Ecclesiasticus 4
4
CAIB. IV.
1A mhic, na meall an duine bochd a thaobh a bheathachaidh, agus na toir air na sùilibh feumach fuireach fada.
2Na dean anam ocrach brònach: ni mò a bhrosnaicheas tu duine ʼna àmhghar.
3Na co‑chuir trioblaid ris aʼ chridhe a ta air a chlaoidh: agus na cuir dàil ann an tabhairt dhàsan a ta feumach.
4Na diùlt iarrtas an tì a ta àmhghaireach; ni mò a thionndaidheas tu do ghnùis o ʼn duine bhochd.
5Na tionndaidh air falbh do shùil o ʼn fheumach; agus na toir aobhar da chum do mhallachadh:
6Oir ma mhallaicheas e thu ann an searbhadas ʼanama, éisdear ri ʼùrnuigh leis‑san a rinn e.
7Faigh dhuit fein gràdh a cho‑thionail, agus cròm do cheann ri duine mòr.
8Na cuireadh e doilghios ort do chluas a lùbadh do ʼn duine bhochd, agus thoir freagradh chàirdeil da le macantas.
9Teasairg an tì a ta fulang na h‑eucorach o làimh an fhir‑shàruchaidh; agus na bi faoin‑chridheach ʼn àm duit suidhe a ʼm breitheanas.
10Bi mar athair do ʼn dìlleachdan, agus ann an àite fir‑pòsda dʼ a mhàthair; mar so bithidh tu mar Mhac an Tì a ʼs Airde, agus gràdhaichidh e thu ni ʼs mò na ghràdhaicheas do mhàthair thu.
11Ardaichidh gliocas a clann fein, agus nì i gréim orrasan a dhʼ iarras i.
12An tì a ghràdhaicheas i gràdhaichidh e beatha; agus lìonar iadsan a dhʼ iarras i gu moch le h‑aoibhneas.
13Bithidh glòir mar oighreachd aig an tì a nì gréim daingean oirre; agus beannaichidh an Tighearna i ge bʼ e àit an téid i a steach.
14Iadsan a nì seirbhis di frithealaidh iad do ʼn Tì Naomh; agus gràdhaichidh an Tighearn iadsan a ghràdhaicheas ise.
15Esan a bheir cluas di, bheir e breith air na cinnich; agus gabhaidh esan còmhnuidh gu tèaruinte a dhʼ fhrithealas di.
16Ma bheir duine e fein suas di, sealbhaichidh se i; agus bithidh i aig a ghinealach mar sheilbh.
17Oir aig an toiseach gluaisidh i maille ris air slighibh cama, agus bheir i eagal agus geilt air, agus cuiridh i trioblaid air le a teagasg, gus am feud i dòchas a chur ʼna anam, agus deuchainn a chur air le a laghannaibh.
18An sin pillidh i dʼ a ionnsuidh air an t‑slighe dhìrich, agus bheir i comhfhurtachd dha, agus nochdaidh i dha a nithe dìomhra fein.
19Ach ma théid e a ʼm mearachd, tréigidh si e, agus bheir i thairis e dʼ a sgrios fein.
20Glac an cothrom, agus bi nadʼ fhaiceall roimh ʼn olc; agus na biodh nàire ort an uair a tha ʼn gnothuch ridʼ anam.
21Oir tha nàire ann a bheir peacadh; agus tha nàire ann a ta ʼna glòir agus ʼna gràs.
22Na gabh ri neach sam bith an aghaidh tʼ anama, agus na leig le ùmhlachd duine sam bith a bhi ʼna aobhar duit gu tuiteam.
23Na cùm o bhi labhairt an uair a ta aobhar ann chum maith a dheanamh; agus na foluich do ghliocas ʼna maise fein.
24Oir le còmhradh aithnichear gliocas, agus foghlum le focal na teanga.
25Na labhair air chor sam bith an aghaidh na fìrinn; ach biodh nàir ort air son mearachd t‑aineolais fein.
26Na biodh faiteachas ort do pheacanna aideachadh; agus na co‑éignich slighe na h‑aibhne.
27Na dean thu fein ʼnadʼ ìochdaran do dhuine amaideach; ni mò a ghabhas tu ri pearsadh nan cumhachdach.
28Dean strìth air son na fìrinn gu bàs, agus cogaidh an Tighearna air do shon.
29Na bi bras ʼnad theangadh, agus na bi mall agus màirnealach ʼnadʼ ghnìomharaibh.
30Na bi mar leòmhan ʼnadʼ thigh fein, no amaideach am measg do sheirbhiseach fein.
31Na biodh do làmh air a sìneadh a mach a dhʼ fhaotuinn, agus air a dùnadh an uair bu chòir duit ath‑dhìoladh a dheanamh.
Currently Selected:
Ecclesiasticus 4: MacGAP
Highlight
Copy
Compare
Share
Want to have your highlights saved across all your devices? Sign up or sign in
© Scottish Bible Society 2017
© Comann Bhìoball na h-Alba 2017