Ruma 7

Arakai ku tamathaetharevane pelaela

1Laretesane, wathingale numi makanaelre ki hulrice, lakamani lri tara thingale numi kai lrika apalalrwadhaneli: Ku taruthukane ki hulrice ki umawmase amani lu panianianiakeana yakai ku paluludane. 2Lu tupatharevane kawriva, kudra marudrangenga ka ababai, sana panianianiakeana ku taelrelreini, kiaruthuku ikai ki hulrice; ai lu pacainga ku taelrelre, kai alisu kai lri kiruthukunga kai ki miyaiya kaika hulrice. 3Lakamani, lu panianianiake ku taelrelre ka sawvalai, kwini alisu luiyasi tadrusa ki drumane ki sawvalai, lri kitupairairange; alaiyasi pacainga ku taelrelre, kwini alisu ikai ki hulrice amaninga kudra lri dulrunga ngilralraingi, alaiyasi karudrange mwa ki drumane ka sawvalai, kaika swadringainga. 4Laretesane, kudra tangimiamiane numi thadalrane kikai. Lu sakaiyane ki hulrice kawriva wapacainga numi, asi lwiyane kinawmasanenga numi ki Kirisitu; amaninga numi kwidra swakai ki twalai ki wapacai si sielane ka Tamatama, pakai ku lrika adulrwaneta pudriadringai kaungu pasikai ki Twaumase. 5Lu singikaikaiyanata ku takikathianeta ka umawmase panianianiake, ku hulrice ki Musi pangiavelevele ki ngialisiane ki kidremedremeta, si ikai ki beateta utaluvaivai, ku angimiane laka apacadhane. 6Ai, kikainga kai lri dulrunga ruthuku ku hulrice mitane; asi lwiyane lu twaladhane ku taruthukane ki hulrice mitane si kawriva, kuta wapacaingata. Lri kaita lri singikainga kudra sidrumane ku tapangimiane nguvavaeva ki hulrice, lri singikaingata ki Siri kudra bavane ku tapelaelane si pasikai ki Twaumase.

Hulrice si pasalrivane

7Lu mia kwini, lri dulruta pasalrivane iya ki hulrice? Kaita lri dulru! Ai, pangwakai ki hulrice, ala thingalaku kai pasalrivane luka manemane. “Madha kararau”, ana kai iya ku hulrice, nai kainaku thingale ka manemane ku sia ravane. 8Kai pasalrivane pangwakai ki drekase ki hulrice, si silape ku atakaiyane, la ikai ki kidremedremeli pangivelevele sanaka laravane. Luka kadrwa kai hulrice, kai pasalrivane wapacai. 9Kunadruma napanianianiakaku ilatadre ki hulrice; sakabilrilanenga saikainga ku drekase ki hulrice, kai pasalrivane ala kirimunga panianiake, la pacainga naku ikai ki pasalrivane. 10Ku natangimiamiane kai drekase ki hulrice nai papanianiake ki umawmase; ai, papia nakwane, amaanilringa ku mailuku ku apacadhane. 11Asi lwiyane kai pasalrivane pangwakai ki drekase ki hulrice silape ku atakaiyane lrilrigili nakwane, la pangukai ki drekase ki hulrice si pwa nakwane ki apacadhane.

12Kai hulrice ki Musi saniange turamuru; kai drekase ki hulrice laka saniange turamuru, aparamaramau, si ulecege. 13Lu iyane kikai kawriva, kwini ulecegane la kamani ku papacai nakwane? Ini! Amani kai pasalrivane! Ai kai pasalrivane pangwakai ki ulecegane, mailuku ku apacadhane, aparwathingalane ku tangimiamiane ki pasalrivane. Pangukai ki drekase ki hulrice, ku ngilisianane ki pasalrivane la aru pakilringau.

Tamawvagavagadhane ku kidremedremeini ki umawmase

14Wathingaleta, ku hulrice ki Musi ngwakai ki takisuswane; ai lri tara kaburavaku kai kinawmasaneli, nikilangadhanenga baai ki pasalrivane aduri. 15Ai kainaku pwalringalringau ku piapiali; asi lwiyane ku palraingili, kainaku maka paiya; ku kalraseli, la piyalringa naku kamani. 16Alaiyasi piaku ku kaika palraingili ku awngane, kainaku lri dulru kai tupacengecenge ki hulrice. 17Kudra miyaiyanga ki kikai, kudra la piali kaika patengatengane ka amaniaku ka paiyaiya, amani kikai yadringi nakwane kai pasalrivane ka paiya. 18Mialriaku thingale, kikai yadringi nakwane, amani kikai yadringi nakwane kai saka takaumawmasaneli, kadrwa ku ulecegane. Asi lwiyane, yakai ku nau pia iyaiyali ku takatharirane, ai kadrwa ku pukuli pia ku takatharirane. 19Ku nau pia iyali ku mathariri, kainaku paiya; ku nau kai pia iyali ku malisi, la piyalringa naku. 20Alaiyasi piaku ku kaika palraingili, sapelaelane ka kainaku ka amani ka paiya, amani kai yadringi nakwane ka pasalrivane ka paiya.

21Lakamani, patarathingalaku ka yakai kai vaeva ka nikelretane ka kakudhane, ka amani ka twamwamwamulrace: Nau pia lu iyaku ku mathariri, kudra ngialisiane taikaiyane nakwane vangavangavange. 22Kai adringi ki kidremedremeli sakwa kadalame ku nikelretane ka tukakudhane ki Twaumase, 23kai kinawmasaneli kiaililuku ki maelane ki nikelretane ka kakudhane, kikai nikelretane ka kakudhane la makakaruburuburu ki yadringi ki kidremedremeli ka kadalameli ka nikelretane ka kakudhane, la kainaku maka katwase kidaili kikai saruthukane ki nikelretane ka kakudhane ki pasalrivaneli; kikai nikelretane ka kakudhane yadringi nakwane ka tara tumwamwamulrace nakwane. 24Kwalringa naku turamuru! Aneane ku lri palribulu nakwane pakidaili kai ki lri papacai nakwane ka kinawmasane? 25Maelanenga ki Twaumase, pangwakai ki Tamatamata ka Yesu Kirisitu, amani ku lri dulru palribulu nakwane.

Ku tangimiamianeli miyaiya ki kikai: Kwaku kathane ku adulrwaneli ikai ki kidremedreme pasalaladha ku nikelretane ka kakudhane ki Twaumase, ai kai kinawmasaneli pasalalaladhalringa ki nikelretane ka kakudhane ki pasalrivane.

Currently Selected:

Ruma 7: NDV

Highlight

Compare

Copy