Taasipane 31
31
Kiakaruburu ki swa Midiange
1Ku Tamatama amia kai ki Musi, 2“Lri ngwalaisu ku tatavuvulrucane ki swa Midiange ki swa Iseraylri si pathavungu liniane; lu tulrepengengasu kikai ala lri katwasesu kidaili kawmasane.”
3Ku Musi la kawriva ki mapapangale, “Padulrwa ku akikaruburane numi, si katwase kikaruburu ki swa Midiange, la pasikai ki Tamatama bilri ki badha. 4Ku lazuku ki swa Iseraylri lri pata kudrukuudrulu ku umawmase kulri mwa kikaruburu.”
5Kwini lazuku la pilri pata kudrukuudrulu ku umawmase, ku kiapaelre kikaruburu ku umawmase ta 12,000. 6Ku Musi la paatamatama liniane kwini ki lalake ki barakalai ka Ilriazare ka Pinehase; ku Pinehase la iluku ku takaiyane ki Alrivilrivi ka taikaikaiyane si sapathingalane ka rapa ka lawngu. 7Kwini lalasu pasusu ku drekase ki Tamatama ki Musi katwase kikaruburu ki swa Midiange, la papacai demedeme kwini ki lasawvalai lini, 8paelre kwini ki tailrima ka talialalai ki swa Midiange ka Ivi, Rekeme, Zure, Hure Riba. Kwini lalasu la mialri papacai ki lalake ki Biure ka Balame.
9Ku swa Iseraylri waravase ki laababai si lavavalake ki swa Midiange, la ribici si iluku ku lalwange, lakiu lini, la ravase demedeme ku la takuciacingalre ku lamanemane lini, 10la lama demedeme kwini ki cacekele si takwapingane lini. 11Kwini lalasu la malranga iluku kwini ravase lini, patala umawmase si nilapulapwane iluku demedeme, 12wa iluku liniane si pikai balrealreanane Yeriku kwini babiabila kadravane Yuredange ka dratane Muabe ki tasulasuladhane, la baai ki Musi, Ilriazare, si mapapangale ki swa Iseraylri.
Siaulri mubalriu ku lakwapingi
13Ku Musi, Ilriazare si la drumane ka kiacapili la makitu mulatadre ki tasulasuladhane si katwase kidredresenge ki lakwapingi. 14Ku Musi la kalisi kwini ki singi takikaruburane ka lakiacapili si tarapadrekadrekase ka kwapingi, 15la kivaga liniane, “Anu papanianiake kai ki laababai? 16Thingala, amani kikai laababai ka kialalra ku vaga ki Balame, ikai kavai Piure lrilrigili ki laumawmase si baebalre ki Tamatama, la kipadradresenge ki swalrubu ku kawkawlu ki Tamatama. 17Kikai asasane, kunumi pwa papacai demedeme ki lavavalake ka sawvalai si kwini taelrenga ki sawvalai ka ababai, 18ai kai lri katumane ngipapasikai pasuru kwini ki laababai si kaiyana marudrange ka tawvailekete. 19Ikai numiane ku papacai ki umawmase, ku wa sulrape ki kinawmasane ki wapacai, lri asuru ikai latadre ki tasulasuladhane makapitulu. Ikai ki samakatulrulu si samakapitulu, lri ngibabula numi si kwini ravase numi kwini laababai, 20la mialri bula kwini sanaka makalrilau, si kwini niarakaiyane ka lrangici, ubale ki kakiuane si angatu ka lawbubulu patuelre.”
21Ku barakalai ka Ilriazare kawriva kwini ki singi takikaruburane ka laumawmase iya kai, “Ku baai ki Tamatama ki Musi ku kakudhane miyaiya kai: 22-23Kwini kaika amaka lamane ka lawbubulu, kai lakingi, gingi, lriwlu, adreme, si, cingi, lri ngukai ki apwi pakabula, ala arakai ku acilai sinau bula; kwini drumanenga arakaiya ku acilai pakabula. 24Luka samakapitulu, lri tara ngisasinau numi kwini laimai numi, lu pia numi kikai lri kitu mabula numi, si dulru mudaane ki tasulasuladhane.”
Mavalavala ku niravasane
25Ku Tamatama kawariva ki Musi, 26“Kusu si Ilriazare, si drumane ka kiacapili malra kwini niravasane, paelre kwini ki laumawmase si lanilapulapwane nguelre asipi patuelre, 27ala malra paudrusa pavala, ku pararamau baadha ki lakwapingi, ku pararamau baadha ki drumane ki mapapangale. 28La patwaladhana kwini ki talikaiyane ki kwapingi ka apararamau suru ku vaeva ki 500 tusapatarumarane ki Tamatama ka lapadulru, amani kwidra luka ta 500 ku niravasane lri suru ku tangea ku umawmase; lwange, ruba, nikiubawbalane ka kiu, kakiuane mialri maramaramau patuelre. 29La malra kilakikai si baai ki barakalai ka Ilriazare tusapatarumarane ki Tamatama ka mwakalrivili ka lapadulru. 30La patwaladha kwini ki pararamau ka mapapangalane, adravane ka niravasane ka umawmase, lwange, ruba, nikiubawbalane, kakiuane, malra ku taingeane ki malrimale si baai ki taramarasikaikai ki Alrivilrivi ka balrawbau ki Tamatama ka swa Lrivi ka umawmase.” 31Ku Musi si Ilriazare pangimiya ku tadrekasane ki Tamatama piya.
32-35Kaika kathane ku suru ki lakwapingi ku lawbubulu, kwini ravase lini kwini lamanemane amani kai: Ku Kiu 675,000, lwange 72,000, ruba 61,000, tawvailekete 32,000. 36-40Ku malra ki kikaruburu ka lakwapingi ku apararamau yai: Ku kiu 337,500, ki kwini 675 yai apatarumarane ki Tamatama ka padulru; ku lwange 36,000, kwini 72 yai apatarumarane ki Tamatama ka padulru; ku ruba 30,500, kwini 61 yai apatarumarane ki Tamatama ka padulru; ku tawvailekete ta 16,000, ku ta 32 lri ka Tamatamane. 41Ku Musi pasusu ku tadrekasane ki Tamatama malra kwini padulru si baai ki Ilriazare tusapatarumarane ki Tamatama ka mwakalrivili ka padulru.
42-46Ku malra ki mapapangale ku apararamau mararaamau ku malra ki lakwapingi; ku kiu 337,500, lwange 36,000, ruba 30,500, tawvailekete ta 16,000. 47Ku Musi patwalai kai ki niravasane, paelre ki umawmase si lanilapulapwane, wamalra ku vaeva ki malrimale, singiakai ku drekase ki Tamatama si baai ki taramarasikaikai ki Alrivilrivi ka balrawbau ki Tamatama ka swa Lrivi ka umawmase.
48Ku amani ku wasangiluku ki kwapingi ka lakiacapili wamwa kikawriva ki Musi, 49si iya kai, “Maka waasipinga nai ki lakwapingi nai, kadrwa ku asakivalane ku natangeanga. 50Lakamani wamalra nai ku ravase ki tangeea ku sangiragelanane ka kingi, kalathe, kalathe ki tabatirikane, tara, lridingi si sisilu, iluku si patarumara ki Tamatama, tusabalrithane ki niake nai, sidrama ku apalakebane naiane ki Tamatama.” 51Ku Musi si Ilriazare la tarumara kikai lakingi, yadrepele ka la tinukucingalrane ka sangirageragelanane. 52Ku patarumara kwini ki lakiacapili ki kwapingi ku telregane ikai ku 200 ka kukingi. 53Kwini langukwapiapingi la makitu ngipapikaai ku la malra lini. 54Ku Musi si Ilriazare wamalra iluku kilakikai kingi mwa ki Alrivilrivi ka balrawbau, si kitubi ki Tamatama palakebe ki swa Iseraylri.
Currently Selected:
Taasipane 31: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
