Lrivi 27
27
Kakudhane ki patarwamara
1Ku Tamatama wacunu ki Musi, 2Papia ki swa Iseraylri baai pelaela kikai lebe kai kakudhane. Ku umawmase lulri sawlri kwidra nipawkalrivilane ku puvagaini papia ki Tamatama, lri singikai kikai lebe kai kakudhane sawlri kwini puvagaini. 3-7Singikai ku takelretane ku hiuzenge ki Alrivilrivi ki taikaikaiyane:
Ku pwacacuganenga—twalai ki taramapusale ku caili pakela ki taramanemele ku caili:
Ku sawvalai lri pakamalrimale ku gingi ka paisu.
Ku ababai lri pakamatulrulu ku gingi ka paisu.
Ku yacengecenge—twalai ki taralrima ku caili pakela ki taramapusale ku caili:
Ku sawvalai lri pakamapusale ku gingi ka paisu.
Ku ababai lri pakamangeale ku gingi ka paisu.
Ku lavavalake—taralrima ku caili papulelebe:
Ku sawvalai lri pakalrima ku gingi ka paisu.
Ku ababai lri pakatulru ku gingi ka paisu.
Ku tarudrawdrange—taramanemele ku caili papubebelenge:
Ku sawvalai lri paka 15 ku gingi ka paisu.
Ku ababai lri pakamangeale ku gingi ka paisu.
8Kwini lri sawlri ku umawmase alaiyasi ngwalai ki matikurwane la kai dulru singikai kwini ki takelretane sawlri, lri iluku mwa ki barakalai, la lri ka amani ku barakalai ku wakelrete ku adulrwane ki pukuini kelrete ku apakathainwane.
9Lwiyasi kwini puvagaini laka ngwakai ki sapatarumarane ka nilapulapwane si baai ki Tamatama, kikai saceacebe lrika papia ki Tamatama ka saniange. 10Kwini lri sawlri ku puvagaini ka umawmase kai lri maka pabalrithi ku drumane ku nilapulapwane—ku mathariri balrithi ku malisi, ku malisi balrithi ku mathariri, lwiyasi ikai ku wabalrithi, kwini drusa kwini nilapulapwane lrika Tamatamanenga. 11Lwiyasi kwini nipuvagane laka ngwakai ki kaika mabula ka waudriwdripi, amani ku kaika apatarumarane ki Tamatama tusapatarumarane, kwini lri sawlri ka umawmase lri iluku kwini nilapulapwane mwa ki barakalai. 12Ku barakalai lri singikai kwini ki nilapulapwane ku takatharirane ku takalisiane tuthaininu ku nidange, thaininu sana iya lri ka thaininu. 13Lwiyasi nau sawlri kwini nilapulapwane iyaiya, lri tara baai ku natakathane ku salangadhane, si lai drimana paka taingeane ki nipau lrimane.
14Ku umawmase la patarumara ku daane ki Tamatama, lri ka amani ku barakalai ku singikai ku takathane ki daane ku mathariri ku malisi, luka thainu ku kelreteini lri pakathainu baai. 15Kwini wabaai patarumara ka umawmase lwiyasi nau sawlri iya kwini ki daane, lri tara baai ku natakathane ku salangadhane kwini ki daane, si padrimana ku taingeane ki nipau lrimane, ala lri kisawlri ku daane.
16Lwiyasi ikai ku mucunguluini ku kadaengane lri kivala patarumara ki Tamatama, lri ka amani ku barakalai ku wakelrete ku tapakathathane lu paivai si kelrete, lwiyasi ka wasabulu madu ku mapusale ki kukingi ku sapaivai ki mugi ka kadaengane, lrika mangeale ku paisu ka gingi. 17Lwiyasi ka pabilrili ki Takipangilralraingane ka caili ala makakai patarumara, lri singikai ku nikelretane baai. 18Lwiyasi ka patarwamara sangilribatenga ku Takipangilralraingane ka caili, ku barakalai lri singikai twalai kwini pakela ki bibiilrili ki Takipangilralraingane ka caili kwini tedrane ka caili si kelrete apakivalavala ku takathainwane. 19Kwini umawmase nau sawlri la iyaiya kwini kadaengane, lri tara baai ku natakathainuane, si padrimana paka taingeane ki nipau lrimane. 20Lwiyasi kai paswala sawlri patwalai ki Tamatama kwini kadaengane, la malra kwini kadaengane kilangai ki druma, kwini lasu kadrwanga ku pukuini nau sawlri iya kwini kadaengane. 21Lu kelanga ki bibiilrili ki Takipangilralraingane ka caili, kwini kadaengane lrika palralrawthunga ka kadaengane ki Tamatama, ka barakaladhanenga.
22Lwiyasi ikai ku umawmase ku langaini ku kadaengane la baai patarumara ki Tamatama, 23lri ka amani ku barakalai ku singiakai twalai kwini pakela ki bibiilrili ki Takipangilralraingane ka caili ku tedrane ku caili kelrete ku takathainwane; kwini lasu lri tara ivaivaai baai kwini salangadhane, kwini paisu lrika Tamatamane. 24Pakela ki Takipangilralraingane ka caili, kwini kadaengane lri sawlri baai ki napikadaenganane ki mwabaibalrithi iniane.
25Patuelre ku takathanane ku paisu lri singikai ku takelretane ku kakudhane ki Alrivilrivi ka taikaikaiyane.
26Kwini aswalaalanga kitulalake ka nilapulapwane, adravane ka lwange ka kiu, Tamatamanenga, lakamani kwidra ku umawmase kai lri maka malranga kwini tungilralraingini si patarumara ki Tamatama. 27Lwiyasi kwini aswalaalanga kitulalake laka kaika mabula ka nilapulapwane, kwini lasu lri maka singikai kwini natakathane padrima ku taingeane ki nipau lrimane; lwiyasi kai maka sawlri, lri maka singikai ku nikelretane ku takathainwane kilangai ki palrapalra.
28Kwini kadrwa ku tamasuswane la patarumara ki Tamatama kwini lamanemane#27.28 “Kwini kadrwa ku tamasuswane la patarumara ki Tamatama kwini lamanemane”, lu vuthane patarumara adravane ka manemane, Tamatamanenga patueelre, kai lri dulrunga arakai, lakamani, kikai lamanemane atara pakalisiane madu si cilri., adravane ka umawmase, ka nilapulapwane, ka nimucungulane ka kadaengane, kai lri maka kilangai ki palrapalra, la mialri kai dulru sawlri, lri ka palralrawthunga ka Tamatamane. 29Adravane ka kadrwa ku tamasuswane patarumara ki Tamatama mialri kai lri dulru sawlri langai, lri tara kipapacai.
30Kwini wacebe ki kadaengane, adravane ka lataleke ka lamadru, kwini taingeane ki nipau mangealane Tamatamane; kikai nitusaniangane si baai ki Tamatama. 31Lwiyasi ikai ku nau sawlri langai amia ku umawmase, lri tara singikai ku nikelretane ku takathainwane padrimana ku taingeane ki nipau lrimane si baai. 32Kwini ki mangeale ku nilapulapwane yakai ku vaeva ku Tamatamane. Lu asipi pakela ki sakamangeale, kwini vaeva amani ku Tamatamane. 33Ku tawki kai lri maka balrithi, malra kwini malisi si patarumara la mialri kai lri maka arakai ku drumane ku nilapulapwane pawbalrithi. Lwiyasi la arakai ku drumane ku vaeva pawbalrithi, kwini drusa kai lri maka sawlri, kwini Tamatamanenga.
34Kikai lakakudhane amani ku Tamatama ka yakai lregelrege ka Sinai si baai ki Musi si papia ki swa Iseraylri pelaela liniane.
Currently Selected:
Lrivi 27: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
