Taasipane 1
1
Aswalalanga ka taasipane ku umawmase ki swa Iseraylri
1Saka aswalalanga ka vai ki sakadrusa ka dramare ki sakadrusa ka caili ku takatwasane ka Izipiti ki swa Iseraylri, ku Tamatama yakai calragulragu ka Sinai idaane ki Alrivilrivi ka balrawbauini si kawriva ki Musi iya kai, 2-3“Kusu si Arungu kirimwa asipi ki umawmase ki swa Iseraylri, nguvavaeva ki zuku ki maretetese, si dadaanane drele pacase, malra pacase ku lanagane kwini ki taramapusalenga ku caili kulri dulru kikaruburu ka sawvalai. 4Kunumi la patwaladha ki lazuku silape ku tangea ka tamatama kulri paralubu numiane.” 5-16Kikai lebe amani ku nipilriane ki lazuku ka kiacapili kulri pasikai kikai ki awngane:
Zuku ki Riwbingi: Ilrizure ka lalake ki Sidiure.
Zuku ki Simiune: Silumile ka lalake ki Zurisadai.
Zuku ki Yuda: Nahasunge ka lalake ki Aminadabe.
Zuku ki Isakare: Nathaneile ka lalake ki Zuare.
Zuku ki Zibulungu: Ilriabe ka lalake ki Hilungu.
Zuku ki Iparaime: Ilrisama ka lalake ki Amihude.
Zuku ki Manase: Gamalile ka lalake ki Pidazure.
Zuku ki Biniyamingi: Abidange ka lalake ki Gidiuni.
Zuku ki Dange: Ahiezere ka lalake ki Amisadai.
Zuku ki Asere: Pagiele ka lalake ki Ukerange.
Zuku ki Gade: Ilriasape ka lalake ki Diule.
Zuku ki Napetali: Ahira ka lalake ki Inane.
17Ku Musi si Arungu kiaparalubu kikai ta 12 ka umawmase, 18la ikai kwini ki aswalaalanga ki vai ka sakadrusa ka dramare sarubu nguelre ki mapapangale, la singikai ki sakamanemanane ka lamaretetese, ki ladadaanane pacase ki mapapangale. Sanaka taramapusalenga ku caili ku sawvalai makitu kipaasipi kipacase, 19pangimia ku tadrekasane ki Tamatama. Ku Musi yakai calragulragu Sinai pacase ki mapapangale. 20-46Ku taramapusalenga ku caili papubebelenge ku lri dulru kikaruburu ku sawvalai, singikai ku tamasakaikaiyane ki maretetese, ki dadaanane, si nguvavaeva kipacase; laka sacucubungunga ku tinutakane ki Yakubu ka zuku ki Riwbingi. Ku nielreelreane ku umawmase ki lazuku amani kai yalebe:
| Zuku ki Riwbingi | 46,500 |
| Zuku ki Simiune | 59,300 |
| Zuku ki Gade | 45,650 |
| Zuku ki Yuda | 74,600 |
| Zuku ki Isakare | 54,400 |
| Zuku ki Zibulungu | 57,400 |
| Zuku ki Iparaime | 40,500 |
| Zuku ki Manase | 32,200 |
| Zuku ki Biniyamingi | 35,400 |
| Zuku ki Dange | 62,700 |
| Zuku ki Asere | 41,500 |
| Zuku ki Napetali | 53,400 |
| Paelreelre | 603,550 |
47Ku swa Lrivi ka umawmase kai kiapaelre ki drumane ka zuku kipacase, 48asi lwiyane ku Tamatama nakawariva ki Musi, 49“Lu drelesu asipi ki wadulru kikaruburu ku umawmase, madha paelrelre ki zuku ki swa Lrivi. 50Kusu sikawla ki swa Lrivi ka umawmase lri marasikaikai ki tapikaiyane ki Langiane ka Alrivilrivi ka balrawbau si lalawbubulu; lri salri kikai lalawbubulu, ikai ki Alrivilrivi ka balrawbau marasikaikai. Ku balrawbau lini lri cegecege pangithalringulu ki Alrivilrivi ka balrawbau. 51Lulri pataluela numi kai tasuladhane, kai swa Lrivi lri suburu kai Alrivilrivi ka balrawbau, ikai kwini ki bavane ka tasuladhane cegecege. Sanaka aneanenga ku ngwadadeethe ki Alrivilrivi ka balrawbau, lri tara kipapaacai. 52Ku drumane ku swa Iseraylri lri cegecege ku tasuladhane, sanaka umawmase ikai kwini ki talikaini ka kalralradha, singikai kwini ki tairubwane ka kwapingi, lrika kemikeemi cegecege ku tasuladhane. 53Ai ku swa Lrivi lri ngithalringulu ki Alrivilrivi ka balrawbau cegecege ku tasuladhane si kadrenge amani lu ikai ku ngwadadeethe ki Alrivilrivi ka balrawbau, si pakagirimucu nakwane kaelaela lrumai ki mapapangale ki swa Iseraylri.” 54Ku swa Iseraylri singiakai ku tadrekasane ki Tamatama ki Musi ku vaga si pangimia.
Currently Selected:
Taasipane 1: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
