腓立比書 2

學基督个榜樣

1所以，既然你等在基督底背个生命使你等較堅強，佢个痛惜鼓勵你等，你等㧯聖靈有交通，你等也有慈悲㧯憐憫个心 #2:1 「有慈悲㧯憐憫个心」抑係譯做「有經驗到上帝个慈悲㧯憐憫」。， 2你等就愛有共同个心志，共樣个愛心，相同个情感，㧯一致个想法，好俾𠊎充滿歡喜。 3毋好自私自利抑係自高自大，反轉愛彼此謙卑，看別人比自家較高明。 4毋好單淨顧自家，也愛關心別人个事。 5你等愛用基督耶穌个心做學習个模範：

6佢本來就有上帝个本質，

總係毋識濫用 #2:6 「濫用」抑係譯做「𢫮𢫮揢等」抑係「盡力爭取」。佢同上帝共樣个特權。

7顛倒，

佢自願放掉一切，

取奴僕个本質。

佢成做人，

用人个形體出現。

8佢自家甘願卑微，

順服到死，

又死在十字架頂。

9所以，

上帝使佢高升到至高，

賜給佢該超過萬名个名；

10使天頂、地上㧯地底下个眾生，

一聽到耶穌个名，

全部就跪落去，

11眾口告白講：

「耶穌基督係主！」

歸榮光給阿爸上帝。

世間个光

12所以，親愛个朋友，𠊎同你等共下个時，你等常常聽從𠊎；這下𠊎無在你等該位，你等還較愛聽𠊎个話。你等愛驚驚轆轆，一直打拚來完成你等自家个得救； 13因為係上帝常常在你等心肝肚運行，使你等又甘願又能實行佢美善个旨意。

14你等無論做麼介，毋好埋怨抑係爭論， 15好使你等成做純潔誠實个人，在這腐敗、罪惡个世代中，做上帝無缺點个子女。你等愛在世間人當中發光，像星仔照光天頂， 16將生命个道傳給佢等。你等若係恁樣做，在基督再來該日，𠊎就有好誇口了，因為這會證明𠊎無走戇路，無做戇事。

17可能𠊎愛用自家个血做祭酒，來淋在你等用信心獻給上帝个祭物頂。若係恁樣，𠊎也盡歡喜，同時，𠊎愛同你等大家分享𠊎个歡喜。 18共樣，你等也愛歡歡喜喜，俾𠊎也分享你等个歡喜。

提摩太㧯以巴弗提

19𠊎靠主耶穌，希望無幾久後，𠊎做得派提摩太去你等該位，將你等个消息帶轉來給𠊎，俾𠊎得到安慰。 20佢係惟一㧯𠊎同心，又正經關心你等个人。 21別人攏總為自家个事打算，無關心耶穌基督个事情。 22總係你等清楚知提摩太个做人：佢同𠊎就像孻仔㧯阿爸，為到福音，共下辛苦工作。 23等𠊎一知自家个結局會樣般个時，𠊎希望派去看你等个就係佢。 24𠊎靠主自信在短時間內也會親身去看你等。

25𠊎想，𠊎應該送𠊎等个兄弟以巴弗提轉你等該位去。你等選派佢來同𠊎𢯭手，共下工作，共下作戰。 26佢當想念你等大家；心肝也盡毋過意，因為知你等聽到佢發病了。 27佢有影識發病，險險死掉。總係上帝憐憫佢，毋單淨憐憫佢，也係憐憫𠊎，俾𠊎毋使堵到更多个憂傷。 28所以，𠊎還較想愛趕緊送佢轉去，使你等歡歡喜喜同佢聚集；恁樣，𠊎个憂傷也會減少。 29你等愛在主个底背歡歡喜喜接待佢。你等愛尊重像佢恁樣个人； 30因為佢為到基督个工作冒生命个危險，險險死掉，為到愛補足你等無法度服事𠊎个所在。

Currently Selected:

腓立比書 2: THV12Hdb

Highlight

Copy

Compare