malo kaonge gi mirima kata mbaka moro e chunygi. 9#1 Pet 3.3.Mon bende onego rwakre gi lewni mowinjore, ka gibidhore kendo giritore kare. Rwakruokgi kik bed mana mar kado wich, kata mar dhahabu, kata kite mabeyo, kata lewni ma nengogi tek, 10to onego girwakre gi timbe mabeyo kaka owinjore gi mon ma wacho ni oluoro Nyasaye. 11Mon mondo opuonjre koling’, kendo koyie winjo wach. 12Ok ayie mondo dhako opuonj ji kata mondo otel ni chwo, to ber mondo oling’, 13#Chak 2.7; Chak 2.21, 22.nikech Adam ema nochue mokwongo, eka ochue Hawa. 14#Chak 3.1-6.Bende ok Adam ema ne owuondi, to Hawa ema nowuondi modoko jaketho. 15To kata kamano, dhako noyud resruok e yor nywolo nyithindo, ka osiko e yie gi hera gi puodhruok kod ritruok.

Currently Selected:

1 Timotheo 2: DHO15

Highlight

Copy

Compare