Taasipane 33
33
Tadadavacane twalai Izipiti kela ka Muabe
1Kikai lebe amani ku sa katwasenga Izipiti si tangukakaiyane tutasuladhane tara kadalranane ki swa Iseraylri ikai ki tasangilukane ki Musi si Arungu. 2Ku Musi pasusu ku tadrekasane ki Tamatama iniane si malra pacase kwini sanaka taikaiyane tutasuladhane kwini lanagane.
3Ku swa Iseraylri ikai ki saka 15 ka vai ki aswalalanga ki dramare, sakakaiyane ki aswalalanga ka Takilragavane ka lrisi, matwase Izipiti. Ngwalai ku tapalakebane liniane ki Tamatama, patakamacamaaca ki swa Izipiti thangedarane kadrwa ku mukuludrane katwase kwini ki cekele Ramese ka Izipiti; 4kikwini ku swa Izipiti la icengecenge makitu dralredralreke kwini ki kiapapacai ki Tamatama ka la tinutakane ka sawvalai. Ku Tamatama pangiamia kikai, pathingalane ku pukuini ala ka silrialribate ki latwaumase ki swa Izipiti.
5Ku swa Iseraylri matwase Ramese, ku aswalaalanga la tutasuladhane ikai Sukuthe, 6ala tutasuladhane ikai thili calragulragu kavai Ithame. 7La twalai kwini siwlri mwa ka Pi Hahiruthe ka tali talrawane Baale Zipungu, ikai kwini adeethe Migedule tutasuladhane. 8Sa katwasenga ka Pi Hahiruthe, la ngukakai kwini ki laveke Suize mwa ka calragulragu Sure, makatulrulu ku vai ku kadalranane, ala ikai Mara tutasuladhane. 9Kwini lalasu ala mwanga ka Ilrime, amani sa ikai kwini ku tai 12 ku tuturu, ka mapitulu ku abare.
10Sa katwasenga ka Ilrime, la ikai kwini adeethe ki laveke Suize tutasuladhane. 11Ku bibilrili kwini lalasu la mwa ka calragulragu ka Singi, 12ala katwase mwa ka Dupeka, 13ala mwa ka Aluse. 14Ku bibilrili kwini lalasu la mwa ka Ripidime; sa ikai kwini laka kadrwa ku awngulane lini ku acilai.
15-37Twalai Ripidime mwa ka lregelrege Hurebe, ngiamia kai ku tangukakaiyane lini tutasuladhane: Calragulragu Sinai, Kiberuthe Hatava (ku drumane ku nagane sia “Takidralrekane ki ravane”), Hazeruthe, Rithema, Rimungu Pereze, Libena, Risa, Kehelatha, lregelrege Sepere, Harada, Makeluthe, Tahathe, Tera, Mitheka, Hasemuna, Museruthe, Bene Yakange, Hure Hagigade, Yutebatha, Aberuna, Iziungebere, calragulragu Zingi (Amani ka Kadise), lregelrege Hurebe si pagiagisane ka talikai Idume.
38-39Saka taramasupatele ka caili si aswalaalanga ki sakalrima ka dramare ku takatwasane ki swa Iseraylri ka Izipiti, ku barakalai ka Arungu pasusu ku drekase ki Tamatama mwa ka lregelrege ka Hure, la pacainga ikai kwini. Sa pacai ku Arungu tara 123 ku cailini.
40Kwini swa tali lrawdru Kanange pakela ki talialalai ka Arade la kilalra ka kaingananganai ka swa Iseraylri iya.
41-49Twalai kwini lregelrege ka Hure kela ka dratane Muabe, ku tangukakaiyane ki swa Iseraylri amani kikai yalebe ku tatutasuladhane lini: Zalemuna, Punungu, Abuthu, nacekele Abarime kavai tali Muabe, Dibune Gade, Alemunge Dibelethame, adeethe ka lregelrege Nibu ka lregelrege Abarime, si balrealreanane Yeriku kavai kadravane Yuredange ka dratane Muabe, kabicelrakane kavai Bithe Yesimuthe si vaalru Sitingi.
Sapelaelane sakaiyana talubalre kadravane Yuredange
50Ikai balrealreanane Yeriku babiabila kadravane Yuredange ka dratane Muabe, ku Tamatama wacunu ki Musi, 51malra kikai si pelaela ki mapapangale ki swa Iseraylri; amia kai, “Kunumi lu talubalrea kadravane Yuredange, si mudaane Kanange, 52tara pakatwasa demedeme kwini ki laumawmase, pwa baburuku kwini lrenege ku kingi ka samiamiange si tasukusukubane lini demedeme. 53Mwa drikisi kwini kadaengane, si ikainga kwini cekecekele, asi lwiyane lri baadhaku numiane kwini kadaengane. 54Lri tinukuzibiki numi padrudrulru kwini kadaengane si baai ki lazuku si lamaretetese. Baadha ku taswadravane kwini ki tapangale ku umawmase, ku tasutikiane baadha kwini ki tabekele ku umawmase ka lamaretetese. 55Lwiyasi kai numi pakatwase ki swakai kwini ka laumawmase, kwini nipasurane lrikamani ku lrika amatikurwane numi, maru cenekenga ki maca numi, ka cecenekane ka angatu ki vigwa numi; lri ngibalre lrumai numiane. 56Lwiyasi kai numi pakatwase liniane, lri amudaku numiane, pangimia ku kidredredremeli ku apapacadhane liniane.”
Currently Selected:
Taasipane 33: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
