Ruma 15
15
Kai mwarikai ku angulwadhananeini
1Kuta ka makecenge ku salrwane ka umawmase nai paralubuta ki twaramuru ku salrwane, si kivala siamece kudra matelrege ka amece lini, si kai murikai ku angulwadhanane ngikakamani. 2Kuta ka tangea tapasikai kidremedreme ku akaesadhane ki laretesane, si pacegecege ku maramaramau ku salrwane ikai ki tapanianianiakane. 3Asi lwiyane ku Kirisitu kai mwarikai ku angulwadhananeini, ngiamialringa kudra taiyane kai ki Sisiu, “Kudra sicelregane ki siacelrecelrege numiane ku umawmase makakai nakwane patuelre.” 4Kai vaga ki Sisiu wabulrubulru mitane patuelre ku tapacasane, ku pacugane yai pakai ku adulrwaneta patwalai ku sabulrwane ki Sisiu ku akiadilane si sapasapukwanane la tarumara ku sasiadradrama. 5Kudra amani ku wabaai ku akiadilane si sapasapukwanane ka Twaumase aniparalubu numiane pikai ku maramaramau ku tadrelane, si twalralrau ku tapatwalravane ki Yesu Kirisitu, 6lata taelre makanaelre, si masiasilange drengedrengere ki Twaumase ka Tama ki Tamatamata ka Yesu Kirisitu.
Wadindu papia ki sakamaelanane ka umawmase
7Lakamani, pakai ku akilrigwane ki Twaumase, kunumi matarumaramara mia ki Kirisitu satarumara numiane. 8Nau pelaela numiane, ku Kirisitu pakai ku apathingalane ku takapatenganane ki Twaumase, la asasiakawlu ki swa Yuda, pakai ku angimiane ku takiketeketane ki Twaumase ki latamatama, 9laka thadaalrane ku adrengedrengerane ki sakamaelanane ka umawmase ku thalradhane ki Twaumase. Mararamau ku taiyane kai ki Sisiu:
Ngwalai kai, lri ikaiyaku ki sakamaelanane ka umawmase drengedrengedrengere muswane;
lai senadhaku ku naganesu.
10Kai Sisiu la iyanga kai:
Sakamaelanane ka umawmase, Tupapalra ki laumawmase ki Twaumase si karededele kiraragai!
11La iyana kawriva,
sanaka sakamaelanane ka umawmase, drengedrengera ki Tamatama!
Sanaka umawmase, drengedrengera iniane!
12Ku Isaiya la mialri iya kai:
Yakai ku mwabaibalrithi ki Yesi ku lri kainganai,
kwi lasu lri ngidrakale si rathudu ki lasakamaelanane;
ku lasakamaelanane ka umawmase makanaelre lai lri satalu iniane!
13Ku Twaumase, ka amani kudra berai ki sasiadradrama, lri ngwalai ku salrwane numi iniane, lai lri suete numiane ku la akiragadhane, ku sulivatane, ku sidramane numi, lri ngukai ki puku ki Siri, si aru drimadrima.
Ku Pawru wacungucungu kawriva
14Laretesane, patenganaku thingale ka kiasuete numi ku ulecegane, si kakalra ku thingalane, dulru mabulrubulru. 15Ai, ikai kai ki tigami, papia kudra ki lamundai, sakamiaku kagarange pakipapawlringau numiane. Lu piaku kai cungucungu kawriva, amani sa baai nakwane ku Twaumase ku nipawkalrivilane ka puku, 16la asasiakawlaku ki Yesu Kirisitu, si ikai ki lasakamaelanane ka umawmase kawaungu. Mararaamavaku ki barakalai pelaelaela ku hukuingi ki Twaumase, pakai ki lasakamaelanane ka umawmase ku lrika akamaniane lini ku sarakaiyane ki Siri tusapatarumarane ka waudriwdripi baai ki Twaumase, kamani ku kiragai ki Twaumase tarumara. 17Laka miyaiya kai, amani sa ikaiyaku adringi ki Yesu Kirisitu, lri dulrwaku ngwalai ku tapasikaikaiyaneli ki Twaumase si ngilralrigu. 18-19Ku lrika akagaranganeli kawriva niakuvavalane: Ku Kirisitu pangwakai ki vagali si tangivelevelaneli, la arakai ku pinangu Twaumasane ka puku si matiasamali ka awngane, si puku ki Ri ki Twaumase, wamalra ki sakamaelanane ka umawmase si papasalaladha ki Twaumase. Ngwalai kikai, twalai Yerusalrime pakela talikai Iliricume, wamwaku kidruanga pelaelaela ku hukuingi ku ngwakai ki Kirisitu. 20Ku tasidramaneli amani ku adindwaneli, ikai ki kaiyana kialalra ku pangukai ki Kirisitu, amani lu acegecege kai kawaunguli ikai ki karwalai ki palrapalra. 21Kai Sisiu amianga kai:
Ku nakai wathingale iniane ku umawmase lri drele;
ku kaiyana kialalra iniane ku umawmase lri pulringalringau.
Ku Pawru kiadremedreme ku amwane lrikape Ruma
22Ai, kingikalralaku kitetelenge, si kai maka dulru mwa numiane kwini. 23Ai kaiasasane, kudra twalrepengengaku kai taitalikaiyaneli kai ku awngane, si la kawlainga ka caili ka tapimwaneli lrikape numiane, 24apia mwaku kaiasasane, lu papiapiaku Sepania ikadalranane, nau ngukakainga drele numiane, si taelreana numiane ikai kwini makapiale, ala nuparalubu nakwane ku apacungulaneli katwase. 25Ai, pangukai ku apalribulane ki lasinzia kaiasasane lri tara mwaku Yerusalrime. 26Asi lwiyane kai swa Makidunia si swa Akaia ka kiwkai kiaragai palribulu ara paisu, si paralubu ki sinzia Yerusalrime ku matiakukuru ka laretesane. 27Unu kikai kiragai lini pia, ai ku patengatengane mialri ka naika apiane lini. Kai Kirisite ki swa Yuda ku pakiasupilringa ku kipatarumara lini ki Twaumase, kai swa sakamaelanane ka umawmase lri mialri arakai ku lamanemane paralubu liniane. 28Lu tulrepengenga naku kikai awngane, si baainga pakipapawlringau kudra baai lini paralubu ku paisu, lri ngukakaiyaku numiane kwini, si mwa Sepania. 29Wathingalaku, lu katwasaku lrikape numiane lri mialriaku mailuku ku makaalra ku migemi ki Kirisitu si baai numiane.
30Laretesane! Sakai ki Tamatamata ka Yesu Kirisitu, la sakai ku baai ki Siri ku sakialialibake, kiatubiaku ku atupapalrane numi nakwane ka tengatengane kitubi ki Twaumase. 31Ku kaika akitulisianeli ki yakai Yuda ki kai masalru ka laumawmase, lani ngulwadhane ku sinzia ku taikaiyaneli Yerusalrime marasikai kaungu ku sapalribulane. 32Alaiyasi palraingi ku Twaumase, lri maka dulrwaku takukirararagai katwase drele numiane, si ikai numiane isadrana makapiale.
33Ku amani ku wabaai ku sulivatane ka Twaumase ani ikai tapalra numiane makanaelre! Amingi.
Currently Selected:
Ruma 15: NDV
Highlight
Share
Compare
Copy
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
