1 Petro 2
2
Kidi mangima kod oganda maler
1Kuom mano, weuru richo duto, kaka ich lit, gi wuond, gi gango wach gi nyiego kod ayany. 2Kaka nyithindo mayom gombo cha minegi, e kaka un bende onego ugomb chak maliw mar chuny, mamiyo udongo nyaka chop e warruok, 3#Zab 34.8.nimar kaka Muma wacho, usebilo ng’wono mar Ruoth. 4Omiyo biuru ire. En kidi mangima mane ji odagi ni onge tich. Nyasaye to ne oyiere, kendo omiye duong’. 5Biuru ire ka gima un kite mangima, mondo ubed jodolo maler matimo misengni mag chuny ma Nyasaye oyiego kuom Yesu Kristo, 6#Isa 28.16.kaka Muma wacho niya,
“Neuru, aketo kidi moyier e Sayun.
En kidi motegno man gi duong’ moriwo kor ot.
Ng’at moyie kuome to ok none wichkuot.”
7 #
Zab 118.22. Un joma uyie ema ung’eyo ni kidino nengone tek, to joma ok oyie to,
“Kidi mane jogedo odagi osedoko kidi motegno moriwo kor ot.”
8 #
Isa 8.14, 15. Muma kama chielo to wacho ni,
“En e kidi mabiro chwanyo ji;
Lwanda ma nomi gipodhi.”
Gichwanyore nikech gidagi winjo Wach Maber. Mano e gima ne Nyasaye owalonigi.
9 #
Wuok 19.5, 6; Isa 43.20;
Wuok 19.5; R.Chik 4.20; 7.6; 14.2; Tito 2.14;
Isa 43.21;
Isa 9.2. To un e dhoot moyier, kendo kanyakla mar jodolo mag Ruoth, kod oganda maler ma Nyasaye okawo ka joge, mondo oland timbe madongo mag Jal mane oluongou ua e mudho, mi okelou e lerne miwuoro!
10 #
Hos 2.23. “Chon ne ok un oganda kata matin,
to tinde un oganda Nyasaye.
Chon ne un mabor gi ng’wono mar Nyasaye,
to koro useyudo ng’wonone.”
Wasumb Nyasaye
11Osiepena, akwayou ni kaka un welo kendo jodak e pinyni, beduru motang’ gi gombo mag ringruok makedo gi chunyu pile. 12Timu onego obed maber ahinya e nyim joma ok oyie, mondo kata obedo ni gihangou ni un joma richo, to gine timbeu mabeyo, mi gipak Nyasaye chieng’ ma obiroe ng’ado bura.
13Winjuru chike duto ma joloch oketo, nikech uhero Ruoth Yesu. Adier, rituru chike mag ruodh piny, ma en ng’ama duong’ moloyo, 14kendo rituru bende chike mag jotelo ma gin joma en ema oketo mondo okum joma ketho, to opak joma timo maber. 15Nyasaye dwaro mondo timbeu mabeyo omak dho joma ofuwo makia. 16Beduru joma ni thuolo, to kik ulok thuolo ma un-go bed gima uumogo richou, to beduru wasumb Nyasaye. 17Miuru ji duto duong’, kendo heruru oweteu kuom Ruoth. Luoruru Nyasaye, to ruodh piny bende miuru duong’.
Kaka ne Yesu odhil e masira
18Un wasumbni, nyaka uwinj ruodhiu kumiyogi luor duto, bed ni gin jomamuol kendo mabeyo, kata gin joma kwiny. 19Ka ng’ato ong’eyo ni Nyasaye ni kode, kendo mano omiyo odhil e sandruok moyudo, kata obedo ni onge ketho moro mosetimo, to mano e gima Nyasaye oyiego. 20Ere pak ma unyalo yudo ka udhil kichwadou kuom ketho musetimo? To kudhil kisandou nikech usetimo gima ber, to mano e gima Nyasaye oyiego. 21Mano e gima Nyasaye noluongou mondo utim, nimar Kristo owuon bende nosandore nikech un, mi oweyonu ranyisi mondo uluw timne., 22#Isa 53.9.Muma wacho niya,
“Ne ok otimo richo,
bende miriambo ne ok owuok e dhoge.”
23 #
Isa 53.7. Kane oyanye, to ne ok oyenyo,
kendo kane oneno masira,
to ne ok osiemo ng’ato,
to nochiwore e lwet Jal mang’ado bura kare.
24 #
Isa 53.5, 6. En owuon ne oting’o richowa e ringre e msalaba, mondo watho ni richo, eka wabed mangima ni tim makare, kendo osechangu mana nikech chwat mane ochwadego. 25Ne oyudo ulal ka rombe, to koro useduogo ir Jakwadhu, kendo Jarit chunyu.
Currently Selected:
1 Petro 2: DHO15
Highlight
Copy
Compare
Share
Want to have your highlights saved across all your devices? Sign up or sign in
Dholuo DC Bible © Bible Society of Kenya and Bible Society of Tanzania, 1976.
