Ruma 3

1Luka ngimiyaiya kai, kai swa Yuda yakai ku manemane ku akasilrialribatane ki sakamaelanane ka umawmase? Ku kiagelregelre ka lrisi yakai ku manemane ku paluludane? 2Ku patengatengane yakai papia kidruanga. Ku aswalalanga, ku Twaumase wamalra ku vagaini baai patarumara ki swa Yuda. 3Ikai liniane adravane ikai ku kai masalrunga, ku Twaumase lri ngwalai kai si kaika patengatengane? 4Kaika miyaiya kwini! Adravane kadraedrangelre kai umawmase, ku Twaumase patengatengane, mia ku taiyane ki Sisiu iya kai:

Lu avavagasu, kadrwa ku atakaiyane tulisi,

lu ki kukususu, lri tara akacisu.

5Alaiyasi kikai kaika uleceganeta la dulru pathingalane ku dringelresane ki Twaumase, lri tumanaiya kawriva? Lu pathavungu ku Twaumase mitane, amanini ka kaika madringelrese? (Singiakaiyaku ku takidremedremane ki umawmase kawriva.) 6Kaika miyaiya kwini! Alaiyasi kaika madringelrese ku Twaumase, lri tumane dulru saibange ki yakawmasane?

7Alaiyasi kai drangelraneli la dulru aru pathingalane ku takapatenganane ki Twaumase, si aru kilrigu, lri tumanaiya kawriva? Anaku kirimu kitupasalrivaneana? 8Ani kai iya kai, “Ala takanganganga lani athingalane ku mathariri?” Yakai ku laumawmase ku amianga ku miyaiya kai ku vaga amia nakwane si kukusu; kwini lalasu lu kitupasalrivane yai pacengecenge.

Kadrwa ku mwalecege ku umawmase

9Lumia kwini, kuta ka swa Yuda laka sanianiangeta#3.9 “sanianiangeta” ku wahunyake madu iya kai “turawramuruta”. ki sakamaelanane ka umawmase midra? Kadrwa ku miyaiya kikai! Peaelaelangaku, kai swa Yuda si sakamaelanane ka umawmase mararaamau ka kiaruthuku ki puku ki pasalrivane. 10Mia ku taiyane kai ki Sisiu:

Kadrwa ku umawmase ku madringelrese, adravane ka natangeanga kadrwa.

11Kadrwa ku malrigili ku umawmase,

laka kadrwa ku namwarikaikaainga ki Twaumase.

12Sanaka umawmase sangwalrilrikudru katwase ki Twaumase,

si karedededele katwase mwa ki makawli ka kadalranane;

kadrwa ku umawmase ku paiyaiya ku mathariri ku kakudhane,

adravane ka natangeanga kadrwa.

13Kudra lrulrungu lini mia ki nimucaebane ka balriu;

kudra lridame lini taratavuvuvulrucu lu kawriva patuelre;

ku twalai ki ngudui lini utaluvaivai mararaamau ki duku ki sulrau;

14ku ngudui lini swaete ku ngilisianane ka duku ka pusu.

15Kwini lalasu maru ngiapalainga ku ridarane mwa kidruanga, kabebetethe papacapacai;

16sanaka tamwane, athingalane asuru ku takabebetethane matiangeange.

17Kwini lalasu la kai thingale ala ka yakai ku akasulivatane ka kadalranane;

18kwini lalasu la kai thingale tausakene tamukuludru iya ki Twaumase.

19Wathingaleta, ku drekase ki hulrice yai amanimani ki yatailebeane ki hulrice ka umawmase kawriva, pakai ki yakawmasane sanaka umawmase ku aguruthunganane itailebe ki asaibangane ki Twaumase, kudra kaika adulrwane ki umawmase ikaiyana ku atakaiyane avavaga. 20Asi lwiyane kadrwa ku umawmase ku wadulru satalu ku tapaluludane ki hulrice si icucubungu ki Twaumase kitumadringelrese; kai hulrice sapathingalane ki pasalrivaneini ki umawmase sikakathane.

Ku Twaumase wamalra ki umawmase pawlecege ku amakakadalrwane iniane

21Ai kaiasasane, ku Twaumase pathingalanenga ku apangimiane ki umawmase si pacengecenge pamamwa ku tamakakadalrwaneini; kikai yai kadrwa ku tamacacapilane ki hulrice. Ku hulrice ki Musi si layuginsia amia kai akasi. 22Ku Twaumase wamalra ki umawmase pakadawdalru iniane, ngwakai ku takasalrwane lini ki Yesu Kirisitu#3.22 “ngwakai ku takasalrwane lini ki Yesu Kirisitu” ku wahunyake madu iya kai “ngwakai ku takapatengatenganane ki Yesu Kirisitu”. Ku Twaumase twangimiyaiya kikai kwidra ki sanaka masaalru ki Kirisitu ku umawmase, kadrwa ku tapakaelaelane: 23Asi lwiyane sanaka umawmase pasaalriwnga makanaelre, akiamenga ku lrigu ki Twaumase. 24Ai, ku Twaumase wavutha baai ku migemi, pangwakai ki Yesu Kirisitu si palribulu liniane ala dulru makakadalru iniane. 25Ku Twaumase kai pathilipi ki Yesu, wamalra iniane tu Samupasalrivanane ka lrisi, pangwakai ki tapacadhaneini, ku umawmase la ngwalai ku sakiapawteatenga lini ki Yesu si kipacepe ku pasalrivane. Ku tapiane kai ki Twaumase pathingalane ku dringelresaneini. 26Asi lwiyane kiadili, pacepe ku tapasalrivane ki umawmase. Ai kaiasasane, la arakai ku tamwalrane ku pasalrivane pathingalane ku dringelresaneini. Lumiya kikai, ku Twaumase paathingalane ka amani ku madringelrese, si sanaka kiapawtenga ki Yesu ku umawmase la makitu makakadalrunga ki Twaumase.

27Manemaneana ku angilralrigwaneta? Kadrwa ku natikianenga! Laka ngwakai ki manemane? Amani sapaluludu ki hulrice? Kai ngiamia kwini! Ngwalai ki salrwane. 28Ku turingaringau nai yai: Ku adulrwane ki umawmase makadawdalru ki Twaumase ngwakai ki salrwane sikathane, kaika ngwakai ku tapaluludane ki hulrice. 29Ku Twaumase bekace ka Twaumase ki swa Yuda sikakathane? Kai ka maiyalri ka Twaumase ki sakamaelanane ka umawmase? Unu lai kisumali! 30Tangeangea ku Twaumase, ani patwalai ki salrwane amia ki swa Yuda, si kai sakamaelanane ka umawmase lamialri patwalai ki salrwane si makadawdalru iniane. 31Lu iya kai kawriva, kai salrwaneta lri amudunga ku kakudhane ki hulrice ki Musi? Kai lrika ngiamia kwini! Ngiabaalrelringa, arwa pakapapedrengeta ki hulrice.

Currently Selected:

Ruma 3: NDV

Highlight

Compare

Copy