Ruma 8

Yadringi ki Siri ku tapanianianiakane

1Kaiasasane, kudra lapanianianiake ikai adringi ki niake ki Yesu Kirisitu ku umawmase kai lri kitupasalriu. 2Asi lwiyane ku nikelretane tukakudhane ki Siri, amani ku lrika amaelreane ki umawmase ki Yesu Kirisitu si tarumara ku niake, pwalatadrenga mitane#8.2 “mitane” yakai ku lasidrumane ka hungu ku amia kai “kusu”. patwalai ki pasalrivane si apacadhane ka kakudhane. 3Ku hulrice ki Musi ngwalai ku turamurane ku takaumawmasane ki umawmase la kai maka dulru pangimia, ai ku Twaumase ngiakakamani pangimia. Ku Twaumase siakawlu ki Lalakeini, lakamani ku paikai ku pasalrivane iniane#8.3 paikai ku pasalrivane iniane ku wahunyake madu iya kai “malra kwidra mia mitane ka yakai ku pasalrivane ka kinawmasane”. mia mitane ka umawmase, pakai ku apelaelane tupasalrivane ku yakai adringi ki takaumawmasane ki umawmase ku pasalrivane, si ala mwalra ku pasalrivane. 4Ku tapiane kai ki Twaumase pakai ku aputaluvaivadhane ku takitubiane ki hulrice ikai mitane ka la kai palululudu ki takaumawmasane, ka pasalalaladha ki Siri sikakathane ka umawmase. 5Asi lwiyane, ku pasalaladha ki takaumawmasane ku kidremedremeini, papia ki ngwakai ki kinawmasane ku awngane; ku pasalaladha ki Siri ku umawmase, makalithi ku ngwakai ki Siri ku awngane. 6Ku makalithi ki kinawmasane ki umawmase, ku angimiane lri pacai; ku makalithi ki Siri, lri malra ku niake si sulivatane. 7Lakamani, ku pasalaladha ki takaumawmasane ku umawmase amani ku kiatubadha ki Twaumase; asi lwiyane kai pasalaladha ku kelrete tukakudhane ki Twaumase, si ku patengatengane lai lri kai maka dulru pasalalaladha. 8Ku pasalaladha ki takaumawmasane ku umawmase kai lri maka kikiragai ki Twaumase.

9Ala kunumi, alaiyasi ka patengane ikai adringi numiane ku Ri ki Twaumase, ku tapanianianiakane numi lri kai kiruthuku ki takaumawmasane, lrika Siri ku kiathathengete sikakathane. Ku kadrwa ku Ri ki Kirisitu ku umawmase kaika swakainga ki Kirisitu. 10Ai, ku Kirisitu alaiyasi ikai adringi numiane, adravane pacai ngwalai ki pasalrivane kwini kinawmasane numi, ku Ri ki Twaumase lri papanianiake numiane,#8.10 “ku Ri ki Twaumase lri papanianiake numiane” ku wahunyake madu iya kai “ku Ri numi lri panianianiake”. asi lwiyane ku Twaumase twamadringelresenga numiane. 11Ku Ri ki Twaumase pasiaelane ki Yesu patwalai ki wapacai; alaiyasi ikai adringi numiane kikai Ri, kikai amani ku pasiaela ki Kirisitu patwalai ki wapacai ka Twaumase, lri mialri pangukai kudra yakai adringi numiane ka Siri, si baai ku niake ki kwini ki kai lri kaburau ka kinawmasane numi.

12Lakamani, laretesane, akiameta, ai kaika akiame ki takaumawmasaneta, si lri kipadrekadrekase ki takaumawmasane ku tapanianianiakane. 13Alaiyasi pasalaladhata ki takaumawmasaneta, lri tara pacai; alaiyasi satalu numi ki Siri si papacai ki pasalrivane, lri tara panianiake numi. 14Sanaka kiarake ki Siri ku umawmase lalalake ki Twaumase makanaelre. 15Asi lwiyane, ku baai ki Twaumase ku Ri kai lri tuduri numiane, si kirimu numi mukuludru iniane, lri malra numiane paalalalake ki Twaumase. Pangukai ki Siri, papiata ki Twaumase akwadrau iya kai, “Ama! Ka Tamali!” 16Ku Ri ki Twaumase si abaketa mararamau pathingale ka amanita ku lalalake ki Twaumase. 17Kudra lalalakengata ki Twaumase, lri kisupilrita kudra akaesadhane ka padulrudulru pasikai ki laumawmaseini ki Twaumase, lai lri kathadalranengata ki Kirisitu kisupilri ku pasikai ki Twaumase iniane; asi lwiyane, sana kivalata siamece ku sakwalrialri ki Kirisitu, lri kisupilrita ku lriguini.

Lrigu lubibilrili

18Lu kidremedremaku, kaika apasiasipanenga kikai sakwalrialrita kaiasasane lu pakiramavane ki lrika apathingalane si baai mitane kudra lrigu lukabibilrili. 19Sanaka kiabekace siadramadrama turamuru ku lrigu ki Twaumase ku atwaladhane ki lalalakeini utaluvaivai. 20Asi lwiyane kai binekacane patuelre lu akabalrithi ka kadrwanga ku vai, kaika takidremedremane lini, takidremedremane ki Twaumase. Ai, kai nibekacane tasidramane, 21yakai ku vai ku adulrwane katwase kitukudha ki sakerengane kudra ki lri kaburau, si tupapalra kisupilri kudra lrigu ka angilralraingane ki lalalake ki Twaumase. 22Wathingaleta, pakela kaiasasane, patueelre kikai nibekacane kwalrialrialri dadange, miakau yacengecenge ka lri tulalake kiangeangeange. 23Kai ka kathane ku nibekacane ku miyaiya kikai, kuta ka la wamalranga ku baai ki Twaumase ku aswala kalreme ku madru, ka amani kudra tarwamaranga ku Siri ka umawmase, mialri pikidremedreme dadange, ukalavalava ki Twaumase ku asilalakane mitane#8.23 Yakai ku lasidrumane ku kai wapacase kikai “asilalakane mitane”., la lri ngilralraingingata. 24Asi lwiyane ngwalai ki sasiadradrama, la kipalribuluta. Alaiyasi maka dreleta kudra nisidramadramane, kaika patengatengane ka sasiadradrama. Aneane ku lri sidrama kudra drelengaini? 25Alaiyasi sidramata kudra kaika nimakadrelane, lri dulruta kiadili ukalava.

26Laka thadalrane, ku turamuraneta yakai ku Siri paraluralubu. Nakaita wathingale ku apangimiane inulri; ai ku Siri ngiakakamani arakai ku kaika amaka arakaikaiyane ku vaga dange pasikai mitane kitubi ki Twaumase. 27Kudra pakeela ki kidremedreme ki umawmase drele ka Twaumase wathingale ku takidremedremane ki Siri, asi lwiyane kai Siri singiakai ku takidremedremane ki Twaumase, si pasikai ki laumawmaseini kitubi.

28Wathingaleta, ku Twaumase si kudra la kialibake iniane ku umawmase, amani kudra dawluini singikai ku kidremedremeini, si taelre kawaungu, si sanaka maneemanenga ka awngane la ikaai ku akaesadhane. 29Asi lwiyane ku Twaumase wathingalenga liniane, si malranga paswala pilri liniane, lri apararamau liniane ki Lalakeini ku taukalrivilane ku takaumawmasane, ku lrika aikaiyane ki takaalra ka maretetese ithamadalane. 30Ku Twaumase paswalanga pilri kwini ki umawmase, la dawlu liniane; ku dawluini ku umawmase, peaelaela pasudalepe tumadringelrese ka umawmase; ku pelaelaini pasudalepe tumadringelrese ka umawmase, pakiasupilri liniane ku lrigu.

Ku sakialibake ki Twaumase patwalai ki Yesu pathingalane

31Kudra miyaiyanga kikai, lri tumanaiyanata kawriva? Sana ikai talikai mitane ku Twaumase, aneane ku lri kiecebe mitane? 32Adravane ka Lalakeini kai taulra, waalra iniane si baai mitane. Kudra miyaiyanga kikai, kai lri kirimu mialri vutha baai mitane sanaka maneemane? 33Aneane ku lri kukusu kudra pilringa ki Twaumase ku umawmase? Ku Twaumase peaelaelanga tukakadrwa ku pasalrivane lini! 34La lrika aneaneana ku lri tupasalrivane liniane? Kai ka Yesu Kirisitu, amani kwidra wapacainga, ku patengatengane, nai iyaku kai kamani amani kudra siaelanenga panianiake, kikai laka yakainga vanale ki Twaumase si ngitalikaikaiyane mitane kitubi ki Twaumase! 35Kudra miyaiyanga kikai, aneane ku lri dulru apauvagai mitane ki sakialibake ki Kirisitu? Akipakwalriane? Akiangeangane? Akikabebetethane? Silravane? Matikurwane? Sapapacai? Lrabu? 36Mararaamau ku taiyane ki Sisiu iya kai:

Ngwalai muswane, waaungu nai kipikai ki apacadhane;

kai umawmase twa aculwane ka kiu naiane.

37Kaika amani patuelre! Ikai kai ki ngimiyaiya kai patuelre, sataluta kudra ki kialibake mitane ka Yesu si sabelengenga! 38Asi lwiyane masalrwaku, sanaka manemane patuelre kadrwa ku lri dulru apauvagai mitane ki sakialibake ki Twaumase. Adravane ka apacadhane, ka apanianiakane; ka sasiakawlu subelebelenge, ka maelane ka ngwababelenge ka magagemegeme ku puku; kamani kaiasane, kamani lukabibilrili; 39ka abebeelengenga, ka yaswadriadringi; ikai kai ki lepawngane sanaka nibekacane patuelre, ku pangukai ki Twaumase ki Tamatama ka Kirisitu Yesu si baai mitane ku sakialibake anika manemanemane kadrwa ku lri maka dulru apauvagai.

Currently Selected:

Ruma 8: NDV

Highlight

Compare

Copy