Taasipane 11
11
Ikai Tabira akwiya
1Ku mapapangale kiapadradresenge ku laakwalriane, la kirimu akwiya ki Tamatama. Ku Tamatama sa kilalra la kagirimucu, si pulebe ku apwi mwa liniane, la lama kwini ki tali cigiane ki tasuladhane. 2Ku mapapangale kiatubi ki Musi. Ku Musi la inulri ki Tamatama, ku apwi la kaedrepe. 3Kwini kadaengane sia Tabira#11.3 “Tabira”, “walama” amia., asi lwiyane ku apwi ki Tamatama nayakai kwini lama liniane.
Ku Musi wapilri ku tamapitulu ku Marudrange
4Yakai kwidra la sakamaelanane ka zuku ku twapapalra ki swa Iseraylri; kwini lalasu la murikai ku akaneane ki beate. Ku swa Iseraylri la mialri kirimunga kalisi kawriva, “Ana ikai ku beate ku akaneaneta nai kathariri turamuru! 5Sa ikaita Izipiti, takanekaneeaneta ku kange, si kai arakai ku paisu langai. La ikaiyana ku lakiulri, sikwa, ciwcai, kucai, swange, kwini la malimeeme ka laakaneane. 6Kikainga kadrwanga ku pukuta. Luka vaivai kathane ku mana, kadrwanga ku drumane ku kanekaneta!”
7Ku tangimiamiane ki mana mia ki tatiitiki ka berathe, naungi burau amia ku taka lrapungane. 8-9Luka maungu la twapapalra ki lamu mururu makakai ki tasuladhane. Luka kaiyane ki mialrealre, ku mapapangale la mulatadre siludu, si malra sarubu la dukulru tulrawlragumane, ala aga, tupange. Ku sangulremanane miyaiya ki niarakaiyane ku lawlau ki ulrive ka pange.
10Ku mapapangale twaredelane makitu acegecege ikai ki lrawlrawdru ki balrawbau si makitu kalisilisi. Ku Tamatama la kalisi; sakilalra ku Musi la kipakwalri turamuru ku kidremedremeini, asi lwiyane kwini mapapangale malisi ki Twaumase. 11Ku Musi la kawriva ki Tamatama, “Asu piya kai pakwalri ki sasiakawlusu? Asu piya kai kalrase nakwane? Asu pakicapili nakwane sangiluku kai ki mapapangale? 12La kainaku kamani ka wabekace liniane ka twalalake liniane, malra liniane pangimia ki daini kebere, pakela kwini ki tapuvaganesu ki cucungulane lini ka kadaengane? 13Lri muinwaku silape malra ku beate si pakane liniane? Kikai lalasu kai, kai yacelrecelrebenga kiara kalisi ki sapia kane ki beate! 14Lu tangeangeaku kainaku lri maka kadrenge marasikai liniane; kainaku wabeserenga! 15Lwiyasi piasu kai nakwane, kiatubiaku muswane kakurwaili, papacadhaili, la nau kai pianga kai kiadiadiadili ki akitusinalrelremeane.”
16Ku Tamatama kawariva ki Musi, “Kusu sarubwa ku tamapitulu ku kia musakesakene ku lamarudrange, si iluku liniane mu Alrivilrivi ka balrawbau cucubungu nakwane, si acegecege ithili muswane. 17Lri mulebeaku, ikai kwini kawriva muswane. Lri malra kwini baaili muswane ka ri vala liniane, kwini lalasu lalri dulrunga paralubu kwini la kicapilisu; kaisu lri muringeangeanga baca kikai amece. 18Kusu cuna ki mapapangale iya kai, ‘Kunumi ngibabula, tangipapadulru ku akaneane ku beate lwiya. Ku Tamatama kialalranga ku lisiane rivwane numi, apia kane nai ku beate iya, maesaesai ikai Izipiti amia numi. Ku Tamatama kwini lri baai numiane ku beate, kunumi la tara kanea. 19Kai numi lri kane maka vavaale maka pwapusale, maka lrialrimale maka mangeangeale ku vai, adravane ka amaka mapusale ku vai. 20Kunumi lri tara dramare numi kanekane ku beate, pakeela ku ngiabwale ki ngungwane numi ku beate, si lri kalraasenga numi. Kikai lri tara ngimia; asi lwiyane kwini malrase numi kwini ki yakai numiane ka Tamatama, si akwiya iniane, nai kai nai katwase Izipiti iya.’ ”
21Ku Musi kawariva ki Tamatama, “Kai sangilukuli kai mapapangale tamanemele ka kudrai ku pangalane, la iyasu kai, lri baadhaku ku atara dramarane kane ku beate? 22Yakai ku apawkelretane culu ku lwange ku kiu si pangulwadhane liniane? Adravane lu ngulreane ku lakange ki laveke kiau lulri makakelrete kane!”
23Ku Tamatama la tubalre, “Ku pukuli yakai ku talikaikaiyane? Kikai lri drelesu kai kawrivarivali lulri ngimia lutumane!”
24Ku Musi la mwa latadre, la pelaela patuelre kwini kawriva ki Tamatama. La sarubu ku tamapitulu ku lamarudrange, si paacegecege liniane ngithalringulu ki Alrivilrivi ka balrawbau. 25Ku Tamatama yakai ki ememe mulebe, si kawriva ki Musi, la malra kwini baaini ki Musi ka Ri vala kwini ki tamapitulu ka lamarudrange. Kwini Ri sa mulebe mwa ki kinawmasane lini, kwini lalasu la makitu ngimia ki yuginsia kikandu si kawriva, ai kaika tarathainu.
26La ikai ku tadrusa ku marudrange ka Ilridade si Midade la asurwana ikai ki tasuladhane, kai wamwa ki Alrivilrivi ka balrawbau, ikai kwini ki tasuladhane, ku Ri la mulebe mwa liniane, kwini lalasu la ngimia ki yuginsia kikandu si kawriva. 27Yakai ku tangea ku langukathabarane walrabwale mwa ki Musi, si pelaela kwini tapiane ki Ilridade si Midade ikai kwini ki tasuladhane.
28Ikai kwini, ku lalake ki Nunge ka Yesua la kawriva. Kai Yesua singika vavalake ka amani ku tara paraluralubu ki Musi. La kawriva ki Musi, “Tamatamali ruthuka liniane.”
29Ku Musi la tubalre, “ngwakaisu ki amuesadhaneli si pathalra? Palraingaku ku Tamatama la malra kikai Ri si vala sanaka kawkawluini, lani mia ki yuginsia makanaelre karaleale!” 30Ku Musi si tamapitulu ka lamarudrange ki swa Iseraylri la katwase siwlri mwa ki tasuladhane lini.
Ku Tamatama pwalebe ku thalingiebere
31La kirimu, ku Tamatama la pavalrigi, ku twaredelane ku tharingiebele la twalai belenge ki laveke kainganai ngipalai, si ngulaleebe kai lribate ki 1 mituru ku abelengane. La idrengere ikai ki tasuladhane si ngiathalringulu, wasarau ikai ki druanga, yatali talrawane sapakalriwgu lrawdru dradha, macucucungulu ka lrailrailraagi#11.31 “ngulaleebe ... lrailrailraagi” ku wahunyake madu iya kai “kwini lathalingiebere yadrengere ikai ki tasuladhane si ngiathalringulu, ki thili lri ikaai kau luka pia ka kunlri, la aru kababate, ku takaabatane vaeva ka mituru ku abelengane”.. 32Ku mapapangale la turakete taleare makitu pwalralra kwini ki tharingiebele; sakakaiyane laka thadaalrane turakete pwalralra, ku tangeangea ikai kau kudrulu ki kukingi ku pwalraini. Kwini lalasu la malra kwini thalingiebere pavai pikai ki tasuladhane. 33Sa kakalrana kwini akaneane lini ku beate, ku Tamatama la kaelaela liniane, si pulebe ku swalrubu mwa liniane. 34Kwini kadaengane sia Kiberuthe Hatava, “La mialri ka sia Ravane ka tadralredralrekane”, asi lwiyane amani sa pikai kwini dralreke ki apilrelrede ki beate ka laumawmase.
35Twalai kwini ki kadaengane, ku mapapangale la taluela mwa ka Hazeruthe, si ikai kwini cegecege ku tasuladhane.
Currently Selected:
Taasipane 11: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
