Ruma 14

Madha raeraeratenge ki umawmase

1Ku twaramuru ku salrwane ku umawmase, kunumi yai tarumara iniane, adravane ka nayakainga ku maelane ku tadrelaneini, madha madradrikidrikisi ku vaga iniane. 2Ku yakai ku salrwane ku umawmase wakane sanaka maneemane; ku twaramuru ku salrwane la kane ku lacenge sikakathane. 3Kudra wakane sanaka maneemane ku umawmase madha sidrekadrekase kudra ki kai wakane; kudra wakane ku lacenge sikakathane la madha raeraeratenge kawriva kudra ki wakane sanaka maneemanenga, asi lwiyane ku Twaumase tarwamaranga iniane. 4Aneanesu, si raeraeratenge ki sasiakawlu ki palrapalra? Kudra tawkini kai lri dulru tintingi ku tapangiesadhane si tapangilisianane kwini ki lasu? Sikamanianenga, ku Tamatama wadulru paralubu iniane, si ikai ku tapangimianeini tumane.

5Yakai ku umawmase lu kidremedreme kikai vai kai, makuciacingalre ki drumane ka vai; la ikai ku drumane ku umawmase lu kidremedreme maramaraamau kakucingalre sanaka vai. Sanaka aneane lri dulru ikai ku tadrelaneini. 6Yakai ku umawmase ku pawakalrivili tukucingalre kudra ki minakavalane ka vai, ka sapelaelane ku usakenaneini ki Tamatama; la ikai ku wakane sanaka maneemane, la mialri ka sapelaelane ku usakenaneini ki Tamatama, asi lwiyane kwini lasu pasiakai ki kaneini kiaseasene ki Twaumase. La ikai ku umawmase ku kai wakane kudra drumane ku akaneane, laka thadalrane ka sapelaelane ka mwasakene ki Tamatama, mialri kiaseasene ki Twaumase. 7Kadrwa ku umawmase ku ngiapapasikaikaai panianiake, laka kadrwa ku umawmase ku ngiapapasikaikaai pacai; 8ku panianianiaketa, pasiakaita ki Tamatama panianiake, lu pacaita, laka pasiakaita ki Tamatama pacai. Lakamani, ku panianiaketa, ku wapacaita, Tamatamaneta ka umawmase makanaelre. 9Ngwalai kai, ku Kirisitu wapacai si la sielane panianiake, ku pacugane yai lri ka Tamatama ki panianianiake si wapacai ka umawmase. 10Lakamani, kusu ka umawmase, asu raeraeratenge ki retesanesu? Asu tudreadrekase ki retesanesu? Lri acegecegeta makanaelre icucubungu ki Twaumase si kisaibange iniane; 11asi lwiyane kai Sisiu amia kai:

Amia kai ku Tamatama: Lri papiaku ki niakeli kiketekete,

sanaka umawmasenga lri papia nakwane pidruru;

sanaka umawmasenga lai thingale si pelaela ala ka Twaumasaku.

12Lu iyane kikai, kuta sanaka aneanenga lri tara papia ki Twaumase pelaela ku tapianeta makanaelre.

Madha pamwadreadreke ikai ki takisuswane ki retesane

13Lakamani, takai kirimunga maraeraeratenge; tatukapatenganenga ku kidremedreme, si kai piapianga sanaka maneemane ku apamwadrekane ikai ki takisuswane si pasalriu ki laretesane. 14Sakaiyaku ku tatupapalraneli ki Tamatama ka Yesu si maka pudriadringai thingale, kai akaneane mabula patuelre; alaiyasi ikai ku umawmase ku kai twamabula, pangukai kai ki umawmase lu kawrivane, kwini akaneane kai mabulanga. 15Alaiyasi ngwalaisu ki akaneane pakadula ku kidremedreme ki retesane, kudra piasu kaika twalainga ki sakialibake. Madha ngwalalai ki akaneanesu si kabebetethe kudra ki pasikainga ki Kirisitu iniane pacai! 16Madha pakitulisilisi kudra mathariri iyasu ku awngane. 17Asi lwiyane ku puku ki Twaumase kai ngwalai ki akaneane, yakai ki aparamaramavane, ki rathudane, ki sakiaragai ka baai ki Siri. 18Kudra paiya kikai pasikai ki Kirisitu ku umawmase lri tara kikiragai ki Twaumase lai kidrengedrengere ki umawmase.

19Lakamani, takipasilape kudra awngane ku apadilane makadawdalru, si pacegecege ku twaredelane ku tapanianianiakane. 20Madha ngwalalai ki akaneane si kabebetethe ku awngane ki Twaumase. Adulrwane kane sanaka akaneane, ai kudra kanesu luiyasi pamwadreke ikai ki takisuswane ki palrapalra, kaika pacengecengenga. 21Lakamani, mathaithariringa kai kane ku beate, kai ungulu ku bava, kai pia sanaka manemane ku apamwadrekane ki laretesane. 22Pangukai ki miyaiya kai ngitwatumane ku tadrelanesu, makakamaninga numi ki Twaumase. Ku tangea ku umawmase ku wadulru ikai kudra pacengecenge iyaini, si kai ngisasidrekase, kai ngikakaelaela yakai ku akaesadhane! 23Ai, alaiyasi kalrikilriki kudra kaneini ku akaneane, lu kanekanenga, lri tupasalrivane iniane ku Twaumase, asi lwiyane kwi lasu kai singiakai ki salrwane kane. Sanaka maneemane ku kai singiakai ki salrwane pia ku awngane pasalrivane patuelre.

Currently Selected:

Ruma 14: NDV

Highlight

Compare

Copy